Read kumam Job 37 Bible Online

Job 37 - kumam bible

Job 37

¹Ok t-xi nb'i'ne kyq'iq' jb'al in jaw putin wanmiye ex mer ik tza'n ch'ixmi in jatz oq.

²Kyb'inxe tq'ajq'ajel twi Dios nne'tz tuj ttzi'; in jululun ik tza'n q'ankyoq.

³In xi tqoptz'i'n Dios xle'laj kya'j tuj tkyaqil twitz kya'j, in tzaj tuj jun pak' ttxa'n tx'otx' tu'n tpon tuj juntl pak'.

⁴Jurat in b'injtz tq'ajq'ajel twi Dios, jun tq'ajq'ajel twi' ma'xix toklen; ex ok tb'injtz tq'ajq'ajel q'ankyoq, kukx in che tzaj qoptz'aj tqan q'ankyoq.

⁵Ok tq'ajt tq'ajq'ajel twi Dios, nimku tb'inchb'en ma'xix kyxilen in che b'ant tu'n, ex in tb'incha'n tb'inchb'en ma'xix t-xilen mlay tz'el qnik' ti'j.

⁶In tma'n Dios tu'n tkub' ttxa che'w tib'aj tx'otx' ex tu'nxte in tzaj nintz jb'al.

⁷Ex tu'n jb'al in che kyaj ten xjal tuj kyja, tu'ntzun tel kynik' ti'j qa tu'n Dios jlu.

⁸Qe txkup in che okx tuj kyjul ex atzun in xi kyewan kyib'.

⁹Tuj tnayaj q'ij in tzaj kyq'iq' jb'al ex tuj tb'anq'ab' q'ij in tzaj ta'w che'w.

¹⁰Tu'nju t-xew Dios in tzaj t-xupin, nno'k a' tu'n, te ttxa che'w ex qe a' ma'xix in che tuxix tu'n.

¹¹Tu'n Dios at a' tuj muj ex nne'tz tqan q'ankyoq tuj muj tu'n.

¹²Tuj tkyaqil twitz tx'otx' in lemtz'aj tqan q'ankyoq twitz kya'j, tu'n tjapun tu'n alkyeju in tma'n Dios.

¹³Tkyaqil jlu in ajb'en tu'n Dios tu'n ttzaj kycastiw xjal ex qa tu'n t-xi tyek'un t-xtalb'il kye.

¹⁴Chin tb'intza Job, ximana ti'j tkyaqil aju ma' t-xilen in b'ant tu'n Dios.

¹⁵¿B'a'npe tu'na tza'n tten in kawin Dios ti'j tkyaqil jlu, ex tza'n tten in qoptz'aj tqan q'ankyoq tuj muj?

¹⁶¿B'a'npe tu'na tza'n tten iqan muj tu'n kyq'iq'? A jlu jun techal ti'j tnab'l Dios tz'aqlxix.

¹⁷¿B'a'npe tu'na tza'n tten in meq't t-ximlala tuj t-xb'aluna ok in xupin kyq'iq' aju in tzaj tuj tnayaj q'ij?

¹⁸¿Jakupe b'ant tu'n tonina ti'j Dios tu'n t-xi kylik'pu'na kya'j, ex tu'n tkyaj ten minti' in yukch ik tza'n jun espej k'uxb'il?

¹⁹Qo t-xnaq'tzantza alkye b'a'n t-xi qma'ne te Dios, porke tuj qlolj ato'ye ex minti' b'a'n qu'ne.

²⁰Weye mlay nnimari wib'e tu'n nyoline tuk'il Dios, porke a jlu jaku tz'ajb'en te xitb'il weye.

²¹Mlay qil t-spik'umal q'ij ok nno'k qlolj twitz tu'n muj, qatzun ma tz'el xupin muj tu'n kyq'iq', atzunte kya'j in kyaj q'ancha'l.

²²Mer ik tza'n t-spik'umal q'an pwaq in yek'unjtz tuj tb'anq'ab' q'ij ok tb'aj txolin ti'j Dios tu'nju nimxix tajwalil.

²³Mlay qo kanun ti'j alkye t-ximb'etz Dios aju at tipumal tu'n tb'ant tkyaqil tu'n, porke ate kyuwxix ex tuj tjiqumal ti'j in b'ant tu'n noq alkye taj. Tz'aqlxix te Dios ex minti' in che b'aj tyajla'n qe xjal noq kukx.

²⁴Kyja'tzun in che xob' xjal twitz Dios; minti' kyxilen qe xjal at kynab'l tuj twitz.