Read kumam Salmos 102 Bible Online

Salmos 102 - kumam bible

Salmos 102

¹Nman Dios b'intza nna'j Diose, in chin qanine onb'il teya, chin tb'intza.

²Mi'n txi tewan tib'a nwitze ok in tzaj yajb'il wi'je; b'ix chin tzaj tb'i'na, b'ix chin tzaj ttzaq'we'n naja ok ntxokone ti'ja.

³Porke jurat in b'aj nchwinqlale ik tza'n sib', in che tzaj julin nb'aqile mer ik tza'n q'aq',

⁴nib'an tb'aj tipun wanmiye ik tza'n k'ul in tzqij; ex minti'tl nganiye tu'n nwa'ne,

⁵nib'an tok lak'e' ntz'umile kyi'j nb'aqile tu'n tlaj nimxix in chin ayayane.

⁶Ik ntene ik tza'n jun ẍin at tuj tzqij tx'otx', ex ik tza'n jun xitx' at kyxol qe ja o che b'aj xitj.

⁷Minti' in chin tane. Ik ntene ik tza'n jun chyu'j tjunalx tjax twi ja.

⁸Minti' in xi kykolin aj q'oj tu'n kyyasun wi'je, ex in ajb'en nb'iye kyu'n tu'n t-xi kyqanin mya b'a'n ti'j juntl xjal.

⁹Te t-xel pan in xi nwa'ne tza'j; ex in b'aj t-smon tib' ta'l nwitze tuj nk'a'ye

¹⁰tu'n tlaj tq'oja ex ttx'u'jila. Ma chin jaw ttzyu'na ex te tib'ajxi ma chin ex t-xo'na.

¹¹Aju nchwinqlale ik tten ik tza'n xlekun in kub' naj; in chin ok tzqije ik tza'n k'ul.

¹²Atzun teya Nman, in kawina te jumajx; kukx ktzajel na'n tb'iya.

¹³We'ktza, q'aq'antz tk'u'ja ti'j tnam Sión porke ma japun b'aj tq'ijlalil; ma pon or tu'n tkub' tnajsa'na til.

¹⁴In che b'isun qe tmajena kyi'j qe ab'j ate' tuj tnam, ex in tzaj ta'w tuj kyanmi kyi'j qe ttx'aqan b'uy kub'.

¹⁵Kykyaqil nasyon ex qe rey ate' twitz tx'otx' kjawil kynimsa'n tb'i Qman tb'anilxix

¹⁶ok tjaw tb'incha'n juntl maj aju tnam Sión ex ok tyek'unte tib' tuj tajwalil.

¹⁷Ktzajel tb'i'n kyna'j Dios qeju otoq che kyaj kolin nej ex ktzajel tb'i'n aju kykub'sb'il.

¹⁸E tkyaj tz'ib'et jlu te kye qe xjal che ul itz'j te tib'ajxi, tu'ntzun tjaw kynimsa'n tb'i Qman.

¹⁹Max tuj kya'j tzaj tke'yin Qman; twitz tx'otx' tzaj tke'yin max tuj tja xjan,

²⁰tu'n kytzaj tb'i'n qeju ate'kx pres in che oq' ex tu'n kyklet qeju tkub' kysentens tu'n kykyim;

²¹tu'ntzun tpakb'anjtz tb'i Qman tuj Sión ex tu'n tjaw nimset tb'i tuj tnam Jerusalén,

²²ok tok kychmon kyib' qe xjal najl kyuj kykyaqil nasyon kyuk'ix qe rey, tu'n kyk'ulun te.

²³Tu'n ma tz'el ti'n wipune tuj b'e; ma tz'ok tlaq'b'a'n tuj nq'ije.

²⁴Xi nma'ne te kyja': Nman Dios, mi'n taq'a amb'il tu'n nkyim naje na'nxtoq tjapun wab'q'iyile. Atzun teya minti' b'ajsb'il te tab'q'iyila.

²⁵Kub' tq'uqb'a'na twitz tx'otx' atxix t-xe tnejel; tu'nxa o b'ant kya'j.

²⁶Tkyaqil jlu knajel, atzun teya kukx ktela te jumajx. Tkyaqil jlu kb'ajel ik tza'n jun xb'alun; tu'na kch'expetel, ex b'i'x kch'expetelx ik tza'n jun xjal in b'aj tch'expu'n t-xb'alun.

²⁷Atzun teya kukx ttena te jumajx, ex minti' b'ajsb'il te tab'q'iyila.

²⁸Qe kyk'wa'l tmajena ok che anq'il tuj segurxix, ex qe kyiyjil che b'el ten twitza te jumajx.