Read kumam Job 16 Bible Online

Job 16 - kumam bible

Job 16

¹Xitzun ttzaq'we'n Job ex tma:

²Ma nb'iye ela'xi maj ju yol ax ik tza'n jlu. Minti' in kyq'uqb'a'ne nk'u'je, noq o'kx in kyq'o'ne mas k'ixb'isab'l weye.

³¿Minti'pe b'ajsb'il teju tyola minti' tajb'en? ¿Ti ma tzaj ti'ja tu'nju in yolina ikju?

⁴Noqwit aqeye in che yajlanjtz ik tza'n weye, ikxwitlo weye jaku chin yoline ik tza'n kyeye, tzinwitlo in xi nyukun nwi'ye te xmayb'il kyi'je ex tzinwitlo in nma'ne noq nik'punxi yol.

⁵Jakwitlo txi nma'ne yol tuj cheb'a ex te q'uqb'ab'l kyk'u'je tu'n tkyuwset kyk'u'je ex tu'n tten kyipune.

⁶Qa ma chin yoline, minti' in chewix k'ixk'oj wi'je, ex qa minti' in chin yoline ax ikx minti' in chewix k'ixk'oj wi'je.

⁷Ma b'aj wipune tu'n Dios; kykyaqil qeju ate' tuj njaye ma che naj tu'n,

⁸ex ma chin okx tq'o'n tuj pres. Ma jaw yol mya b'a'n wi'je tu'n; ma jaw sib'j yol wi'je tu'n.

⁹Kukx tq'ojin Dios wi'je ex ma chin b'aj ttzaqin, in qitx'itx'in t-xe te' wi'je, noq ax nno'k b'aj tb'aq' twitz wi'je ik tza'n jun aj q'oj.

¹⁰Nim xjal in jaw kychmon kyib' wi'je, noq in xi kynach'in kytzi' tu'n kytze'n wi'je, nno'k kyjato'n nwitze ex in che ilin wi'je.

¹¹Ma chinx tq'o'n Dios tuj kyq'ab' xjal mya b'a'n ex jawni kywitz.

¹²Atintoqe tuj txub'txaj; tzaj ttzyu'n ti'j nqule; in tzyete tu'n ex in kub' tpaẍu'n, ok t-xo'n tplech wi'je.

¹³Tuj tkyaqil pak' in tzaj t-xo'n tplech wi'je; in che okx qe tplech tuj nchib'jale ex minti' ch'in tq'aq'b'il tk'u'j wi'je, ex nne'l chitj tuj nk'u'je twitz tx'otx'.

¹⁴Nimku ẍil nno'k wi'je tu'n, in tzaj tzoqpaj wi'je ik tza'n jun q'ojlel.

¹⁵Ma tz'ok nq'o'ne xb'alun ch'i'x twitz wi'je tu'n nb'ise, ex q'uql qine tuj quq tu'nju ma tz'el ti'n woklene.

¹⁶Ma txi mal nwitze tu'n oq'el; ma tz'ok muj ti'j tb'aq' nwitze,

¹⁷maske minti' o nb'inchaye jun mya b'a'n kyi'j xjal, ex aju nna'j Diose b'a'n ta'.

¹⁸Aya tx'otx', mi'n kub' tewana aju mya b'a'n o b'inchanjtz wi'je; ex mi'n kub' tewana nkub'sb'ile tu'n t-xi b'inchet wi'je.

¹⁹Atlo jun at tuj kya'j tu'n tyolin wi'je tu'n nklete,

²⁰tu'n t-xi tchik'b'a'n te Dios qe nximb'etze, tu'ntzun ttzaj tke'yin Dios ta'l nwitze;

²¹atlo jun in yolin twitz Dios wi'je, ik tza'n nno'k jun xjal yolil ti'j jun tuk'il tu'n tb'ant ti'j twitz juntl xjal.

²²Aju ch'intl wab'q'iyile atx, jurat nib'an tb'aj, ch'ix ttzyet nb'eye ex mlay chin ajtz meltz'aje.