Read kumam Job 2 Bible Online

Job 2 - kumam bible

Job 2

¹Tej kypon qe anjel juntl maj twitz Dios, tuk'ix Satanás pon kyxol.

²Xi tqanin Qman te Satanás: —¿Jatum ma tzaja? Atzun te xi ttzaq'we'n: —Ma b'aj nb'etine tkyaqil twitz tx'otx'; tzyet-x wu'ne tuj jun pak' ttxa'n tx'otx' ex ma pon b'aj tuj juntl pak'.

³Xitzun tma'n Qman te: —¿Mape tila nmajene Job? Mi a'l juntl xjal twitz tx'otx' in pon ik tza'n te, in anq'in tuj tumel ex tz'aqlxix, b'a'n niman weye, ex tpa'n tib' ti'j mya b'a'n. Maske minti' til, in jyona tumlal tu'n tnaj tkyaqilju at te wu'ne, pero kukx tb'inchan b'a'n ex minti' ch'in tpaltil.

⁴Tmatzun Satanás: —Qa mya ti'jku t-ximlal xjal ma tzaj yajb'il, mlay b'isun tu'n tlaj, ex jaku txi tq'o'n tkyaqilju at te noq tu'n kukx tanq'in.

⁵Qatzun ma tz'ok tk'ixb'isa'na aku t-ximlal, jakutzun tila qa mi xyolin mya b'a'n ti'ja twitzkuya, chi Satanás.

⁶Xitzun ttzaq'we'n Qman te: —Ax b'a'n, b'inchama alkye tajb'ila tu'n tb'inchanteya ti'j, o'kx mi'n kub' tb'yo'na.

⁷Etztzun Satanás twitz Qman ex ok tq'o'n jun yab'il tx'a'k plojxix wen ti'j Job, tzajx ma tuj tlaqal tqan ex japun b'aj max tuj twi'.

⁸Xi'tzun Job ex kub' qe' tuj tza'j tu'n tlaj tb'is, ex jaw ti'n jun piẍ ttx'aqan k'il te skatb'il ti'j.

⁹Atzunte t-xu'jil xi tma'n te: —¿Maj kukxtzun oksla'n Dios tu'na? Maslo b'a'n tu'n tyolina mya b'a'n ti'j Dios tu'ntzun tkyima.

¹⁰Xitzun ttzaq'we'n Job te t-xu'jil: —Ma yolina ik tza'n jun xu'j minti' tnab'l. Qa in qk'mo'n ju b'a'n in tzaj tq'o'n Dios qe, ¿tza'ntzun tten mi'n qk'am aju mya b'a'n in tzaj qi'j? Kyja'tzun minti' il o tb'incha Job ex mi jun yol mya b'a'n tma, maske tzaj nimku mya b'a'n ti'j.

¹¹Attoq ox tamiw Job: Elifaz tb'i jun, ate jlu aj Temán; juntl Bildad tb'i, ate jlu aj Súa; atzun juntl Zofar tb'i, ate jlu aj Naamat. Tej kyb'inte tqanil ti'j tkyaqil yajb'il otoq tzaj ti'j Job, kub'tzun b'e kyu'n tu'n kyxi' q'uqb'alte tk'u'j ex tu'n kyten tuk'il tuj yajb'ilte.

¹²Atxtoq taj tu'n kykanun jatum ta' Job, o kyil naj ex pen el kynik' ti'j, jaw tq'ajq'ajel kywi' ex e ok ten oq'el; el kysb'it'un kyxb'alun tu'n kyb'is, e ok ten chitul tquqil tx'otx' twitz kya'j ex jax kychitun tuj kywi';

¹³e kub'tzun qe' twitz tx'otx' ttxlaj Job, ex tuj enter wuq q'ij ex wuq qonik'an e ten tuk'il ex mi jun yol o kyma te, porke o kyil nimxix k'ixk'oj nnik'x tu'n.