Read kumam Job 20 Bible Online

Job 20 - kumam bible

Job 20

¹Xitzun ttzaq'we'n Zofar aju aj Naamat, ex tma:

²Nim in chin ximane ex ma b'aj npasense; kyja'tzun wajb'ile tu'n t-xi ntzaq'we'ne.

³Ma tz'el nch'ixwiye tu'n tyola, pero b'a'n wu'ne alkye kxel ntzaq'we'ne teya.

⁴¿Minti'petzun b'a'n tu'na ikxix ttenju atxix tej tkub' ten xjal twitz tx'otx':

⁵Aju ttzalajb'il xjal mya b'a'n noq ch'in in ten; aju tachb'il noq ch'in tuj in ten?

⁶Maske japun b'aj tnimb'il tib' twitz kya'j, ex maske pon takl twi' jatum ta' muj,

⁷knajel ik tza'n ttxa alumaj, ex mlay kyb'i qe tamiw jatum otoq pon.

⁸Kb'el naj ik tza'n jun witzik', ex ik tza'n jun in tzaj yek'un te xjal qonik'an mer ik tza'n tuj witzik', ex mi a'l jun jaku knet xjal lu tu'n.

⁹Qeju e ten junx tuk'il ex ok kyke'yin twitz, mlay tz'ok kyke'yin twitz juntl maj.

¹⁰K'ajel kyq'o'n tk'wa'l juntl maj aju otoq tz'el telq'a'n kyman kye qe meb'a.

¹¹Atxtoq tipun ex ku'xunxtoq ok tkyim ex ok t-xi q'i'n tuj muqb'il.

¹²Aju mya b'a'n puro chi' nne'la te te, ex in b'aj tleq'an taq' aju ttxub'txajal;

¹³ax in kub' tk'u'n ju ttxub'txajal tuj ttzi' ex cheb'a in txub't tk'o'n ti'j.

¹⁴Oktzun tku'pun tuj tk'u'j nno'k ik tza'n tvenen lob'aj.

¹⁵In jatz t-xa'n aju q'inumab'l otoq txi tb'alq'u'n; in jatz ti'n Dios tu'ntzun mi kukx tten tuj tk'u'j.

¹⁶In tz'ub'antoq ti'j tvenen lob'aj, ex atzun venen lu kb'el b'yonte te.

¹⁷Mlay achin ti'j lech ex qa ta'l kab' aju nimxix ik tza'n nima.

¹⁸Tkyaqil aju otoq tkamb'a k'ajel tq'o'n juntl maj; mlay tz'ok te tajwil ex mlay achin ti'j tq'inumab'l.

¹⁹Ex e kub' tyajla'n qe meb'a ex e kyaj tkolin; ok tq'on tib' te tajwil qe ja, aqeju mya tu'n otoq che jaw tb'incha'n.

²⁰Minti' in kyaj conporm ti'j nimku at te, ex tkyaqilju in pon tk'u'j ti'j in knet tu'n.

²¹Minti' jun ti'xti in kyaj ten tu'n tu'n mi t-xi tchyo'n. Kyja'tzun mlay ten b'a'n nim q'ij.

²²Qa mas nimxix at te, mas tb'is in tzaj; ktzajel nimku mya b'a'n ti'j.

²³Ok tok ten nojsalte tk'u'j, ktzajel nim tq'oj Dios ti'j: ex ktzajel nim ttx'u'jil Dios ti'j.

²⁴Qa ma tz'el oq twitz b'yolte te tu'n spad, jaku tza'w tu'n jun plech q'an k'uxb'il.

²⁵Aju plech k'okex xuypaj tuj t-ximlal, atzun twi plech k'elex tuj ttx'otx'. Ktzajel nimxix xob'ajil ti'j.

²⁶Txolin ti'j tu'n nim qlolj. Kb'el tz'e'y tu'n q'aq' tuk'ix tkyaqil tja. Aju q'aq' lu mya il ti'j jun xupilte tu'n tjaw k'ant.

²⁷Tuj kya'j k'elel til tuj q'ancha'l, ex aju tx'otx' kq'malte alkye til.

²⁸Ok ttzaj nim tq'oj Dios tib'aj, knajel tkyaqil tq'inumab'l tu'n.

²⁹Atzun jlu b'animaj tu'n Dios teju xjal mya b'a'n, atzun jlu ktzajel q'o'n te tu'n Dios.