Read kumam Job 32 Bible Online

Job 32 - kumam bible

Job 32

¹Tej tkyil qeju ox xinaq kukx in tma'n Job qa minti' til, xi kykolin tu'n kyyolin tuk'il.

²Attoq jun xinaq Eliú tb'i, tky'ajal Baraquel aju aj Buz ex tiyjil Ram, tzaj tq'oj ti'j Job tej tb'inte kukx in tma'n Job qa tz'aqlxixte, atzunte Dios mya tz'aqlxix tuj twitz Job.

³Ax ikx tzaj tq'oj kyi'j qeju ox tamiw Job, tu'nju minti' knet tumel kyu'n tza'n tten tu'n kytzaq'wet tyol Job kyu'n, o'kx otoq kyma qa at til Job.

⁴Tu'nju mas ku'xuntoq Eliú kywitz qeju ox tamiw Job, kub' tyo'n tej kyb'aj yolin.

⁵Pero tej tke'yinte ya minti'tl b'ant ttzaq'wet tyol Job kyu'n, tzajtzun tq'oj,

⁶ex tzyettzun tyolin kyja': Tu'nju ku'xunx qine ex atzun kyeye tij xjal qeye, kyja'tzun in chin xob'toqe tu'n t-xi nma'ne alkye weye nximb'etz.

⁷Kub' nximane kyja': E kyyolin qeju at nim kyojtzqib'l, e ttzaj kyyek'un tij xjal kynab'l ma kyk'am tuj nimku ab'q'i.

⁸Ax ikx kykyaqil xjal at kynab'l, porke ate Qman aju at tipumal tu'n tb'ant tkyaqil tu'n o tzaj tq'o'n kychwinqlal tu'n tten kynab'l.

⁹Mya tu'nju nim tab'q'iyil jun xjal at tnab'l, ex mya tu'nju tij xjal nne'l tnik' ti'j alkyeju tz'aqlxix.

¹⁰Kyja'tzun ma txi nma'ne: Chin kyb'intze, ax ikx weye at kab'e nyole tu'n t-xi nma'ne.

¹¹Ma chin kub' txule'ye b'ilte ex ma nb'iye kyyole xi kyma'ne. Ma nb'iye tej in che jyontoqe alkye yol tu'n t-xi kyma'ne,

¹²ax ikx ma wile mi a'l jun kyeye ma knet tumel tu'n tza'n tten tu'n tb'ant ttzaq'wet tyol Job.

¹³Tu'ntzun mi t-xi kyma'ne qa at-xix kynab'le, ate Dios kxel tzaq'wente tyol Job ex mya jun xjal.

¹⁴Pero minti' jun yol ma tma Job wi'je, ex mya ax qe yol che xel ntzaq'we'ne te ik tza'n kyeye ma txi kyma'ne.

¹⁵Aya Job, aqeju ox xinaq lu ma naj kynab'l ex minti' in knet yol kyu'n tu'n ttzaq'wet tyola kyu'n.

¹⁶¿B'a'npe kukx tu'n wayontle, yake ma txi kykolin tu'n kyyolin tu'nju minti' ma knet tumel tu'n ttzaq'weta kyu'n?

¹⁷Ax ikx weye chin yolile ti'j ju yol in che yolin ti'j ex kxel nma'ne aju b'a'n wu'ne.

¹⁸Nim yol at wuk'ile ex mlayx tzik'x wu'ne tu'n mi'n t-xi nma'ne.

¹⁹Ik in tene ik tza'n jun bols tz'u'm ak'aj ex ch'ix tel tzaqj tu'n ta'l twitz uva minti' jatum tu'n tetz.

²⁰Ok chin yolile tu'ntzun tjatz b'aj nyole ex kxel nq'o'ne jun yol te tzaq'web'l teya.

²¹Mlay txi nma'ne jun yol mejorxix tponlen noq tu'n tkub' nsb'u'ne jun xjal, parej chin yolile kyi'je.

²²Ax tok, mya naq'l qine tu'n tkub' nsb'une jun xjal tu'n mejor yol, ex qa ma nb'inchaye ikju, jaku kub' ncastiwoye tu'n Dios aju ch'isal weye.