Read kumam Job 4 Bible Online

Job 4 - kumam bible

Job 4

¹Tzyettzun tyolin Elifaz aju aj Temán ex tma:

²Ax tok Job, myalo b'a'n tuj twitza qa at jun ma yolin tuk'ila, ex mlay b'ant tu'n mi nyoline tuk'ila.

³Nimku xjal ma txi tq'o'na xnaq'tzb'il kye ex ok kyipun nimku tu'na, aqeju otoq che kub' numj.

⁴Nimku xjal otoq che jaw tolj xi tma'na kye tu'n mi tb'aj kyk'u'j noq o'kx tu'n kyjaw we', ex e tzyet naj tu'na aqeju kyja'toq kykub' tz'aq.

⁵Atzun ja'lo tej saj yajb'il ti'ja, ma tzaj b'aj tk'u'ja ex minti'tl tipuna.

⁶Ik tza'n teya, aya jun xjal ajb'el te Dios tz'aqlxixa ex mi jun tpaltila, ¿tiqu'n minti' in qe' tk'u'ja ti'j Dios?

⁷Ximanxa ti'j qa na'n tu'na: ¿Atpe jun xjal minti' til o tzaj yajb'il ti'j?

⁸O wile ex o tz'el nnik'e ti'j, qe xjal in kyb'incha'n mya b'a'n ex in che yajlan kyi'j qe kyuk'il, axtzun jlu in tzaj kyi'j.

⁹Ok in tzaj tq'oj Dios kyi'j ex ok in xi t-xupin kyi'j, b'i'x in che naj te jumajx.

¹⁰Maske in che tzanun ik tza'n qe b'alun, b'i'x in che q'ajen ok tetz b'uchun twitz kye' tu'n Dios.

¹¹Che kymel ik tza'n qe b'alun minti' in knet kykanb', ex qe kyal kytxu b'alun b'i'x che b'ajel sputj.

¹²At jun yol pon wuk'ile, pen o nb'iye porke noq tuj jasan tzaj q'ma'n.

¹³Te qonik'an pon jlu wuk'ile, otoq che tan xjal; at jun nwitzik'e ok, b'i'x tzaj nb'ise tu'n.

¹⁴Tzaj nim t-xob'il wi'je, ex tkyaqil nximlale tzaj lu'lun.

¹⁵Ik' jub'an ch'in kyq'iq' nwitze, b'i'x tzaj salin wi'je.

¹⁶Lu jun o wile wa'l tkub', ex minti' el nnik'e ti'j tijil. Minti' jun in q'ajt, ex te tib'ajxi o nb'iye jun tq'ajq'ajel chi kyja':

¹⁷¿Jakupe tz'ok xjal tz'aqlxix ik tza'n te Dios? ¿Maspelo saq tuj tanmi xjal ik tza'n te Dios aju b'inchante te?

¹⁸Minti'lpe in qe' tk'u'j Dios kyi'j qe tmajen ate' tuj kya'j; in knetpe kypaltil qe anjel tu'n Dios,

¹⁹pyortzun te xjal, baqa at tipun, ik tten ik tza'n jun ja tx'otx' b'inchamaj tib'aj quq, ex ik tten ik tza'n jun pu't in kub' puch'l.

²⁰Ate xjal b'a'n ta' te prim, ya te qale otoq naj; b'i'x kymel te jumajx ex mi a'l jun k'okel tkwent ti'j.

²¹Ik tten tanq'ib'l xjal ik tza'n jun noq' in kub' laqj; in kyim xjal na'nxtoq tok tnab'l, chitzun ju yol nb'iye.