Read kumam Job 23 Bible Online

Job 23 - kumam bible

Job 23

¹Xitzun ttzaq'we'n Job ex tma:

²Juntl maj kxel nma'ne aju nb'ise nimxix, ex nimxix ma chin k'ixb'isanjtze tu'n Dios.

³Noqwit b'a'n nb'inteye jatum jaku knet wu'ne ex tza'n tten tu'n npone jatum najl.

⁴Jakwitlo teku tz'ok nma'ne aju nyole, ex nimku yol at wuk'ile te kolb'il wib'e.

⁵Jakulo tz'el nnik'e ti'j alkye yol ktzajel ttzaq'we'n weye, ex jakulo tz'el nnik'e ti'j alkye ktzajel tma'n weye.

⁶Pero mlaylo yolin kyuw wuk'ile tu'nju at tipumal, noq o'kx jakulo chin kub' tb'i'n,

⁷ex jakulo tz'el tnik' ti'j qa at ttxolil nyole, jakulo tma weye qa minti' wile ex jakulo chin kyaj ttzoqpi'n te jumajx.

⁸In chin jyone ti'j Dios tuj tjawitz q'ij pero mi a'l at, in chin jyone ti'j tuj telex q'ij ex minti' in knet wu'ne.

⁹In chinxe jyolte tuj tb'anq'ab' q'ij, pero minti' in wile; in chinxe tuj tnayaj q'ij, ax minti' in tzaj tyek'un tib' weye.

¹⁰Atzun te b'a'n tu'n jatum in chin b'ete; ok woke tuj malb'il tu'n, chin elele minti' wile.

¹¹Kukx lepch qine ti'j ex minti' in chin el tzpete ti'j b'e ma kyaj tyek'un weye.

¹²Kukx in che japun qe tley wu'ne ax ikx qe tmandamyent, ex mya aju wexe wajb'il.

¹³Ok in kub' t-ximan tu'n tb'ant jun ti'xti tu'n, in b'ant tu'n ex mi a'l jun jaku mayonte te.

¹⁴Aju ma kub' t-ximan tu'n tb'inchante wi'je, atzunju ok kb'antel tu'n, ex at mastl ximamaj tu'n ik tza'nx jlu.

¹⁵Kyja'tzun in chin xob'e twitz, noq o'kx ok wok tene ximal ti'j in tzaj nim t-xob'il wi'je.

¹⁶Ate Dios aju at tipumal tu'n tb'ant tkyaqil tu'n, ma tzaj b'aj nk'u'je tu'n, ex ma tzaj t-xob'il wi'je.

¹⁷Noqwit b'a'n nkub' naje tu'n qlolj qonik'an ex tu'n nxi ewane tu'n.