Read kumam Job 33 Bible Online

Job 33 - kumam bible

Job 33

¹Kyja'tzun b'intza qe nyole Job; q'o'nk twi'ya ti'j yol kxel nma'ne teya.

²Lu ma b'ant tten yol tu'n t-xi ntzaq'we'ne teya:

³Axix tok aju chin yolile ti'j, kxel nma'ne aju axix tok b'a'n wu'ne.

⁴Ate T-xew Dios aju at tipumal tu'n tb'ant tkyaqil tu'n, kub' b'inchante weye ex tzaj tq'o'n nchwinqlale.

⁵Chin ttzaq'wentza, qa jaku chin tzaq'wete tu'na; b'incham ttena tu'n tyolina wuk'ile.

⁶Aya ex aqine junx elni qo' tuj twitz Dios; ax ikx weye ti'j tx'otx' in b'ante.

⁷Kyja'tzun mi'n jaw xob'a nwitze, ex mlay chin kawine kyuw tib'aja.

⁸O nb'iye tej tmanteya qe yol lu, chiya:

⁹Sakxix qine ex minti' wile, minti' npaltile ex minti' il o nb'inchaye.

¹⁰Atzunte Dios in jyon tumel alkye tu'n tok t-si'man wi'je ex in chin ok tq'o'n ik tza'n aj q'oj ti'j;

¹¹ma che ok tk'alo'n qe nqane tu'n caden ex nno'k tq'o'n tkwent ti'j tza'n in chin b'ete, chitzuna.

¹²Pero tkyaqil aju in tkyuwsa'na mya tuj tumel, porke ate Dios mas ma' toklen kywitz xjal.

¹³¿Tiqu'n nno'k tma'na tib'aj twitz tu'nju minti' in che tzaj tzaq'we'n qe tyola tu'n?

¹⁴Ate Dios in yolin tuj nimku tumel, atzun qe minti' nne'l qnik' ti'j.

¹⁵At maj in yolin qonik'an tuj jun witzik' ex qa in tzaj tyek'un mer ik tza'n tuj jun witzik' ok in che tan xjal ex ok in tzyet kyk'u'j tu'n watl.

¹⁶Nno'kx tjask'u'n Dios tuj kyẍkyin xjal, in che ok tmayo'n ex in tzaj kyxob'il tu'n,

¹⁷tu'ntzun kyel tpa'n kyi'j kyb'inchb'en mya b'a'n ex tu'n mi'n tjaw kyniman kyib'.

¹⁸Kyja'tzun in che klet tu'n tu'n mi'n kynaj, in che klet tu'n tu'n mi'n kykyim.

¹⁹At maj in kawin Dios kyi'j xjal, in tzaj tq'o'n yab'il kyi'j tuk'il nim ta'w tuj tkyaqil kyximlal.

²⁰Tkyaqil kychi', ikxpe aju mas k'ok'jxix, nne'l tik'un kyk'u'j.

²¹Nno'k tzqij kychib'jal kyi'j ex in kyaj q'anchalin qe kyb'aqil.

²²Ya ch'ix kykyim ex ch'ix kyxi q'i'n tuj muqb'il.

²³Pero kyxol jun mil anjel, qa at jun niqayin ta' ttxlaj tu'n tyolin ti'j ex qa ma txi tma'n te alkye tu'n tb'inchante,

²⁴qa ma tzaj q'aq'an tk'u'j ti'j ex qa ma txi tma'n te Dios: Kloma ju xjal lu tu'n mi'n tkyim porke ma knet chojb'il til wu'ne, qa chi,

²⁵k'eleltzun yab'il ti'j ex k'okel juntl maj ik tza'n tej ku'xunxtoq.

²⁶Ok kub'sal twitz Dios ex ktzajel b'i'n tu'n; ex tuk'il nim tzalajb'il k'okel kyke'yin kywitz tuk'il Dios ex kk'metel tu'n Dios juntl maj.

²⁷Kxe'ltzun tma'n kye xjal: O chin b'inchane il, o nb'inchaye aju mya tz'aqlxix, pero minti' kub' tq'o'n Dios ncastiwoye;

²⁸noqpe ma chin klete tu'n te kamik ex kukx tok nke'yine t-spik'umal q'ij.

²⁹Atzunju in tb'incha'n Dios kyi'j xjal nimku maj;

³⁰in che klet tu'n te kamik ex in xi tq'o'n amb'il tu'n kukx tok kyke'yin t-spik'umal q'ij.

³¹Chin tb'intza Job ex q'o'nk twi'ya ti'j nyole; txulekuya akux in chin yoline.

³²Qa at jun tyola tu'n ttzaj tma'na weye, chin ttzaq'wentza; qa ax tok tyola, jaku txi nma'ne qa tuj tumel in yolina,

³³pero qa minti' tyola, txulekuya b'ilte nyole, ex aqine chin xel xnaq'tzante teya tu'n tok tnab'la.