Read kumam Job 31 Bible Online

Job 31 - kumam bible

Job 31

¹O kub' nq'o'ne jun nleye ax wi'je, tu'n mi'n tpon nk'u'je ti'j jun q'apoj.

²¿Alkyetzun chojb'il in tzaj tuj kya'j kye xjal, tu'n Dios aju at tipumal tu'n tb'ant tkyaqil tu'n?

³¿Mya'petzun tib'ajx ju xjal b'inchal mya b'a'n ex ju xjal aj il in kub' tz'aq ju mya b'a'n?

⁴¿Minti'petzun in ke'yin Dios ti'j ju in nb'incha'ne, ex minti'petzun nno'k tq'o'n kwent ti'j tza'n in chin b'ete?

⁵In nma'ne axix tok, minti' ma b'ant nnik'ane yol, ex minti' jun xjal ma tz'ok nnik'ane ti'j tu'n tkub' nsb'u'ne.

⁶B'a'n tu'n woke tuj balans tz'aqlxix tu'n Dios ex atzun k'elel tnik' wi'je qa minti' wile.

⁷Qa ma tz'el npa'n wib'e ti'j ju b'e axix tok, qa ma pon nk'u'je ti'j jun ti'xti ex qa ma tz'el knet jun ti'xti tuj nq'ab'e mya weye,

⁸e tnik'b'en juntl ti'j ju awal o ku'x wawa'ne ex e tjatz b'aqet aju awal o ku'x wawa'ne.

⁹Qa o txi nnimane tyol jun xu'j tu'n nkub' tane tuk'il, ex qa o chin kub' tene xq'uqil ti'j t-xu'jil nvesine tu'n tetz wi'ne,

¹⁰b'a'n tu'n tok nxu'jile te tmajen juntl ex b'a'n tu'n tkub' tan juntl xinaq tuk'il.

¹¹Noqwit ikju, puro ch'ixb'ajilwitlo nb'inchb'ene, ex tuj tumelxlo tu'n tkub' ncastiwoye.

¹²Iklo tten aju nb'inchb'ene lu ik tza'n jun q'aq' in b'aj tz'e'y nimku tu'n ex jakulo naj tkyaqilju at weye tu'n.

¹³Tej ttzaj kyma'n qe nmajene weye ti'j jun ti'xti minti' kub' tuj kywitz, tkyaqil maj xi nnimane aju kyqanb'etz.

¹⁴¿Alkyetzun juntl tumlal tu'n nyek'unte wib'e twitz Dios? ¿Alkyetzun ntzaq'web'le te ok ttzaj tqanin weye ti'j ju nb'inchb'ene?

¹⁵Axte Dios o b'inchante qeye tuj talb'il qtxu'ye; tza'nx o txi tq'o'n kychwinqlal qe nmajene, ikx weye o tzaj tq'o'n.

¹⁶Minti' kub' nxk'ayine tu'n t-xi nq'o'ne aju at tajb'en kye meb'a, ex minti' waq'e amb'il tu'n tik'x we'yaj kyu'n qe meb'a xu'j.

¹⁷Minti' in kub' tene wa'l ti'j nwaye junx weye, ax ikx xi nsipane kye meb'a k'wa'l.

¹⁸Atxix tej k'wa'l qine o nb'inchaye b'a'n kye meb'a k'wa'l, ik tza'n aqine kyman, ex kukx in koline kyi'j qe meb'a xu'j.

¹⁹Tej tok nke'yine qa at jun kyja'toq tkyim tu'n tlaj minti' t-xb'alun ex qa at jun meb'a minti' txayb'il te,

²⁰ax kylan qe nẍne'le xi nq'o'ne te kyxb'alun tu'n kymeq't ex o tzaj kyq'o'n chjonte weye ti'j jlu.

²¹Minti' ok nq'o'ne nq'ab'e ti'j jun meb'a noq tu'nju wamiw wib'e kyuk'il qe jwes.

²²Ex qatzun mya ax tok jlu, tu'n jlu b'a'n tu'n kyb'aj toqj qe nq'ab'e ex e kyel tz'aq kyi'j qe nsemile.

²³Noqwit minti' in xob'e twitz ju castiw tu'n Dios, minti'wtlo ẍin we'ye twitz, tu'nju ma' toklen.

²⁴Mya ti'j q'an pwaq o qe' nk'u'je ex minti' kub' nximane tu'n ntene segur tu'n.

²⁵Aju tzalajb'il at weye, mya tu'nju at nim nq'inumab'le ex mya tu'nju at nim pwaq wuk'ile.

²⁶Tej twile aju q'ij in k'ant ex aju xjaw in b'et tb'anilxix che ke'yin,

²⁷minti' ma chin k'ulune kye tuj ewaj ex minti' ma tz'el ntz'ub'ane tuj nq'ab'e tu'n nq'olb'ene kye.

²⁸Noqwit ma b'ant jlu wu'ne, mas b'a'nwitlo tu'n tkub' ncastiwoye, ex qa in chin k'ulune kye, tu'n jlu in kub' wewane aju Dios at tuj kya'j.

²⁹Minti' o chin tzalaje ti'j mya b'a'n o tzaj kyi'j qe aj q'oj wi'je ex minti' o chin tzalaje tej ttzaj jun b'is kyi'j.

³⁰Minti' o tzaj nqanine jun castiw kyib'aj, ex minti' o wajb'eye tu'n ttzaj kamik kyi'j.

³¹Qa at jun kyxol qeju e ten wuk'ile o tajb'e tu'n tb'inchante jun mya b'a'n ti'j jun stranjer xjal,

³²minti' jun stranjer xjal kyaj nq'o'ne tuj cay te qonik'an. Xi nq'o'ne kyposad qe b'etin xjal.

³³Minti' ma kub' wewane npaltile, ik tza'n in kyb'incha'n junjun xjal, ex minti' ma nb'inchaye tu'n tten jlu wu'ne tuj ewaj

³⁴noq tu'n tlaj nxob'ile kywitz xjal. Minti' ma tz'okx nlamon wib'e t-xe ja tu'n mi'n nq'ajte noq tu'n mi'n wel ik'une kyu'n qeju at nxilene kyuk'il.

³⁵¿Minti'pe jun xjal in b'in ti'j nyole? Aju in xi nma'ne, axix tok tkyaqil jlu. Ja'lo b'a'n tu'n ttzaj ttzaq'we'n Dios ju nyole, aju Dios at tipumal tu'n tb'ant tkyaqil tu'n. Aju aj q'oj wi'je b'a'nwt tkub' ttz'ib'an alkye wile tuj twitz,

³⁶ex jakulo txi wi'ne tu'n tkyaqil nk'u'je ex jakulo tz'ok te weye ik tza'n jun coron in ajb'en te jun techal te nimb'il ok kjawix tuj nwi'ye.

³⁷Jakulo txi nq'o'ne tajlal tkyaqil nb'inchb'ene twitz Dios ex jakulo chin pon laq'e'ye ttxlaj minti' nch'ixwiye.

³⁸Qa in tma'n ntx'otx'e qa at jun mya b'a'n o nb'inchaye ti'j, ex qa in che oq' qe surc tu'nju in che b'isun;

³⁹ex qa atku jun o tz'el welq'ane twitz tawal, ex qa o che kub' nyajla'ne qe aq'nal twitz tx'otx',

⁴⁰ex b'a'n tu'n ttzaj tpoq'sa'n ntx'otx'e ch'i'x k'ul te t-xel triw ex ju k'ul mya b'a'n te t-xel sebad, chi Job. Ex atzun pon b'aj tyol Job te tkolb'il tib'.