Read kumam Job 24 Bible Online

Job 24 - kumam bible

Job 24

¹¿Tiqu'n minti' in tzaj tma'n Dios aju at tipumal tu'n tb'ant tkyaqil tu'n jtoj tu'n t-xi tb'incha'n kyi'j xjal, tu'ntzun tok kyke'yin qeju in che niman te?

²Qe xjal mya b'a'n in b'aj kych'expu'n kymojonil tx'otx', in xi kyelq'a'n kyẍne'l xjal tu'ntzun tchmet kyb'aj qe kyẍne'l;

³nne'l kyi'n kybur qe k'wa'l minti' kyman ex kytxu' ex nne'l kyi'n kywakẍ qe meb'a xu'j te prent.

⁴Nne'l kylajo'n qe meb'a xjal tuj b'e, ex tu'n jlu in xi kyewan kyib' qe meb'a xjal kywitz.

⁵Qe meb'a ik kyten ik tza'n qe bur te tjaq' k'ul ate' tuj tzqij tx'otx', nim in che aq'nan tu'n tknet kywa, ex atzun tuj tzqij tx'otx' in knet kywa kyk'wa'l.

⁶In che'x sukwil triw tuj kykojb'il xjal, ex sukwil twitz uva tuj kytx'otx' xjal mya b'a'n.

⁷Nne'x aq'b'il kyu'n minti' jun kyxb'alun tok te txayb'il kyi'j; kukx in kub' kyapa'n che'w.

⁸In che ak' tu'n jb'al in kub' twi witz, ex in che'x xmujil t-xe pik.

⁹Qe xjal mya b'a'n in xi kyi'n qe tal ne' kukx kych'u'n, kyal qe meb'a xu'j, ex nne'l kyi'n kyk'wa'l qe xjal meb'a tu'n tlaj minti' in chjet kyk'as.

¹⁰Qe xjal meb'a in che b'et minti' kyxb'alun tok. O'kx in che iqan kytriw xjal, atzun kye nim we'yaj nnik'x kyu'n.

¹¹In che che'n ti'j twitz olivo tu'n tb'ant aseyt kyu'n; in che wab'an ti'j twitz uva tu'n tb'ant kyk'a xjal vin, ex atzun kye nim txqetle'n nnik'x kyu'n.

¹²Tuj tnam in che oq' ex in che ayin kyuwxix wen aqeju ch'ix kykyim, atzunte Dios minti' in tzaj tb'i'n kyna'j Dios.

¹³At junjun xjal nne'l kyik'un aju spik'un ex tuj tkyaqil kyb'e nne'l kypa'n kyib' ti'j.

¹⁴Atx qwitz in jaw we' aju b'yol xjal tu'n tkub' tb'yo'n ju meb'a, ex ok ttzaj qlolj nno'k ten elq'al.

¹⁵Aju xjal aj pajil noq yo'n tu'n ok tok qax ex oktzun nno'k tmaqsi'n twitz, tuj t-ximb'etz qa mi a'l jun jaku tz'el tnik' ti'j.

¹⁶Qe eleq' nno'kx kylaku'n t-xe kyja xjal qonik'an. Kykyaqil jlu kyewan kyib' q'ijl; kyk'i' tu'n kyten tuj spik'un.

¹⁷Aju t-spik'umal q'ij ik tten te kye ik tza'n qlolj nimxix; mas b'a'n tuj kywitz tu'n kyb'et qonik'an, porke minti' t-xob'il kyi'j.

¹⁸Aju xjal mya b'a'n in xi iqan tu'n a' in b'et kyuw wen. Aju ttx'otx' in tzaj qanin mya b'a'n tib'aj, ex mi a'l in aq'nan ti'j tqan t-uva.

¹⁹Ik tza'n in kub' ulj ttxa che'w tu'n ta'w kyaq; kyja'xtzun in kub' naj xjal aj il tuj muqb'il.

²⁰K'ik'el tna'njtz tu'n ttxu'; ex kb'ajel wa'n kyu'n ẍuq', ex mi a'l jun ktzajel na'nte te. Aju xjal mya b'a'n knajel ik tza'n jun tze' ok nnik' tx'emin.

²¹O k'ixb'isan kyi'j qe xu'j mib'an che alin ex kyi'j qe meb'a xu'j; ex minti' onin kyi'j.

²²Atzunte Dios, tu'n tipumal in che kub' t-xitun qe xjal at nimxix kyipun; ok tkawin Dios kyib'aj mi a'l jun xjal segur ta' tchwinqlal twitz.

²³In xi tq'o'n Dios amb'il kye tu'n kyanq'in tuj txub'txaj, ex tok tkwent ti'j tza'n in che b'et twitz.

²⁴Aju xjal in jaw tniman tib' noq ch'in tuj in ten, jurat in kub' naj. Ik tten ik tza'n k'ul in tzqij ok in jatz b'aqo'n, ex ik tza'n twi triw in kub' paqtz'u'n.

²⁵Ex qatzun mya ik ttenju, ¿alkye jun jaku tma weye qa noq tten wu'ne, ex tu'n ttzaj tma'n qa ma chin tzpete ti'j?