Read kumam Job 36 Bible Online

Job 36 - kumam bible

Job 36

¹Kukx ok ten Eliú yolil ex tma:

²Ten ch'intl tpasensa ex kxel nxnaq'tza'ne, ex atx txqantl yol tu'n t-xi nma'ne tu'n nkoline ti'j Dios.

³K'ajb'el wu'ne aju wojtzqib'le nimxix, tu'ntzun t-xi nma'ne qa ax tok aju in tma'n aju B'inchal weye.

⁴Kxel nkyuwsa'ne teya; mlay txi nma'ne jun nik'aj yol; lu qine wa'l twitza, aqine jun xjal at nimxix nnab'le.

⁵Ate Dios at nimxix tipumal ex at nimxix tnab'l, ex minti' nne'l tik'un aju xjal minti' til.

⁶Mlay kyaj anq'in ju xjal mya b'a'n tu'n, pero in xi tb'incha'n kyi'j qe meb'a xjal;

⁷kukx in kolin kyi'j qe xjal tz'aqlxix ex in che ok tq'o'n te kawil junx kyuk'il qe rey, ex nno'k tq'o'n ma'xix kyoklen.

⁸Pero qa k'alo'n qe tu'n caden, ex qa in che k'ixb'isanjtz tu'n ta'w,

⁹in xi tma'n Dios kye alkye il otoq kyb'incha ex tza'n tten otoq jaw kyniman kyib'.

¹⁰In yolin Dios kyuk'il tu'n tjiqumanjtz ti'j kynab'l ex in xi tma'n kye tu'n tkyaj kyq'o'n ju mya b'a'n.

¹¹Qa ma txi kyniman ex qa ma tz'okx kyq'on kyib' tjaq' tkawb'il, che tzalajel ex ok che tel tuj txub'txaj tuj ch'intl kyanq'ib'l atx.

¹²Pero qa minti' ma txi kyniman, che kymel ex minti'x otoq tz'el kynik' ti'j.

¹³In tzaj nimxix kyq'oj aj il; maske presin qe, pero minti' in che qanin onb'il.

¹⁴Ku'xunx qe ok kykyim ex aju b'ajsb'il te kychwinqlal ch'ixb'ajilxix.

¹⁵Aju xjal in k'ixb'isanjtz, in klet tu'n Dios tuj k'ixb'isab'l; ex tu'nju ta'w in tzaj, nne'l tnik' ti'j Dios.

¹⁶Ax ikx teya ok kletela tu'n Dios kyuj qe xob'ajil, ktzajel tq'o'n nimxix teya, ktzoqpetela tu'n, ex kb'ajel noj twi tmesa tu'n kyu'n qe chib'j tb'anilxix.

¹⁷Atzun ja'lo tib'aja ma japun b'aj t-sentens ju xjal mya b'a'n, ex mlay mayet tu'na qa ma tz'oka tuj xjel ti'j ex qa ma kub' t-sentensa.

¹⁸Kwentim tib'a tu'n mi'n ttzaj tk'mo'na kotzb'aj mya tuj tumel ex tu'n mi'n t-xi tq'on tib'a tu'n tb'inchanteya jun mya b'a'n noq tu'n tlaj nim pwaq.

¹⁹Ok ttzaj b'is ti'ja, mlay tz'ajb'en tq'inumab'la ex tipumala te onb'il teya.

²⁰Mi'n txi tachina tu'n ttzaj qonik'an ok in che kub' naj qe xjal tuj tnam.

²¹Q'onka kwent ti'j tu'n mi'n taj meltz'aja b'inchal mya b'a'n, porke tu'n jlu ma tzaj k'ixk'oj ti'ja.

²²Q'onk tkwenta ti'j tipumal Dios. Mi jun xnaq'tzal in pon ik tza'n te Dios;

²³mi a'l jun jaku q'mante te Dios alkye kb'antel tu'n, ex mi a'l jun jaku tz'ok q'mante te qa mya tuj tumel aju otoq tb'incha.

²⁴Kykyaqil xjal in jaw kynimsa'n aju taq'unb'en Dios; ax ikx teya tzulx tk'u'ja ti'j tu'n tjaw tnimsa'na.

²⁵Kykyaqil xjal jaku tz'ok kyke'yin, maske najchaq tzaj kyke'yin.

²⁶Ma'xix toklen Dios ex mlay tz'el qnik' ti'j; ax ikx mlay b'ant qajlan ti'j tab'q'iyil.

²⁷Tu'n Dios in tzaj tchmo'n junjun tz'uj a' tuj jun tkub'il, ex jurat nno'k tu'n te jb'al.

²⁸Nne'tz chitj jb'al tuj muj ex in kub' tilj twitz tx'otx'.

²⁹¿Alkye jun nne'l tnik' ti'j tza'n tten in b'et muj ex tza'n tten in q'ajt q'ankyoq twitz kya'j?

³⁰Tu'n Dios in tzaj qoptz'aj xle'laj kya'j tib'aj mar, atzun t-xe'pun mar b'i'x in kyaj qlolj tkyaqil.

³¹Iktzun tten in kawin Dios kyib'aj kykyaqil xjal ex in tq'o'n nimxix kywa.

³²Tuj tq'ab' Dios ta' q'ankyoq ex in pon ti'j jun ti'xti jatum taj Dios tu'n tpon.

³³Aju tq'ajq'ajel q'ankyoq in tq'o'n tqanil qa at tulel kyq'iq' jb'al, ex tu'nju tq'oj Dios in tzaj kyq'iq' jb'al.