Read kumam Job 30 Bible Online

Job 30 - kumam bible

Job 30

¹Atzun ja'lo in che tze'n wi'je qe ku'xun mas k'wa'lxix qe nwitze ex minti'wt e k'met qe kyman wu'ne tu'n kyten kyuk'il qe tx'yan in che kwentintoq qe nẍne'le.

²¿Ti tajb'en weye aju kyaq'unb'en xjal lu? Ex minti'tl kyipun

³tu'nju we'yaj nim ex tu'nju minti' at kye. Te qonik'an el kytx'a'n tlok' tze' tzqij tuj tzqij tx'otx' minti' kynajb'il xjal tuj,

⁴in jatz kyb'aqo'n qe itzaj puro k'a kyxol qe txqantl k'ul, ex tuk'ix tlok' tal tze' retama tb'i in xi kywa'n.

⁵Ik'un kywitz kyu'n qe xjal ex in che sch'in qe xjal ok in che ok lpe' kyi'j, mer ik tza'n eleq' qe;

⁶in che najan kyuj qe tqan xaq ex kyuj qe toy' pik ex kyuj jul.

⁷In che tzanun tjaq' k'ul ik tza'n qe txkup ok tok kychmon kyib' tjaq' k'ul.

⁸Qe xjal lu minti'x kyajb'en, mya kyajlal qe tuj tnam, o che etz lajo'n kyu'n xjal.

⁹Atzun ja'lo in che xmayin wi'je ex in chin ok kyq'o'n te kytzeb'l.

¹⁰Ma chin el ik'une kyu'n ex in che el laq'e' wi'je ex nno'k kytzub'an tuj nwitze.

¹¹Ja'lo, tu'nju ma tz'el ti'n Dios wipune ex ma chin b'aj tk'ixb'isa'n, kyja'tzun minti' in che xob' nwitze.

¹²Nnu'l kychmon kyib' ntxlaje ex in chin kub' tz'aqe kyu'n, in che ok tzoqpaj wi'je ex nno'k tilil kyu'n tu'n nkub' kyb'yo'n.

¹³In kub' kymaqo'n tuj nb'eye tu'ntzun nkub' kyb'yo'n ex mi a'l jun nno'k mayonte kye ti'j.

¹⁴Mer ik tza'n ok in che okx tzoqpaj xjal tuj jun toy' muro katl, kyja'xtzun in che tzaj tzoqpaj wi'je tuk'il nim kyipun.

¹⁵Ma tzaj nimxix t-xob'il wi'je, ma tz'el woklene ik tza'n kyq'iq' in b'et; tkyaqilju at weye ma kub' naj ik tza'n muj.

¹⁶Mi'n wajtle tu'n wanq'ine; ma chin tzyete tu'n k'ixb'isab'l.

¹⁷Ma pon ta'w max kyi'j qe nb'aqile; minti' jun aq'b'il miwt in chin k'ixb'isanjtze.

¹⁸Ti'j nqule ma chin tzaj tzyu'ne tu'n Dios ex tu'n tipun ma b'aj tchito'n nxb'alune.

¹⁹Ma chinx t-xo'n tuj xoq'l, mer ik qine ik tza'n quq ex ik tza'n tza'j.

²⁰In chin qanine onb'il teya Dios, ex minti' in chin tzaj ttzaq'we'na, in chin kub'sane twitza ex minti' in chin tzaj tb'i'na.

²¹Kyuwxix ma chin b'aj tk'ixb'isa'na ex ma tz'ok tzoqpaja wi'je tuk'il nim tipumala.

²²In tq'o'na amb'il tu'n nxi iqane tu'n kyq'iq', ex tu'n nb'aj chito'ne tu'n kyq'iq' jb'al.

²³B'a'n wu'ne taja tu'n nkyime, tu'n npone tuj lugar b'animaj kye kykyaqil xjal.

²⁴¿Baqa minti' o chin onine kyi'j qe meb'a ex o che klet wu'ne tuj kymeb'ayil?

²⁵¿Baqa minti' o chin oq'e ti'j xjal nnik'x k'ixk'oj tu'n, ex baqa minti' o tzaj q'aq'an nk'u'je ti'j xjal minti' at te?

²⁶In chin ayontoqe tu'n ntene tuj tzalajb'il, ex te t-xel jlu, tzaj ju mya b'a'n wi'je; in chin ayontoqe ti'j spik'un, ex te t-xel jlu ul ju qlolj.

²⁷Aju wanmiye in putin ex minti' ojlab'l te, o'kx b'is in ayon wi'je.

²⁸B'isb'ajil atine tuj nchwinqlale, minti' in chin exe ti'j tqan q'ij; in chin qanine onb'il kywitz kykyaqil xjal.

²⁹Ma chin oke mer ik tza'n kyerman qe xo'j ex ik tza'n kyamiw qe chyu'j avestrúz kyb'i.

³⁰Aju ttz'umal nximlale ma tz'ok q'eq ke'yin ex nim in julin wi'je tu'n ta'w kyaq.

³¹Aju kyq'ajq'ajel qe chnab' arpa ex xux ma tz'ok te weye te k'ixk'oj ex oq'el.