Read kumam Job 27 Bible Online

Job 27 - kumam bible

Job 27

¹Kukx yolin Job ex tma:

²Kxel nma'ne jun yol axix tok twitz Dios aju at tipumal tu'n tb'ant tkyaqil tu'n, aju tk'i' txi tb'incha'n wi'je ex ma tzaj tq'o'n nimxix b'is wi'je.

³Akux in tzaj tq'o'n wipune tu'n wanq'in ch'intle,

⁴mlay chin nik'ane yol ex mlay che'x nma'ne qe yol mya ax tok.

⁵Akux itz'x qine, kukx kxel nma'ne minti' wile; mlay txi nnimane qa at ttxolil kyyole.

⁶Mlay txi nkoline tu'n t-xi nma'ne qa tz'aqlxix qine, porke in tma'n wanmiye minti' wile.

⁷Aju nno'k tq'on tib' te aj q'oj wi'je, tzajxwit tcastiw ik tza'n kycastiw xjal mya b'a'n ex mya tz'aql.

⁸Aju xjal aj il minti' jatum tu'n tok qe' tk'u'j ok tel q'i'n tchwinqlal tu'n Dios.

⁹Ok ttzaj xitb'il ti'j, mlay che'x tb'i'n Dios qe tkub'sb'il.

¹⁰Porke mya ta' ttzalajb'il ti'j Dios aju at tipumal tu'n tb'ant tkyaqil tu'n, ex mi jun maj in kub'san twitz.

¹¹Kxel nyek'une kyeye aju nimxix tipumal Dios ex alkye qe t-ximb'etz Dios, aju at tipumal tu'n tb'ant tkyaqil tu'n.

¹²Ex qatzun kykyaqile o kyile, ¿tiqu'ntzun in tzaj kyma'ne qe yol minti' kyajb'en?

¹³Qe xjal jawni ex mya b'a'n, b'anin kycastiw tu'n Dios aju at tipumal tu'n tb'ant tkyaqil tu'n;

¹⁴maske nimku kyb'aj kyk'wa'l, che kymel tuj q'oj ex mi'n knet kywa.

¹⁵Qeju che kyjel anq'in che kymel tu'n tx'u'j yab'il ex mlay che oq' kyxu'jil kyi'j.

¹⁶Aju xjal mya b'a'n, maske b'aj tchmo'n nimxix saq pwaq ik tza'n tx'otx', ex maske ten nimxix t-xb'alun,

¹⁷pero jun xjal b'a'n tmod k'okel xb'aluminte kye qe xb'alun lu, ex ju saq pwaq lu k'ajb'el tu'n jun xjal b'a'n tmod.

¹⁸Aju tja ju xjal mya b'a'n jaku kub' xitj, mer ik tza'n tq'u' jun chyu'j ex mer ik tza'n tpach jun xjal kwentil awal.

¹⁹At tq'inumab'l ok tkub' koẍe' mankb'il maj, pero ok tel twatl minti'tl at te.

²⁰Ktzajel nimxix t-xob'il ti'j, ik tza'n t-xob'il ok in ch'iy a', atzun te qonik'an kxel q'i'n tu'n nintz kyq'iq'.

²¹K'eletz jawo'n tuj tja tu'n nintz kyq'iq' in tzaj tuj tjawitz q'ij;

²²K'okel jub'an tu'n nintz kyq'iq' ex mlay tzaj q'aq'an tk'u'j Dios ti'j, maske jyon tumel tu'n ttzoqpaj.

²³Che tzalajel xjal tu'nju otoq tzaj mya b'a'n ti'j, che okel ten xjal xmayil ti'j ok tetz oq tuj tja.