Read kumam Job 5 Bible Online

Job 5 - kumam bible

Job 5

¹Tjaw sch'ina Job. ¿Atpelo jun jaku tzaj onil teya? ¿Alkye jun anjel kxel tqanina onb'il te?

²Ploj nne'l tuj twitz xjal aju yajb'il in tzaj ti'j, ex qa ma tz'ok ten q'ojlel tu'n tlaj jlu, tu'nx in tzaj ti'n kamik ti'j, tu'nju minti' tnab'l.

³O wile jun xjal minti' tnab'l, jurat naj chmet nimku te, ex jurat naj o kub' xitj tja.

⁴Mi a'l jun onil kye qe tk'wa'l; ok kypon q'i'n twitz jwes minti' in xi b'incha'n kyi'j tu'n, ex mi a'l jun kolol kyi'j.

⁵Aju twitz tawal xjal minti' tnab'l, in xi kywa'n qe xjal at we'yaj kyi'j maske tuj ch'i'x in jaw kychmo'n; ex qe xjal at txqetle'n kyi'j in pon kyk'u'j ti'j tq'inumab'l.

⁶Aju mya b'a'n in tzaj qi'j, mya ax in jaw jlet twitz tx'otx', aju b'is mya ax in tzaj poq'l tuj tx'otx'.

⁷Ik tza'n qe k'ech in che etz tuj q'aq', ikxtzun te xjal il ti'j tu'n tik'x k'ixk'oj tu'n.

⁸Noqwit aqine at b'is wi'je ik tza'n teya, mawtlo chinxe qanil onb'il te Dios ex mawtlo txi nq'on wib'e te Dios tu'n t-xi tb'incha'n wi'je.

⁹Nimxix tb'inchb'en Dios in b'ant ma'xix t-xilen, ex mi a'l jun jaku tz'el tnik' ti'j.

¹⁰A Dios in tzaj q'onte jb'al twitz tx'otx', ex tu'n in b'aj ta'lin qe kojb'il.

¹¹Qe xjal ch'in kyoklen in che jaw nimsa'n tu'n Dios, ex qeju in che b'isun in che'x ti'n tuj jun lugar segur jatum tu'n kyklonte kyib'.

¹²Aju xjal elni twitz tu'n t-sb'un, in b'aj ttzaksin Dios t-ximb'etz tu'ntzun mi tb'ant aju otoq kub' t-ximan.

¹³In che tzyet qe aj nab'l tu'n Dios maske jawni kywitz, ex minti' in xi tq'o'n amb'il kye tu'n tb'ant aju mya b'a'n otoq kub' kyximan.

¹⁴Q'ijl in che takpaje', ex in che b'et tuj qxopin mer ik tza'n qonik'an.

¹⁵In che klet tu'n Dios qe meb'a xjal ex qeju in che yajlanjtz kyu'n qe b'inchal mya b'a'n.

¹⁶Qe xjal minti' kyipun, o'kx ti'j Dios in qe' kyk'u'j tu'n kyklet. In maqet kytzi' qe xjal mya b'a'n tu'n Dios.

¹⁷At tzalajb'il te xjal nno'k mayo'n tu'n Dios ti'j ju mya b'a'n in tb'incha'n. Mi'n tz'el tik'una ok tok mayo'na tu'n Dios, aju at tipumal tu'n tb'ant tkyaqil tu'n.

¹⁸Qa ma tz'ok jun ẍil ti'ja tu'n, ax k'okel potzin ti'j; qa ma tz'ok k'ixb'isa'na tu'n, ax kq'anil teya.

¹⁹A klolte teya tkyaqil maj ok ttzaj xob'ajil ti'ja, ex mlay taq' amb'il tu'n ttzaj mya b'a'n ti'ja.

²⁰Tuj tq'ijlalil we'yaj kletela tu'n tu'n mi tkyima, ex ok ttzaj q'oj, kletela tu'n tu'n mi tkub'a tu'n spad.

²¹Kletela tu'n ok kysi'min xjal yol ti'ja, ex mlay xob'a ok ttzaj xitb'il ti'ja.

²²Qa ma tzaj we'yaj ex qa ma tzaj xitb'il, mlay b'aj tk'u'ja ex mlay xob'a kywitz qe txkup te tjaq' k'ul.

²³Ok taq'nana mlay tz'ok we'ya kyi'j qe ab'j tuj tkojb'ila, ex ktel tmojb'ab'l tib'a kyuk'il qe txkup.

²⁴Txub'txaj ktela tuj tjaya, ex cabal ate' qe taluna ok kyb'aj tajla'na.

²⁵Nimku tiyjila che ul itz'j, ik tza'n cha'x k'ul tuj kojb'il.

²⁶Atxtoq tipuna ok tkyima, ik tza'n jun che'l triw otoq pon tq'ij.

²⁷Ma qile ex ma tz'el qnik'e ti'j, ik ttenju. B'inxa ex tz'ajb'enxwit teya, chi Elifaz, b'aj tma'n.