Read kumam Job 9 Bible Online

Job 9 - kumam bible

Job 9

¹Tzyettzun tyolin Job ex tma:

²B'a'n wu'ne ax tok jlu, mlay txi tma'n jun xjal qa minti' til twitz Dios.

³Qa at jun xjal taj tz'ok ten yolil tuk'il Dios tu'n tklonte tib', kyxol jun mil tyol Dios mi jun jaku tzaq'wet tu'n.

⁴Ate Dios ma'xix tipumal ex nimxix tnab'l, ¿alkye jun jaku kub' twab'an tib' twitz ex jaku tzoqpaj?

⁵Tu'n tq'oj Dios in che tzaj yukch qe witz; in che kub' t-xitun ex minti' b'a'n kyu'n alkye otoq yukunte kye.

⁶Tu'n Dios in tzaj lu'lun tx'otx' ex in che b'aj yukch qe tq'uqb'il tu'n.

⁷Qa ma tma Dios tu'n mi tjawil q'ij, ax mlay jawil, ex qa ma tma kye che'w tu'n mi tk'ant kyspik'umal, ax mlay che k'ant.

⁸Mi jun onin ti'j tej t-xi tlik'pu'n kya'j ex in b'et tib'aj mar in pulin wen.

⁹Ate b'aj b'inchante qe che'w tuj k'lojin: Jun k'loj Osa Mayor kyb'i, juntl k'loj Orión kyb'i ex juntl k'loj Pléyades kyb'i, ex jun k'loj che'w ate' tuj tnayaj q'ij.

¹⁰Nimxix tb'inchb'en Dios in b'ant ma'xix t-xilen, ex mi a'l jun jaku tz'el tnik' ti'j.

¹¹Qa ma tz'ex Dios nwitze mlay wile; k'ik'el takl wi'je ex mlay nna'ye.

¹²Qa at jun ti'xti nne'l tetzan, ¿alkye jun jaku tz'ok mayonte te ti'j? ¿Alkye jun jaku txi qanin te: ¿Ti in tb'incha'na, chiwt?

¹³Qa in tzaj tq'oj Dios mlayx chewix tk'u'j jurat naj; twitz kb'el kymansin kyib' qeju mojl kyyol tuk'il Rahab,[2] aju nintz txkup at tuj mar.

¹⁴¿Tza'ntzun tten tu'n tknet yol wu'ne tu'n taj nmojtza'ne Dios?

¹⁵Maske minti' in b'ant il wu'ne twitz Dios, pero mlay b'ant ttzaq'wet wu'ne; ate Dios jwes wi'je, o'kx jaku txi nqanine tu'n ttzaj q'aq'an tk'u'j wi'je.

¹⁶Qa ma tzaj ntxko'ne ex qa ma tzaj ttziyan tu'n tul, pero mlay txi nnimane qa jaku che tzaj tb'i'n qe nyole.

¹⁷Jakulo tzaj t-sama'n kyq'iq' jb'al tu'n nk'ixb'isanjtze tu'n, ex jakulo tz'ok tq'o'n mas ẍil wi'je noqx gan.

¹⁸Jakulo tzaj nimxix b'is wi'je tu'n, ex mlaylo tzaj tq'o'n amb'il tu'n tjatz nxewe.

¹⁹Qa ma qo yolin ti'j alkye mas at tipumal, ax tok ate Dios at mas tipumal; qa qajb'il tu'n tok tuj xjel, ¿alkye ktzajel txkonte te tu'n tul?

²⁰Maske minti' wile, pero ax ntzi'ye kq'malte qa at wile ex mya b'a'n qine.

²¹Maske minti' wile, pero minti' tajb'en jlu weye; ma b'aj nganiye tu'n wanq'ine.

²²Tkyaqil junx ta'. Atzun jlu ximan wu'ne: In che naj tu'n Dios qe xjal at kyil, ax ikx qeju minti' kyil.

²³Qa minab'en ma tzaj jun k'ixb'isab'l kyib'aj xjal ex qa ma che kyim qeju minti' kyil, noq in jaw tze'n Dios ti'j ju nnik'x kyu'n.

²⁴In kyaj tq'o'n qe nasyon tuj kyq'ab' xjal mya nimal Dios qe, ex nno'k tmaqsi'n kywitz qe jwes. Qa mya tu'n Dios in b'ant jlu, ¿al u'ntzun?

²⁵Aju nq'ijlalile ojqelxix tel, ex na'nx tok nke'yine aju ttxub'txajal.

²⁶In ojqelanxix tel, ik tza'n qe barc kyuw che b'et, ik tza'n jun t'iw in xi lipan ti'j tkanb' tu'n ttzyet tu'n.

²⁷Qa ma kub' nximane tu'n tik' tna'l nb'ise ex tu'n t-xi nyek'une nwitze in tzalaj,

²⁸tkyaqil k'ixk'oj nna'jtz meltz'aj sek'pul weye, porke b'a'n wu'ne mlay txi tniman Dios qa minti' wile.

²⁹Qatzun at wile tuj twitz Dios, noqxlo gan tu'n tjaw wipuman wib'e.

³⁰Maske tz'el ntx'jo'ne nq'ab'e tu'n jabón, ex maske tz'el njaqu'ne tu'n ta'l tza'j,

³¹jakulo chinx t-xo'n Dios tuj sob'an, ex axpelo nxb'alune jaku tz'el ik'unte weye.

³²Noqwit xjal te Dios ik tza'nx qine, jakwitlo tz'aj ntzaq'wene, ex jakwitlo txi nma'ne te tu'n qxi'ye tuk'il twitz jun jwes tu'n t-xi b'incha'n qi'je.

³³Noqwit at jun jwes qxole tu'n tkawin qib'aje qkab'ile,

³⁴tu'n tmayet Dios tu'n, tu'n mi'n kukx tkub' ncastiwoye tu'n, ex tu'n mi'n kukx ttzaj tq'o'n xob'ajil wi'je,

³⁵ex jakulo chin yoline tuk'il minti' nxob'ile, ex jakulo txi nma'ne te qa minti' wile.