Read kumam Job 39 Bible Online

Job 39 - kumam bible

Job 39

¹¿B'a'npe tu'na alkye q'ij in che alin qe chip te tjaq' k'ul? ¿Ope tila ok in kub' kyal qe ttxu masat?

²¿B'a'npe tu'na jte' xjaw in japun kyu'n tu'n tkub' kyal?

³In che kub' b'une' ex in kub'tzun kyal.

⁴Ok kych'iy qe kyal ex ok tok kyipun in kyaj kykolin kytxu' ex minti'tl in che ul meltz'aj.

⁵¿Alkye el tzoqpinte te bur te tjaq' k'ul? ¿Alkye o tz'el qitpunte te?

⁶Aqine inx yek'unte tnajb'il tuj tzqij tx'otx' ex tuj chq'ajlaj minti' awal in tzaj ch'iy tuj.

⁷Tk'i' ti'j tq'ajq'ajel in jaw tuj tnam kyu'n xjal, ex mi tu'n t-xi tniman tq'ajq'ajel twi' lajol chej.

⁸In b'et tik' kywi' tal witz in jyon twa, in jyon ti'j noq alkye txkaj cha'x k'ul tu'n t-xi twa'n.

⁹¿Chipetzuna qa jaku tajb'e tor te tjaq' k'ul tu'n tajb'en teya ex tu'n tjawil tq'ij tuj tpe'na?

¹⁰¿Jakupe k'alet yuw ti'j tqul tu'na ex tu'n tok tq'o'na jwers ti'j tu'n tch'okin ex qa tu'n t-xi lpe' ti'ja tu'n tb'aj parejit twitz tx'otx'?

¹¹¿Jakupe tz'ok qe' tk'u'ja ti'j tu'nju at nim tipun ex tu'n tkyaj tq'o'na tu'n tb'inchante taq'una?

¹²¿Chipetzuna qa jaku tz'ajb'en tu'na tu'n tjaw chmet twitz tawala ex tu'n tok tchmo'na twitz tawala jatum nne'l b'ajut?

¹³Ex lu jun nintz chyu'j avestrúz tb'i, in che yukch qe tq'ab' tuk'il tzalajb'il mer ik tza'n tq'ab' garza,

¹⁴in che kyaj tq'o'n qe tjos tjaq' ttxa tz'a'n tu'ntzun kymeq't tu'n tkyaqal q'ij.

¹⁵Minti' in ximan ti'j qa tu'n kyb'aj pax qe tjos tjaq' tqan jun xjal ex qa tjaq' tqan jun jil.

¹⁶Puro jawni kyi'j qe tal, mer ik tza'n mya tal qe in che el tuj twitz, ex minti' in tzaj tb'is ti'j qa minti' ma tz'el b'a'n taq'unb'en.

¹⁷In b'ant jlu tu'n, tu'nju minti' xi nq'o'ne tojtzqib'l ex tnab'l.

¹⁸Ex ok in jaw we' ex ok tok ten qelel, nno'k ten tz'e'l kyi'j qe chej ex kyi'j qeju kyjax kyib'aj, ex mas kyuw ojqelan kywitz.

¹⁹Baqa aya o q'onte tipumal chej, ex ¿tu'npetzuna ok tq'o'na ttzmal tqul puro mejor ke'yin?

²⁰¿Baqa tu'na in b'ant tt'ikpaj ik tza'n ẍplon ok t-sjorin tuj ttxa'n puro xob'ajilxix?

²¹In jaw t-skatin tx'otx' tu'n tipun tuj chq'ajlaj ex minti' t-xob'il tu'n t-xi' ojqelan tuj q'oj.

²²In jaw tze'n ti'j ju xob'tzal ex minti' in tzaj tchi ti'j; minti' in tzaj b'aj tk'u'j twitz spad,

²³maske in swok'in aju tkub'il tplech xjal tjax tib'aj ex nne'l ky'ech ti'j lans ex kyi'j qe lans ch'in kyqan.

²⁴Tu'nju in ojqelan wen, minti' tilwi tuj twitz tu'n tpon naj tuj juntl lugar ex ok tq'ajt chun ya mlay kub' we' mastl.

²⁵Ok tb'inte tq'ajq'ajel chun, in tzaj sjorin ttxa'n; in tna'n naj t-xewil ok tok q'oj najchaq wen, ex in tb'i'n tq'ajq'ajel twi nejenel kye soldad ex ju sich' in jaw.

²⁶¿Apetzuna at nim tnab'la tu'n t-xi t-xnaq'tza'na tu'n tb'ant tlipan ju q'anjan ex tu'n t-xi lipan tuj tnayaj q'ij?

²⁷¿Tu'npetzuna xi tma'na te t'iw tu'n tb'inchante tq'u' kywi' nmaq witz?

²⁸Aju t'iw najl tuj tk'u'j xaq twitz pik ex in b'aj tb'incha'n jun kolb'il tib' twi' jun ttz'u'pil pik;

²⁹maxtzun ma jawni in tzaj tke'yin tkanb'.

³⁰Qe tal puro chik' kywa in b'aj, ex jatum ta' jun kyimni, atzun ta' t'iw.