Read kumam Job 38 Bible Online

Job 38 - kumam bible

Job 38

¹Tzajtzun yolin Dios tuj kyq'iq' jb'al ex tma:

²¿Alkyetzuna tu'nju in tma'na qa mya tuj tumel aju in kub' nximane ex aju in b'ant wu'ne? Ma tmaya qe yol minti' kynab'l.

³B'incham ttena qa ax tok tu'na, ex tzaq'wentza qe nxjele lu:

⁴¿Jatum ta'toqa tej tkub' nq'o'ne t-simyentil tx'otx'? Q'mantza weye qa b'a'n tu'na.

⁵¿B'a'npe tu'na alkye kub' ximante nik'pun tu'n tok, ex alkyeju aq'nal at nim tnab'l b'inchante te?

⁶¿Titzun tkub' tjaq' tq'uqb'il ex alkyetzun kub' q'onte nintz ab'j te tzuyb'il te,

⁷tej in che b'itzantoq kykyaqil qe che'w t-xe kya'j junx kyuk'il kykyaqil qe anjel in che tzalaj tuj kya'j?

⁸Tej tjatz tilj mar tuj tx'otx', ¿alkye ok q'onte tlamel tu'n twe'?

⁹Xi nq'o'ne muj te txayb'il te mar ex q'eq muj tu'n tb'aj b'oq'it tuj.

¹⁰Kub' nq'o'ne jun techal jatum tu'n twe' mar ex b'i'x ok nq'o'ne tal tlamel.

¹¹Ex xi nma'ne te: Atzun tzul we'ya tzalu ex o'kxtzun tzul we'ya, mlay tzik'a tib'aj ex atzun kpol b'aj pulin tipumala.

¹²¿Tuj tanq'ib'la ope txi tma'na jun maj tu'n ttzaj spik'e' t-xe kya'j ex tu'n tjawil q'ij,

¹³tu'ntzun tpon b'aj spik'un tuj tkyaqil twitz tx'otx' ex tu'ntzun tb'aj tchto'na qe b'inchal mya b'a'n?

¹⁴Q'ancha'lintzun tilb'ilal twitz tx'otx' ik tza'n ok nno'k tk'a' jun xb'alun.

¹⁵In kub' t-xk'ayin Dios spik'un kye qe b'inchal mya b'a'n ex atzun in pon b'aj twi'ylal tu'n kyb'inchante mya b'a'n.

¹⁶¿Ope txi aja ke'yilte max t-xe' nintz mar jatum in jatz jlet twi a'?

¹⁷¿Ope tzaj yek'un teya aju tlamel kynajb'il kyimni qloljxix wen?

¹⁸¿B'a'npe tu'na nik'pun twitz tx'otx'? Q'mantza weye qa ax tok b'a'n tkyaqil jlu tu'na.

¹⁹¿Jatum k'u'n spik'un ex qlolj?

²⁰¿Tzinpe in b'ant tu'na tu'n kyxi t-sama'na max t-xe kya'j ex tu'n kyajtz meltz'aj tu'n kyul tuj kyja?

²¹B'a'nlo tu'na ex baqa ne'xi tab'q'iyila; otoqlo itz'ja tej kyb'ant jlu.

²²¿Ope txi aja ke'yilte jatum k'u'n ttxa che'w wu'ne ex saqb'aqun,

²³tu'ntzun kytzaj nsama'ne tuj tq'ijlalil yajb'il ex tq'ijlalil ok tok q'oj?

²⁴¿Alkye b'e in xi ti'n tqan q'ankyoq ok tkub' qoptz'aj? ¿Alkye tumlal in b'aj t-sipan tib' kyq'iq' twitz tx'otx', aju in tzaj tuj tjawitz q'ij?

²⁵¿Alkye in jaqonte tb'e jb'al tu'n ttzaj nim? ¿Alkye in yek'unte tb'e tqan q'ankyoq ex kyq'iq' jb'al,

²⁶tu'ntzun ttzaj jb'al tuj tzqij tx'otx' jatum minti' xjal najl tuj,

²⁷ex tu'n ta'lin ti'j tzqij tx'otx', tu'ntzun ttzaj tpoq'sa'n cha'x k'ul?

²⁸¿Atpe tman jb'al ex atpe tman tq'ab' che'w?

²⁹¿Alkye ttxu' tq'ab' che'w ex alkye ttxu' nintz yelo?

³⁰¿Al u'n nno'k a' kyuw wen ik tza'n ab'j, ex nno'k tib'aj nintz mar kyuw wen tu'n?

³¹¿Jakupe b'ant tu'na tu'n kyok tk'alo'na jun k'loj che'w Pléyades kyb'i tu'n kyten junx? ¿Jakupe b'ant tu'na tu'n kyel tpju'na juntl k'loj che'w, Orión kyb'i, tu'n tel kypa'n kyib'?

³²¿Apeya nne'tz q'inte ju che'w jaqol t-xe kya'j ok tpon or tu'n tjawil? ¿Apeya ẍaqlul kye jun k'loj che'w Osa Mayor kyb'i ex juntl k'loj Osa Menor kyb'i?

³³¿Tzqi'npe tu'na aju ley tkub' kyib'aj qe che'w twitz kya'j? ¿Apeya in q'onte ju ley lu twitz tx'otx'?

³⁴¿Jakupe txi tma'na te muj tu'n ttzaj nim jb'al tib'aja tu'n?

³⁵Qa ma txi tma'na te tqan q'ankyoq tu'n t-xi' tuj juntl part, ¿jakupe tzaj ttzaq'we'n teya kyja': Lu qine lu, alkye taja tu'n tb'ant wu'ne, chipe?

³⁶¿Alkye xi q'onte nab'l tuj tanmi xjal? Alkye xi q'onte tojtzqib'l?

³⁷¿Alkye jun at nimxix tnab'l tu'n tel tnik' ti'j nik'pun muj at? ¿Alkye jun jaku tz'etz q'inte jb'al tuj muj tu'ntzun ttzaj tq'o'n jb'al,

³⁸tu'n tok tquqil tx'otx' te xoq'l ex tu'n kyok q'e't qe q'ub'in jun ti'j juntl?

³⁹¿Apeya in tzaj jyonte kykanb' qe ttxu b'alun tu'n kychyo'n qe tal ti'j okxi kynoj,

⁴⁰ok in xi kyewan kyib' tuj kyjul ex ok in che kub' ten xq'uqil tjaq' chk'ul?

⁴¹¿Alkye in q'onte kywa joj ok in che jyon qe kyal ti'j kywa ex in che q'ajt wen ok in che qanin kywa weye?