Read kumam Job 34 Bible Online

Job 34 - kumam bible

Job 34

¹Kukx o yolin Eliú ex tma:

²Aqeye at kynab'le ex xnaq'tzamni qeye, kyb'intze qe nyole.

³Aju ẍkyinb'aj b'a'n tu'n alkye t-xilen junjun yol, ik tza'n qk'o'n in tna'n qe tk'ok'jal.

⁴Ikxtzun tten jlu, b'a'n tu'n qximan ti'j alkye yol tz'aqlxix ex b'a'n tu'n tkub' qximan ti'j alkye b'a'n tuj qwitz.

⁵Chi Job in tkyuwsa'n kyja': Minti' wile, ex tk'i' Dios txi tb'incha'n wi'je.

⁶Qa ma txi nma'ne at wile, chin nik'ale yol; aju ẍil tok wi'je minti' in b'ant maske minti' o chin b'inchane il, chitzun.

⁷Mi a'l juntl ik tza'n te Job. Nim in xmayin ti'j Dios;

⁸at tgan tu'n tok tjunin tib' kyuk'il qe xjal b'inchal mya b'a'n ex tu'n tb'et kyuk'il qe xjal mya b'a'n qe.

⁹In tma'n: Minti' ch'in in tkamb'a'n ju xjal nno'k tilil tu'n tu'n ttzalaj Dios ti'j.

¹⁰Kyja'tzun, aqeye xjal at kynab'le chin kyb'intze. Ate Dios aju at tipumal tu'n tb'ant tkyaqil tu'n minti' in tb'incha'n jun mya b'a'n ex qa aju mya tz'aqlxix.

¹¹In tq'o'n Dios chojb'il te teyle junjun xjal ik tza'nx kyb'inchb'en; in kub' tq'o'n kycastiw xjal ik tza'nx kyb'inchb'en.

¹²Ax tok ate Dios aju at tipumal tu'n tb'ant tkyaqil tu'n minti' in tb'incha'n jun mya b'a'n, ex minti' in tb'incha'n aju mya tz'aqlxix.

¹³Mi a'l jun o tz'ok q'onte toklen tu'n tkawin tib'aj tkyaqil twitz tx'otx'.

¹⁴Qa ma tz'el ti'n kyxew qe xjal, aju in q'onte kychwinqlal,

¹⁵kykyaqil-lo che kymel ex che okel juntl maj te quq.

¹⁶Qa at tnab'la chin tb'intza; q'o'nk twi'ya ti'j nyole.

¹⁷Noqwit nne'l tik'un Dios aju tz'aqlxix, mlaywitlo b'ant tkawin. ¿Tza'ntzun tten in tma'na qa mya b'a'n aju in tb'incha'n Dios?

¹⁸¿Nno'kpe tma'n tib'aj kywitz qe rey ex qe xjal ma'xix kyoklen: Ploj kymodiye, mya b'a'n qeye?

¹⁹Minti' nno'k tke'yin aju kyxilen qe kawil, minti' in che tzaj t-xtalin mas qe q'inun kywitz qe meb'a, porke tu'n Dios e kub' b'incha'n kykyaqil.

²⁰Jurat naj in che kyim xjal tuj tmij aq'b'il, in che jaw tilj xjal ex in che kub' naj; qeju at nim kyipun in che naj, pero mya tu'n xjal in che kyim.

²¹Tok twitz Dios ti'j tza'n in che b'et xjal ex tok twitz ti'j jatum in che b'et.

²²Minti' jun qlolj qxopinxix jatum jaku txi tewan tib' jun xjal b'inchal mya b'a'n.

²³Mya il ti'j tu'n t-xi tma'n Dios kye xjal jtoj tu'n kypon xtisil twitz.

²⁴Ok nne'l ti'n Dios kyoklen qe xjal ma' kyoklen, mya il ti'j tu'n tb'aj t-xjelin alkye kyb'inchb'en, ex in xi tq'o'n kyoklen qe jlu kye txqantl.

²⁵Porke b'a'n tu'n Dios aju in kyb'incha'n; oktzun tok qonik'an in che naj tu'n.

²⁶Tuj lugar jatum b'a'n tu'n kyke'yin kykyaqil ti'j in che b'aj tasyalin, ik tza'n in che b'aj asyalin qe xjal mya b'a'n qe,

²⁷porke el kypa'n kyib' ti'j ex minti' o kyajb'e tu'n t-xi kyniman qe yol tu'n kyb'et tuj tumel.

²⁸E b'aj kyyajla'n qe xjal meb'a, atzun qe meb'a e ok ten na'l Dios ex o che tzaj b'i'n tu'n Dios.

²⁹Pero qa minti' in tzaj ttzaq'we'n Dios, ¿alkyetzun jaku q'mante qa mya b'a'n in tb'incha'n, qa minti' ma tzaj tq'o'n twi' ti'j kyyol xjal? Tok twitz kyi'j qe tnam ex kyi'j qe xjal,

³⁰tu'ntzun mi'n tkawin tuj tnam jun xjal mya b'a'n ex sb'ul.

³¹¿Baqa o txi tma'na te Dios: Ma chin tzpete ti'j ex mi'n chin b'inchane il juntl maj,

³²yek'untza weye alkye qe npaltile minti' nne'l nnik'e ti'j, qa at mya b'a'n o b'ant wu'ne, mlay nb'inchaye juntl maj? Chiwta.

³³¿Maj tajb'ila tu'n ttzaj tq'o'n Dios chojb'il teya ik tza'n tajb'ila ex maske otoq tz'el tik'una Dios? Axa kb'el ximante ex mya a qine, q'mantza aju b'a'n tu'na.

³⁴Qe xjal sek' kynab'l, aqeju in che b'in ti'j nyole, kyuk'ix qe xjal at kynab'l, ok kyma' weye kyja':

³⁵In yolin Job ti'j aju minti' nne'l tnik' tij; minti' kytxolil qe tyol.

³⁶B'a'n tu'n tok Job tuj malb'il, porke qe tzaq'web'l in tzaj tma'n, mer ik tza'n ttzaq'web'l jun xjal mya b'a'n.

³⁷Mya noq o'kx ma b'inchan Job il, ax ikx mib'an b'in; qwitzx nno'k ten xmayil ti'j Dios ex kukx tyolin ti'j Dios.