Read kumam Job 8 Bible Online

Job 8 - kumam bible

Job 8

¹Tzyettzun tyolin Bildad aju aj Súa, ex tma:

²¿Jtoj txi tkolina tu'n tyolina ikju, in yolina ik tza'n jun nintz kyq'iq'?

³Ate Dios aju at tipumal tu'n tb'ant tkyaqil tu'n mlay b'aj tmeltz'u'n aju tz'aqlxix ex aju jiqun ti'j.

⁴Malo che b'inchan qe tk'wa'la il twitz Dios, tu'ntzun jlu ma tzaj kycastiw tu'n.

⁵Qa ma txi tqanina onb'il te Dios aju at tipumal tu'n tb'ant tkyaqil tu'n, ex qa ma txi tqanina te tu'n ttzaj q'aq'an tk'u'j ti'ja,

⁶qa minti' tila ex qa ma tb'inchaya aju tz'aqlxix, k'okel kwentina tu'n ex ktzalajela juntl maj tuj tjaya ex ti'j tkyaqilju at teya, ik tza'n nej.

⁷Aju tq'inumab'la at nej myaxix nim, atzunju tzul q'o'n te tib'ajxi, nimxix wen.

⁸Qaninxa kye qe ojtxi xjal, xnaq'tzam tib'a ti'j kyojtzqib'l kyman.

⁹Atzun qe, ma k'itzqe qo' ex minti' ch'in b'a'n qu'n; aju qanq'ib'l tzalu twitz tx'otx' ik tten ik tza'n jun xlekun.

¹⁰Pero qe ojtxi xjal jaku che yolin tuk'ila, ex jaku tzaj kyq'o'n nimku xnaq'tzb'il teya.

¹¹Aju ajlaj ex aju tqan chum o'kx in che ch'iy jatum at nim a';

¹²maske ikju, pero cha'xtoq ex na'nxtoq kyjaw tx'emit, nej in tzqij kywitz txqantl k'ul.

¹³Ikxtzun in b'aj kyi'j qe xjal nnik' tna'l Dios kyu'n; minti' jatum tu'n tok qe' kyk'u'j;

¹⁴jatum nno'k qe' kyk'u'j minti' tipun, ik tza'n jun twitz noq', ex ik tza'n jun tchemaj xin.

¹⁵Qa ma che ok q'eje' ti'j tchemaj xin, mlayx tipa' tu'n mi'n tkub' laqj; qa ma txi kyq'o'n kyalil tib'aj tchemaj xin, mlayx xkye' tjaq' kyalil.

¹⁶Qe xjal mya b'a'n, ik kyten ik tza'n cha'x k'ul tkub' ti'j q'ij in tzaj ch'iy kyxol tkyaqil tqan awal;

¹⁷nim tlok' in xi b'et kyxol ab'j ex in che b'aj tzyet qe ab'j tu'n tlok',

¹⁸ex qa at jun ma jaw b'aqonte te jatum tkub', mi a'l jun jaku tz'el tnik' ti'j qa attoq jun k'ul o kub' ten tuj lugar lu.

¹⁹Kyja'tzun tten in b'aj tzqij, ex jatum otoq kub' ten in tzaj poq'l txqantl k'ul te t-xel.

²⁰Minti' in kyaj tkolin Dios aju xjal minti' tpaltil, ex minti' in onin kyi'j qe xjal mya b'a'n.

²¹Kjawil tze'na juntl maj tu'n Dios ex kjawil sch'ina tu'n tzalajb'il.

²²Atzun qe aj q'oj ti'ja ktzajel kych'ixwi, ex kb'el xitj kyja qe xjal mya b'a'n.