Read kumam Job 19 Bible Online

Job 19 - kumam bible

Job 19

¹Tmatzun Job: ¿Jtojtzun txi kykoline tu'n kyyajlane wi'je ex tu'n nk'ixb'isanjtze tu'n kyyole?

³Ela' majxi chin ok kyik'le'ne; ¿minti'pe in tzaj kych'ixwiye tu'nju in kyb'incha'ne wi'je ikju?

⁴Ex maske at wile, pero o'kx weye kb'el ncastiwoye tu'n tlaj.

⁵Atzun kyeye nno'k kyq'on kyib'e mas b'a'n nwitze, ex nno'k kyma'ne tib'aj nwitze aju yajb'il weye.

⁶Tz'elx kynik'e ti'j, ate Dios ma tzaj q'onte yajb'il wi'je, ex tu'n Dios ma chin okx q'o'ne tuj k'ob'il.

⁷Maske in chin jaw sch'ine: At jun nno'k tzoqpaj wi'je, nchiye, pero mi a'l in tzaj tzaq'wente weye; in chin qanine onb'il ex mi a'l in xi b'inchante wi'je.

⁸Ma b'aj maqo'n nb'eye tu'n Dios tu'n mi'n wexe; ex kyuj qe tq'ab' nb'eye puro qlolj ma tz'ok tu'n.

⁹Ma tz'el ti'n tkyaqil nq'inumab'le, ex ma tz'el ti'n woklene.

¹⁰B'i'x ma chin naje tu'n, ik tza'n jun ja in kub' xitj. Ik ma chin oke tu'n, ik tza'n jun tze' in jatz lakut tlok'; minti' jatum tu'n tok qe' nk'u'je.

¹¹Ma tzaj nim tq'oj wi'je ex ma chin ok q'o'ne tu'n ik tza'n jun aj q'oj.

¹²Ma che tzaj tlajo'n kykyaqil t-soldad wi'je; ma che kub' ten ti'jele njaye ex ma b'ant kyten tu'n kyok tzoqpaj wi'je.

¹³Tu'n Dios ma che el tlaq'b'a'n qe wermaniye ex qe wamiwoye wi'je, ex ma chin ok kyq'o'n ik tza'n minti' ojtzqi'n qine kyu'n.

¹⁴Qe xjal at nxilene kyuk'il ma chin kyaj koline kyu'n, ex qe wamiwoye ma tzik' nna'njtze kyu'n.

¹⁵Qeju najl tuj njaye kyuk'ix qe nmajene xu'j, mer ik tza'n minti' ojtzqi'n nwitze kyu'n, mer minti'tl nne'l kynik' wi'je.

¹⁶Qa ma tzaj ntxko'ne jun nmajene xinaq, minti'tl in chin tzaj ttzaq'we'n maske ma chin kub'sane twitz.

¹⁷In chin el ik'une tu'n nxu'jile tu'n tlaj nim t-xew nxewe tuj ntzi'ye; ex minti' in che ul laq'e' qe wermaniye ntxlaje tu'n tlaj nyab'ile.

¹⁸Ax ikx qe tal q'a in chin el ik'une kyu'n; ex matoq in chin jaw we'ye, lu qe in che xmayin wi'je.

¹⁹Qe xjal merxix wamiwoye ma chin el ik'une kyu'n; ex qeju k'ujla'nxix wu'ne ma jaw kyi'n kyib' wi'je.

²⁰Ma chin ok tzqije wen, minti' nchib'jale, o'kx nb'aqile at ex pen ma chin kyaj anq'ine.

²¹Tzaj tz'e'y kyk'u'je wi'je, aqeye wamiw, porke tu'n Dios ma chin k'ixb'isanjtze.

²²¿Tiqu'n in che yajlane wi'je ik tza'n in tb'incha'n Dios? ¿B'ajxpetzun jatz kyganiye tu'n kyyajlane wi'je; baqa noq jun majxi jlu?

²³Noqwit at jun kub' tz'ib'ante nyole ex tu'n tkyaj tz'ib'et tuj jun libro.

²⁴Noqwit at jun kub' tz'ib'ante twitz plom ex qa twitz ab'j tu'n jun tal k'uxb'il tz'u'p twi', tu'n tkyaj ten te jumajx.

²⁵B'a'n wu'ne aju kolol wi'je itz'te, ex kkolil wi'je tzalu twitz tx'otx'.

²⁶Ex maske ma naj nchib'jale, pero akuwe qin chin ke'yil twitz Dios.

²⁷Aku qine chin ke'yilte kyu'n qe tb'aq' nwitze, ex mya junxitl. Nimxix waje tu'n tok nke'yine.

²⁸Ex qa ma kymaye: ¿Alkye tumel tu'n tkub' ti'j tnab'l qu'n? Tu'nx til Job ma tzaj ju yajb'il ti'j, qa che chiye.

²⁹Tu'ntzun jlu che xob'e twitz spad, porke aju spad lu atzun in ajb'en tu'n Dios tu'n tkub' tcastiw xjal mya b'a'n. Tz'elx kynik'e ti'j qa at jun jwes tu'n t-xi b'inchante wi'je.