Read kumam Job 22 Bible Online

Job 22 - kumam bible

Job 22

¹Xitzun ttzaq'we'n Elifaz aju aj Temán ex tma:

²¿Chipetzuna qa tu'nju at nimxix tnab'l xjal at tajb'en te Dios?

³¿Ti tajb'en te Dios aju at tipumal tu'n tb'ant tkyaqil tu'n qa aya puro tz'aqlxix ex minti' tpaltila?

⁴Qa ma kub' kawina tu'n Dios ex qa ma kub' tcastiwoya tu'n, a jlu mya tu'nju in ajb'ena te tuj tumelxix,

⁵noq o'kx tu'nju at nimxix mya b'a'n ma tb'inchaya ex nimxix tila minti' b'ajsb'il te.

⁶El tqanina prent kye termaniya ex mya iltoq ti'j; el ti'na kyxb'alun tok kyi'j ex e kyaj tq'o'na sb'iql kyi'j.

⁷Tej in che txqet minti' xi tq'o'na kyk'a a'; tej ttzaj we'yaj kyi'j minti' xi tq'o'na kywa.

⁸Tu'nju at tipuna ex xo'na kyu'n xjal, ok tq'on tib'a te tajaw kytx'otx'.

⁹Minti' xi tq'o'na alkye at tajb'en kye meb'a xu'j, ex e b'aj tyajla'na qe k'wa'l minti' kyman ex kytxu'.

¹⁰Kyja'tzun txolin ti'ja ja'lo tu'n xob'ajil, ex minab'en ma tzaj nim xob'ajil ti'ja.

¹¹Tkyaqil qlolj ta', mi jun ti'xti in tila; nib'an taj mulq'aja tjaq' nintz a'.

¹²Ate Dios tokx tib'ajxi kya'j ex in ku'tz tke'yin qe che'w mas najchaq kyjax.

¹³¿Tza'ntzun tten in tma'na minti' tok tkwent Dios ti'j aju in b'ant kyu'n xjal, ex minti' tumel tu'n tkawin kyi'j tu'n tlaj minti' in til tu'n tlaj q'eq muj?

¹⁴Maqo'n twitz tu'n muj ex minti' in til, o'kx in b'et twitz kya'j, in tzaj tuj jun plaj ex in pon tuj juntl plaj, chiya.

¹⁵¿Tajpeya tu'n tb'eta tuj ojtxi b'e, aju o che b'et qe xjal mya b'a'n tuj?

¹⁶Aqeju jurat naj e kyim, e je'x iqan tu'n nima otoq ch'iy.

¹⁷Che chi te Dios: Pa'nmil tib'a qi'je. ¿Ti jaku tb'incha Dios qi'j, aju Dios at tipumal tu'n tb'ant tkyaqil tu'n? Che chi.

¹⁸(Maske tu'n Dios otoq noj kyja tu'nju nimku at kye. Miwt pon nximb'etze ik tza'n kye qe xjal mya b'a'n.)

¹⁹Tej kyke'yinte qe tz'aqlxix jlu, e tzalaj ti'j; ex qeju minti' kyil xi kytze'n, che chi kyja':

²⁰Ma b'aj tz'e'y tu'n q'aq' kyq'inumab'l qe xjal mya b'a'n.

²¹B'incham ttena tuk'il Dios, tu'ntzun ttena juntl maj tuj txub'txaj.

²²Q'onxa amb'il tu'n ttzaj xnaq'tza'na tu'n, awanku'xa tyol tuj tanmiya.

²³Qa ma tz'ajtz meltz'aja tuk'il Dios aju at tipumal tu'n tb'ant tkyaqil tu'n, ktela b'a'n ik tza'n nej; qa ma tz'ex ti'na ju mya b'a'n at tuj tjaya,

²⁴ex qa ma tz'ok tq'o'na q'an pwaq aju wi'yilxix mer ik tza'n quq ex ik tza'n noq alkyexku ab'j at tuj tq'ab' xaq,

²⁵kyja'tzun tten ate Dios k'okel te teya ik tza'n q'an pwaq ex ik tza'n saq pwaq nimxix.

²⁶Ktzalajela tu'n ex jaku yolina tuk'il minti' t-xob'ila.

²⁷Qa ma kub'sana twitz, jaku tzaj b'i'na tu'n ex kjapunel tu'na aju otoq txi ttziyana te.

²⁸B'a'n k'elel tkyaqil aju tajb'ila tu'n tb'ant; ktel spik'un tuj tb'eya.

²⁹Porke nno'k te ch'in toklen tu'n Dios aju xjal in jaw tniman tib', atzunte xjal mans in klet tu'n.

³⁰Ok kletela tu'n qa minti' tila, qa saq ta' tuj tanmiya.