Read kumam Job 7 Bible Online

Job 7 - kumam bible

Job 7

¹Kyuwxix tanq'ib'l jun xjal tzalu twitz tx'otx', ik tten ik tza'n tajb'eb'l jun soldad,

²ex ik tza'n jun majen otoq sikt, tajb'il tu'n tojlan ch'in t-xe xlekun, ex ik tza'n jun aq'nal in ayon jtoj tzul twi tk'u'j.

³Iktzun weye, ela'xi xjaw minti' ch'in in chin tzalaje, tkyaqil qonik'an nnik'x yajb'il wu'ne.

⁴Ok in chinxe tal, matij nne'la qonik'an tuj nwitze; ex in kub' nximane ¿jnik' or tu'n njaw we'ye? Nim in chin sikte, tol wik'e tuj nkoẍb'ile okxi ttzaj t-xe kya'j.

⁵Nojni ti'j nximlale kyu'n ẍuq', ma tz'el poq'j ntz'umile ex ma tzaj poj tuj ẍil ti'j nximlale.

⁶Ma tzul laq'e' tq'ijlalil tu'n nkyime, mas in ojqelan tu'n tel laq'e' ik tza'n nnik'x q'ot twab'l telar, minti'x oyb'il weye.

⁷Na'ntza aya Nman Dios, aju nchwinqlale ik tten ik tza'n jun xjiq'b'aj k'u'j ex mlayx chin tene tuj txub'txaj.

⁸Mi a'l jun k'okel ke'yinte nwitze porke ok chin najele ok tok tq'o'na twitza wi'je; k'okel tq'o'na twitza wi'je ex chin najeltzune.

⁹Ik tza'n muj in b'et ex in kub' naj, ikxtzun ju xjal in xi' tuj muqb'il; mlayx tz'ajtz meltz'aj juntl maj,

¹⁰mlay tzul juntl maj tuj tja jatum otoq ten.

¹¹Kyja'tzun mlay txi nkoline tu'n nyoline. Tuk'il ta'w ex tuk'il nim nb'ise ktzyetel nyoline ti'j ju nnik'x wu'ne.

¹²¿Baqa ik qine ik tza'n jun nintz txkup at tuj mar, tu'nju nno'k tq'o'na jun xq'uqil weye?

¹³Qa ma nmaye: Kqeb'el nk'u'je ok nkub' koẍe'ye ex qape k'elel nb'ise ok nxi'ye tal, qa nchiye,

¹⁴pero in chin ok t-xob'tza'na kyu'n witzik', ex in chin ok t-sek'pu'na ok in chin kub' t-xq'umsina.

¹⁵Maslo b'a'n tu'n tkub' tjatz'o'na nqule, mas b'a'n tuj nwitze tu'n nkyime twitzju tu'n wanq'ine.

¹⁶Mlay tzik'x mastl wu'ne. Mi wajtle tu'n wanq'ine. Chin tq'onkja; aju nchwinqlale ik tten ik tza'n jun xjiq'b'aj k'u'j.

¹⁷¿Ti t-xilen ju xjal tu'nju ma' t-xilen tuj twitza? ¿Tiqu'n nimxix in ximana ti'j?

¹⁸¿Tiqu'n nno'k t-xq'uqina tkyaqil q'ij ex kok'x nno'k tuj malb'il tu'na?

¹⁹¿Tiqu'n minti' nne'l ti'n twitza wi'je, ex minti' in chin kyaj tq'o'na jun rat tuj txub'txaj?

²⁰Qa ma nb'inchaye il, ¿titzun mya b'a'n in nb'incha'ne ti'ja tu'n jlu, aya xq'uqil kye xjal? ¿Tiqu'n ma chin ok tq'o'na ik tza'n jun aj q'oj tu'n tok tzoqpaja wi'je? Baqa in chin lab'te ti'ja.

²¹¿Tiqu'n minti' in kub' tnajsa'na wile? ¿Tiqu'n minti' in kub' tnajsa'na aju mya b'a'n o nb'inchaye? Ex ch'ix nkyime; ok kjyola wi'je, ex mi a'ltl qine.