Read kumam Job 3 Bible Online

Job 3 - kumam bible

Job 3

¹Tzyettzun tyolin Job ex xi' tyol ti'j ju q'ij tej tul itz'j ex tma:

³—Kuchiwt tu'n tnaj ju qonik'an tej wok tene tuj talb'il ntxu'ye, ex kuchiwt tu'n tnaj ju q'ij tej witz'je.

⁴Noqwit ok ju q'ij te qonik'an tej witz'je ex noqwit ik' tna'l tu'n Dios tu'n mi'n tjawil q'ij.

⁵Noqwit ok yupj tu'n txqan q'eq muj ex b'i'xwit okx naj tuj, ex noqwit yupj twitz q'ij tu'n ttzaj xob'ajil.

⁶Noqwit b'i'x xi naj ju qonik'an lu tuj qxopin ex minti'wt ok tajlal kyxol qe txqantl q'ij te xjaw ex te ab'q'i.

⁷Noqwit minti' e itz'j k'wa'l tuj qonik'an lu, ex noqwit minti' jaw tq'ajq'ajel kywi xjal tu'n tzalajb'il tej tul itz'j jun ne'.

⁸Noqwit otoq txi' kyyol qe aj q'ij ti'j ju q'ij lu, aqeju b'a'n txi niman kyyol tu'nju nintz txkup at tuj mar, Leviatán[1] tb'i.

⁹Noqwit minti' e k'ant qe che'w te prim lu, ex noqwit minti' jawil q'ij aju in che ayon xjal ti'j, ex minti'wt tzaj t-xe kya'j.

¹⁰Kuchiwt tu'n tnaj ju qonik'an lu, aju o taq' amb'il tu'n witz'je, tu'nju minti' mayet tu'n aju k'ixk'oj ma tzaj wi'je.

¹¹¿Tiqu'n mi in kyime tuj talb'il ntxu'ye, ex tiqu'n mya b'i'x in kyime texju or tej witz'je?

¹²¿Tiqu'n in kub' q'o'ne twi tqan ntxu'ye, ex tiqu'n tzaj q'o'n nch'u'ye tu'n ntxu'ye?

¹³Noqwit b'i'x in kyime tej wul itz'je, luwtlo qine in chin tan tuj txub'txaj ex luwtlo qine in chin ojlan tuj txub'txaj,

¹⁴kyuk'il qe rey ex kyuk'il qe txqantl xjal at kyoklen ttxlaj rey, aqeju in b'aj kyb'incha'n qe nmaq kypantyón,

¹⁵ex qa kyuk'il qe kawil, aqeju in b'aj kychmo'n nim q'an pwaq ex saq pwaq tuj kyja.

¹⁶¿Tiqu'n minti' in ku'x maqu'ne ik tza'n jun k'wa'l minti' in japun tq'ij tu'n tul itz'j, ex qa ik tza'n qe k'wa'l otoq che kyim ok kyul itz'j?

¹⁷Ok kyku'x maqut qe xjal b'inchal mya b'a'n, ya mlay che yajlantl kyi'j kyuk'il, ex qe xjal otoq che sikt wen, atzun in che ojlan.

¹⁸Atzun in che ten qe pres tuj txub'txaj, ex ya mi a'l caporal tu'n tyolin kyuw kye;

¹⁹atzun in che pon qe xjal ma' kyoklen ex qe ch'in kyoklen, ex ju majen tkyaj tjaq' tkawb'il patrón, atzun in tzoqpet.

²⁰¿Tiqu'n in tzaj tq'o'n Dios spik'un te xjal nim nnik'x tu'n?

²¹In ayon tu'n tkyim, ex minti'x in kyim; mas in jyon ti'j kamik twitzju q'inumab'l tku'x tjaq' tx'otx'.

²²Maxitzun ktzalajel xjal lu ok tku'x maqu'n.

²³Noq in takpaje' xjal tu'n Dios, porke maqo'n tb'e tu'n tuj tkyaqil pak'.

²⁴Minti' ch'in in chin wa'ne, noq o'kx in chin ayayane; ex ok in chin ayayane, mer ik tza'n tq'ajq'ajel txqan a' minti' in we' tu'n tq'ajt.

²⁵Tkyaqilju in chin xob'toqe ti'j ex aju mas tzaj t-xob'il wi'je, ma tzaj wi'je.

²⁶Minti' in chin ojlane ex minti' in chin tene tuj txub'txaj; minti' in chin tene tuj tzalajb'il, noq o'kx in chin yajlanjtze.