Read kumam Job 28 Bible Online

Job 28 - kumam bible

Job 28

¹At jul tjaq' tx'otx' jatum in jatz saq pwaq, ex at lugar jatum in b'aj saqset q'an pwaq.

²Aju ttx'otx'il k'uxb'il, a in jatz tuj tx'otx' ex ok tokx q'o'n ab'j tuj q'aq' in kub' ulj ex nno'k te q'an k'uxb'il.

³Kyu'n xjal knet tumlal tza'n tten tu'n tten spik'un tuj qlolj, in che ku'x max t-xe'pun tx'otx' tuj qlolj ex atzun ma chixin in che ok ten jyolte qe ab'j.

⁴In che ku'x ti'j jun saqb'aq tuj jul ex in ku'x kylaku'n toy' jul kyuj qe lugar jatum minti' jun xjal najl, jatum minti' jun xjal nnik' b'et ex puro najchaq ti'j tnam.

⁵Tib'aj tx'otx' in tzaj ch'iy triw, atzun tujxi, mer ik tza'n nojni tu'n q'aq'.

⁶Atzun in che knet qe tal ab'j zafiro kyb'i, tuk'ix q'an pwaq, t-smon tib' tuk'il tx'otx'.

⁷Mi qe q'anjan, mi qe k'utz, b'ajx kyil qa at jun b'e tjaq' tx'otx'.

⁸Qe txkup ate' tjaq' k'ul minti' in che ik' b'et tuj, ax ikx qe b'alun.

⁹Nne'tz kyi'n xjal qe ab'j kyuwxix tu'n kyq'ab', ex in b'aj kylaku'n tuj kyk'u'j witz.

¹⁰In che jaqet qe toy' pik kyu'n, ex tkyaqil txkaj q'inumab'l in knet kyu'n.

¹¹In che maqet qe nima kyu'n jatum in che tzaj jlet, ex nne'tz kyi'n tuj spik'un qe ti'xti ate' tuj ewaj.

¹²Pero ¿Jatum in tzaj aju nab'l? ¿Alkye lugar ta' aju ojtzqib'l?

¹³Minti' b'a'n kyu'n xjal jte' twi' ju nab'l, ex mlay knet kyu'n tzalu twitz tx'otx'.

¹⁴Aju nintz mar in tma'n: Minti' at tzalu, ax ikx in tma'n mar: Minti' at wuk'ile.

¹⁵Mlay chjet tu'n q'an pwaq ex mlay laq'et tu'n saq pwaq.

¹⁶Mlay b'ant tchjet tu'n q'an pwaq tb'anilxix, ex mi kyu'n qe tal ab'j tb'anilxix, qe cornalina ex qe zafiro kyb'i.

¹⁷Mas wi'yilxix twitz q'an pwaq ex twitz ju ab'j cristal tb'i; mlay b'ant tch'expunjtz kyuk'il qe makb'il q'an pwaq kytx'otx'il.

¹⁸Aju nab'l mas tb'anilxix twitz ab'j coral tb'i, twitz ab'j cristal tb'i ex kywitz qe tal ab'j perla kyb'i.

¹⁹Aju ab'j at tuj Etiopía, topacio tb'i, mlay pon ik tza'n nab'l, ex mlay b'ant tchjet tu'n q'an pwaq tb'anilxix.

²⁰¿Jatumtzun in tzaj aju nab'l? ¿Alkye lugar ta' ju ojtzqib'l?

²¹Ewan kywitz qe txkup ate' tjaq' k'ul ex kywitz qe chyu'j in che lipan twitz kya'j.

²²Ax ikx in kyma'n aju kynajb'il kyimni ex ju kamik: Noq ch'in tqanil o qb'iye ti'j jlu.

²³Pero ate Dios tzqilte b'e jatum ta' nab'l, o'kx te b'a'n tu'n jatum in knet,

²⁴porke in til Dios max jatum ponin b'aj ttxa'n tx'otx' ex in til tkyaqilju at tjaq'xi kya'j.

²⁵Tej t-xi tq'o'n Dios talil kyq'iq' ex tej tkub' tq'o'n kymojonil qe nintz mar,

²⁶tej tkyaj b'ant tu'n tza'n tten tu'n ttzaj jb'al, ex tej tkyaj tq'o'n tb'e q'ankyoq,

²⁷ax ikx o til Dios tz'aqlxix te nab'l tu'n tajb'en, b'aj tke'yin ex tma: B'a'n aju nab'l.

²⁸Xi tma'n Dios kye xjal: Aju tu'n kynimane weye, atzun nab'lju; aju tu'n tel kypa'n kyib'e ti'j ju mya b'a'n, atzun ojtzqib'lju.