Read kumam Job 15 Bible Online

Job 15 - kumam bible

Job 15

¹Xitzun ttzaq'we'n Elifaz aju aj Temán ex tma:

²Aju xjal at tnab'l minti' in tzaj ttzaq'we'n tuk'il jun yol noqx gan, ex minti' in tma'n jun yol minti' ttxolil;

³minti' in tklon tib' tu'n yol noqx gan ex tu'n yol minti' tajb'en.

⁴Tu'n tyola mya tuj tumel mlay che nimantl xjal twitz Dios; ex mlay che na'ntl Dios.

⁵Tu'n t-ximb'etza mya b'a'n in yolina ikju, ex in ajb'en ju yol te sb'ub'l tu'na.

⁶Mya il ti'j tu'n t-xi nma'ne at tila, ex tu'nx ju yol in tma'na in tchik'b'ana at tila.

⁷¿Maj in ximana ti'j qa aya tnejel xjal b'ant tu'n Dios twitz tx'otx', ex qa minti'toq qe witz ate' tej tb'anta tu'n Dios?

⁸¿Ope tena kyxol qe q'ol nab'l ttxlaj Dios, ex o'kxpe teya at tnab'la twitz tx'otx'?

⁹¿Alkye b'a'n tu'na aju minti' b'a'n qu'ne? ¿Alkye tzqi'n tu'na aju minti' tzqi'n qu'ne?

¹⁰Qxole at qe tij xjal wen, mas tij xjal qe twitz tmana.

¹¹¿Maj ch'in nne'la tuj twitza tu'nju ax Dios in q'uqb'ante tk'u'ja ex cheb'a in qo yoline teya?

¹²¿Tiqu'n noq in tx'a'l ti'j tk'u'ja, ex tiqu'n in che etz wakpaj qe tb'aq' twitza tu'n tq'oja?

¹³¿Tiqu'n in tzaj ttx'u'jila ti'j Dios ex nimxix tyola mya b'a'n in tma'na ti'j?

¹⁴Minti' jun xjal saq tuj tanmi ex minti'wt tpaltil.

¹⁵Milpe kyi'j qe t-anjel minti' nno'k qe' tk'u'j, ex mya'lpe saq nne'l ju kya'j tuj twitz,

¹⁶pyortzun te xjal jumajx tz'il ex ik'b'il, in pon tk'u'j ti'j mya b'a'n ik tza'n jun xjal in k'an a' ok ttzaj txqetle'n ti'j.

¹⁷Chin tb'intza, kxel nma'ne teya aju ma tz'el nnik'e ti'j,

¹⁸aju o tzaj kytx'olb'a'n qeye qe xjal at kynab'l. O tz'el kykano'n kyi'j qe kyxe'chel,

¹⁹aqeju o'kxku kye xi q'o'n tx'otx', ex minti' b'aj kysmon kyib' kyuk'il qe stranjer xjal.

²⁰Tuj tkyaqil tanq'ib'l xjal mya b'a'n, nim yajb'il in tzaj ti'j. Aju xjal in yajlan kye txqantl, mya ma' tuj tq'ij.

²¹B'i'x in sek'paj tu'nju tq'ajq'ajel in tb'i'n; aju q'ij mas b'a'n ta' tna'n, atzun q'ij in che ok tzoqpaj qe eleq' ti'j.

²²Minti' tumel tu'n ttzoqpaj tuj qlolj; b'anin tten jun spad ti'j tu'n tkub' b'yo'n.

²³K'ajb'el t-ximlal te kychi' k'utz; b'i'n tu'n mlay tzik'x ti'j tu'n tnaj.

²⁴Ok ttzaj qlolj nim kjawil xob', ktzajel nim tb'is ex ktzajel b'aj tk'u'j, ik kyten jlu ik tza'n jun rey b'anin tten tu'n tok tzoqpaj q'ojlel.

²⁵Atzun jlu in b'aj ti'j ju xjal in jaw ti'n tib' ti'j Dios, ex in jaw tniman tib' twitz Dios aju at tipumal tu'n tb'ant tkyaqil tu'n,

²⁶nno'k tzoqpaj ti'j Dios, ex tokx jun maqb'il tuj tq'ab' te tkolb'il tib'.

²⁷Puro gord qe tq'o'tx ax ikx tk'u'j.

²⁸Qe tnam jatum najl che b'el xitj; kyjel kykolin xjal kyja ex noq tuj b'yujin che kyjel ten qe ttx'aqan.

²⁹Mlay tz'ok q'inun te ela' q'ij, ex mlay chmet tq'inumab'l.

³⁰Mlay tzoqpaj tuj qlolj. Ik k'okel ik tza'n jun awal in tz'e'y t-xul tu'n q'aq' ex in xi iqan t-xmakal tu'n kyq'iq'.

³¹Mi'n tz'ok qe' tk'u'j ti'j ju noqx gan, qatzun ma qe' tk'u'j ti'j, axte kb'el sb'u'n.

³²Ik k'okel ik tza'n jun tze' na'nxtoq tpon tq'ijlalil kb'el tzqij tq'ab' ex mlay tzaj t-xul.

³³Ik tten ik tza'n jun tq'ab' uva mlay q'anax twitz, ik tza'n tze' olivo nne'l tz'aq t-xmakal.

³⁴Qe xjal mya b'a'n mlay tzaj kyiyjil, ex kb'el tz'e'y kyja tu'n q'aq' tu'nju otoq che q'inumax tu'n pwaq mya tuj tumel nne'l kyqanin kye xjal.

³⁵Qe xjal lu in kub' kyximan tu'n kyb'inchante mya b'a'n, ex atzun in b'ant kyu'n. Ex nojni tuj kyanmi tu'n sb'ub'l.