Read kumam Job 21 Bible Online

Job 21 - kumam bible

Job 21

¹Xitzun ttzaq'we'n Job ex tma:

²Aju tumel mas b'a'n tu'n ttzaj kyq'uqb'a'ne nk'u'je, atzun tu'n tkub' kyb'i'ne nyole.

³Ten kypasense ok nyoline, ex nb'ajlenxi yoline, b'a'n kyxmayine wi'je qa kyajb'ile.

⁴Mya tuk'il xjal in chin q'ojine; kyja'tzun ma b'aj npasense.

⁵Chin kyke'yintze ex che elel sek'paje wi'je, ex mi'n che q'ajte.

⁶Qa ma chin ximane wi'jxe, in chin el sek'paje ex in tzaj lu'lun nximlale.

⁷¿Tiqu'n kukx kyten qe xjal mya b'a'n, in che tijin ex in chmet kyq'inumab'l?

⁸Nno'k kyke'yin ok in che ch'iy qe kyk'wa'l ex qe tal kychman, ax kytxlaj in che ch'iy ex b'a'n ate'.

⁹Tuj txub'txaj ate' tuj kyja, mi a'l jun in xob'tzan kye ex minti' in kub' kycastiw tu'n Dios.

¹⁰Qe kytor kukx in che k'wa'lin; nno'k ten kyal qe ttxu kywakẍ ex minti' in kub' kyal na'nxtoq tjapun tq'ijlalil.

¹¹In che schan qe kyk'wa'l ex in che lipan ik tza'n qe tal ẍne'l.

¹²In che b'itzan tuk'il tzalajb'il ex in che t'ikpaj ti'j t-sonil chnab' arpa, tuk'ix tampor ex xux.

¹³Tuj tzalajb'il in pon b'aj kychwinqlal ex tuj cheb'a in che kyim.

¹⁴Che chi te Dios: Pa'nmil tib'a qi'je, mi'n qajb'ile tu'n qb'inteye aju in tma'na tu'n tb'ant qu'ne.

¹⁵¿Ti toklen Dios aju at tipumal tu'n tb'ant tkyaqil tu'n? ¿Ilpetzun ti'j tu'n qajb'en te? ¿Ti qganar ti'j tu'n qkub'san twitz? Che chi.

¹⁶Tkyaqilju at kye qe xjal mya b'a'n, mya kyu'nx in knet. Mi'n waje tu'n nximane ik tza'n kye.

¹⁷Mi jun maj in kub' yupj kyspik'un qe xjal mya b'a'n. Mi jun maj in tzaj mya b'a'n kyib'aj. Mi jun maj in jaw q'ojl Dios kyuk'il ex mi jun maj in che k'ixb'isanjtz tu'n.

¹⁸Mi jun maj in che el sputj ik tza'n in xi iqan ttxa triw tu'n xkyaqinpaẍ.

¹⁹Ma kymaye, kb'el tq'o'n Dios kycastiw qe k'wa'l tu'n tlaj ju mya b'a'n o kyb'incha kyman, che chiye. Pero ax te xjal mya b'a'n kxel chjonte ju mya b'a'n o tb'incha, tu'ntzun tel tnik' ti'j.

²⁰Ok ttzaj tq'oj Qman aju at tipumal tu'n tb'ant tkyaqil tu'n, axte xjal mya b'a'n ok k'molte castiw tu'n.

²¹Ok tkyim, ¿ti toklen ti'j aju kb'ajel kyxol qeju ate' tuj tja?

²²(Ex, ¿alkye jun jaku txi tq'o'n xnaq'tzb'il te Dios, aju Dios in che ok tq'o'n tuj xjel qeju ma' kyoklen?)

²³At junjun xjal in che kyim atx nim kyipun, in che tzalaj ex txub'txaj ate',

²⁴nimku at kye ex b'a'n ta' kyximlal.

²⁵Ex at junjuntl, puro tuj k'ixk'oj in che kyim ex minti' otoq che ten ch'in tuj txub'txaj.

²⁶Maske ikju, pero kykyaqil che pol tuj muqb'il; kykyaqil che b'ajel chyo'n kyu'n ẍuq'.

²⁷B'a'n wu'ne alkye in kub' kyximane wi'je ex alkye nab'l mya b'a'n q'i'n kyu'ne.

²⁸In b'aj kyqanine kyxolxe: ¿Jatum ta' ja'lo tja ju xjal mya b'a'n ex puro kyuw tmod? Che chiye.

²⁹¿Na'nxpetzun kyyoline kyuk'il qe xjal in che b'et kyuj nimku lugar? ¿Na'nxpetzun kyb'inteye qe yol in kyma'n?

³⁰Ok in tzaj tq'oj Dios in tzaj t-sama'n jun mya b'a'n kyi'j xjal, atzunte xjal mya b'a'n minti' in b'aj ti'j, che chi.

³¹Mi a'l jun nno'k q'mante te tib'aj twitz alkyeju tb'inchb'en, ex mi a'l jun in kub' q'onte tcastiw ti'j tb'inchb'en.

³²Oktzun t-xi q'i'n tuj muqb'il, kykyaqil xjal lepch qe ti'j, at qe nejni ex at qe lepchix nno'k kyxq'uqin tuj muqb'il, ax ikx ju tx'otx' puro b'unin twitz tna'n.

³⁴Noq gan kyajb'ile tu'n tok kyq'uqb'a'ne nk'u'je. Puro nik'aj yol tkyaqilju in kyma'ne, chi Job.