Read kumam Job 41 Bible Online

Job 41 - kumam bible

Job 41

¹Yajtzunju nintz txkup Leviatán[4] tb'i, ¿jakupe jatz tu'na tu'n answel? ¿Jakupe k'alet taq' tu'na tu'n jun ky'jaj?

²¿Jakupe tz'ex tq'o'na jun ky'jaj tuj ttxa'n ex qa tu'n tjaw tjak'u'na tjaq' ttzi' tu'n jun answel?

³¿Jakupetzun kub'san twitza tu'n ttzaj tz'e'y tk'u'ja ti'j ex cheb'a tu'n ttzaj tma'n teya?

⁴¿Baqa jaku b'ant tu'na tu'n ttzaj ttziyan teya tu'n tok te tmajena te jumajx?

⁵¿Jakupe tz'ok tena saqchal tuk'il ik tza'n tuk'il jun chyu'j? ¿Jakupe k'alet tu'na tu'n tok te kychaq qe tal tme'jela?

⁶¿Jakupe che lijensin qe tzyul kyiẍ ti'j? ¿Jakupe kub' kyqesin tu'n t-xi kyk'ayin?

⁷¿Jakupe txi' tz'upl tplecha tuj ttz'umal ex jakupe txi' tz'upl tlansa tuj twi'?

⁸Noqpe qa ma pon tq'o'na tq'ab'a tib'aj, jurat k'okel tzoqpaj ti'ja; mlay tzik' tna'l tu'na ex mlay tb'inchaya juntl maj.

⁹Noq o'kx qa ma tz'ok ke'yin aju nintz txkup Leviatán tu'n jun xjal, jurat naj jaku kub' numj xjal tu'n t-xob'il.

¹⁰Qa at jun ma tz'okx ik'len te, in tzaj naj tq'oj ex mi a'l jun jaku tnimari tib' tuk'il.

¹¹¿Alkye jun xjal jaku klet ex mi'n tza'w qa ma tz'ok tzoqpaj ti'j? Mi jun tuj enter twitz tx'otx'.

¹²Mlay tz'el ti'j tu'n nyoline ti'j t-ximlal tb'anilxix ke'yin ex ti'j tipumal nimxix.

¹³¿Alkye jun jaku tz'el q'inte ttz'umal tok ti'j ex qa tu'n t-xoptz'aj ttz'umal aju in ajb'en te tkolb'il tib'?

¹⁴¿Alkye jun jaku tz'el jachinte tuj ttzi' tu'n kylaj qe twitz te' txolin kyel ex xob'ajilxix che ke'yin?

¹⁵Aju ttzal ti'j mer ik tza'n maqb'il txolin kyel ti'j ex kyuw qe wen ik tza'n ab'j,

¹⁶tlatz'in tib' jun ti'j juntl; mi ju kyq'iq' mlay tz'okx tuj;

¹⁷kymojb'an kyib' ex kyq'e'tin kyib' wen, mi a'l jun jaku tz'el pa'nte kye.

¹⁸Ok in tzaj q'ajt tuj ttxa'n, mer ik tza'n tqan q'ankyoq, ex qe tb'aq' twitz in che qoptz'aj wen ik tza'n q'ij ok tjawil te prim.

¹⁹Mer ik tza'n tqan q'aq' nne'tz tuj ttzi', ex in che etz k'ech tuj.

²⁰Nne'tz sib' tuj ttxa'n, mer ik tza'n jun k'il a' in loqin tib'aj q'aq'.

²¹B'i'x in k'ant xq'a'l tu'n t-xew ex nne'tz tqan q'aq' tuj ttzi'.

²²Aju tqul puro kyuw wen, ex kykyaqil xjal in tzaj kyxob'il twitz ju txkup lu.

²³Ax ikxpe tchib'jal kyuw wen, mer ik tza'n k'uxb'il.

²⁴Puro kyuw tanmi, mer ik tza'n jun ab'j ex ik tza'n jun kya'.

²⁵Ok tjaw we' txkup lu, b'i'x in che tzaj xob' qeju at nimxix kyipun ex in che el oq in che xob' wen.

²⁶Ok taq'pon tzoqpi'n spad ti'j, ex qa lans ex qa plech ex qa lans ch'in tqan, minti' ch'in kyilwi.

²⁷Mer ik tza'n ch'im nne'l k'uxb'il tuj twitz, ex mer ik tza'n q'u'chin tze' nne'l q'an k'uxb'il tuj twitz.

²⁸Ok t-xi xo't plech ti'j mlay tz'el oq; ok t-xi xo't ab'j ti'j, mer ik tza'n ch'im in xi xo'n ti'j nne'l tna'n.

²⁹Ok taq'pon tzoqpi'n jun garrot ma' tk'itz ti'j, mer ik tza'n jun ajlaj nne'l tuj twitz ex in jaw tze'n ti'j tq'ajq'ajel lans ch'in tqan ok t-xi xo't ti'j.

³⁰Ok t-xi tjaqun tib' twitz tx'otx', b'i'x in xi julix tuj tx'otx', mer ik tza'n texlen ttzi punt.

³¹B'i'x in jaw pulin nintz mar ma' t-xe' tu'n, mer ik tza'n jun k'il in pulin a' tuj tib'aj q'aq', ex kyja'tl nno'k tu'n ik tza'n jun k'il tkub'il perjum in pulin tib'aj q'aq'.

³²Ok in b'et tuj a' b'i'x in kyaj tik'len puro saq, in qoptz'aj ik tza'n ttzmal wib'aj puro saq wen.

³³Tuj enter twitz tx'otx' minti' jun nch'isb'ene in pon ik tza'n te, minti' ch'in in xob'.

³⁴Ok in che'x tke'yin kykyaqil txqantl txkup jawni qe, minti' nne'l xob' kyi'j, porke a rey kye, chi Dios b'aj tma'n te Job.