Read kumam Job 42 Bible Online

Job 42 - kumam bible

Job 42

¹Xitzun ttzaq'we'n Job te Qman:

²B'a'n wu'ne tkyaqil in b'ant tu'na, ex minti' jun mlaywit b'ant tu'na.

³¿Titzun we nxilen tu'nju o nmaye qa mya b'a'n aju in kub' t-ximana ex aju in b'ant tu'na? In chin yolintoqe ti'j aju minti' nne'l nnik'e ti'j, ex aju ma' t-xilen, aju mlayx tz'el nnik'e ti'j.

⁴Chitzuna tmaya weye: B'intza, ex waje tu'n nyoline tuk'ila ex tzaq'wentza qe nxjele lu, chitzuna.

⁵Nej noq jun tqanil o nb'iye ti'ja, atzun ja'lo aku qine in chin ke'yin teya.

⁶Kyja'tzun ma tzaj nb'ise tu'nju yol xi nma'ne ex nnu'l tilil wu'ne, ex lu qine q'uql tuj quq ex tuj tza'j, chi Job.

⁷Tb'ajlenxi tma'n Qman tkyaqil jlu te Job, ax ikx xi tma'n te Elifaz: Nimxix nq'oje ti'ja ex kyi'j qe kab'e tamiwoya, porke mya tuj tumel o che yoline wi'je, ik tza'n te nmajene Job.

⁸Kyi'ntze wuq tor ex wuq tman ẍne'l, kyxi'ye ma tuk'il nmajene Job ex kypatun kub'e qe alumaj lu te chojb'il kyile, ex atzunte nmajene Job kna'l Dios kyi'je ex ktzajel nb'i'ne tna'j Dios, tu'ntzun mi'n nb'inchanteye jun mya b'a'n kyi'je, maske iltoq ti'j tu'n ttzaj nq'o'ne mya b'a'n kyi'je tu'nju minti' e yoline tuj tumel wi'je, ik tza'n te nmajene Job o yolin tuj tumel, chi Dios.

⁹E je'xtzun Elifaz tuk'ix Bildad ex Zofar ex kyb'incha aju tzaj tma'n Qman kye, ex tzaj tb'i'n Qman aju tna'j Dios Job.

¹⁰Tb'ajlenxi na'n Job Dios kyi'j qe tamiw, tzaj tq'o'n Dios kab' maj t-xel aju attoq te Job nej.

¹¹E pontzun qe terman Job visitaril te, kyuk'ix qe tanb' ex qe tamiw ex kykyaqil xjal ojtzqi'maj twitz kyu'n, ex kub' kyik'sa'n jun nintz wa'n kyuk'il kykyaqil qeju otoq che pon tja. Kykyaqil e b'isun junx tuk'il Job ex e ok ten q'uqb'al tk'u'j tu'n tlaj tkyaqilju yajb'il otoq tzaj t-sama'n Qman ti'j, ex teyle junjun kye xi kyq'o'n ch'in pwaq te Job ex jun xmulq'ab'aj q'an pwaq ttx'otx'il.

¹²Kub'tzun ky'iwla'n Job tu'n Dios kyuj mankb'il tab'q'iyil mas nimxix ik tza'n nej. Kyajlaj mil japun kyb'aj qe t-ẍne'l ex qaq mil tcamey ex jun mil moj tboys ex jun mil kytxu' tbur.

¹³Ax ikx tzaj wuqtl tky'ajal ex oxtl tme'jel.

¹⁴Aju tnejel tme'jel, Jemima tb'i ok tq'o'n, aju tkab'in, Cesia ok tb'i ex aju toxin, Keren-hapuc ok tb'i.

¹⁵Tuj tkyaqil twitz tx'otx' minti' juntl xu'j o pon ke'yin ik tza'n qe tme'jel Job. Xi q'o'n kyetzb'il tu'n kyman ti'j ju tq'inumab'l, junx kyuk'il qe kyxib'an.

¹⁶Te tib'ajxi jlu o ten Job 140 ab'q'i ex o til kywitz qe tk'wa'l ex qe tal tchman, kyuk'ix qe ttxk'a tchman ex qe kyk'wa'l qe ttxk'a tchman.

¹⁷Ex kyim Job ya otoq tijin wen.