Read kumam Salmos 103 Bible Online

Salmos 103 - kumam bible

Salmos 103

¹B'itz tu'n David Kxel nq'o'ne chjonte te Qman Dios tu'n tkyaqil wanmiye; kxel nq'o'ne chjonte te tu'n tkyaqil nk'u'je, tu'nju xjan tb'i.

²Kxel nq'o'ne chjonte te Qman tu'n tkyaqil wanmiye; mlay tzik' tna'l wu'ne tkyaqilju t-xtalb'il in tzaj tq'o'n weye.

³Ate Qman in kub' najsante tkyaqil wile, in chin b'anixe tu'n tuj tkyaqil nyab'ile.

⁴Ate Qman in klonte weye te kamik ex txolin wi'je tu'n tk'ujlalil ex tu'n tq'aq'b'il tk'u'j.

⁵In tzaj tq'o'n nimku b'a'n weye tu'n toktl wipune, ik tza'n tipun jun ku'xun, ex ik tza'n tipun jun t'iw.

⁶In tb'incha'n Qman aju tz'aqlxix, ex tuj tumelxix in xi tb'incha'n kyi'j qeju in che yajlanjtz.

⁷Xi tchik'b'a'n te Moisés alkye t-ximb'etz tu'n tb'ant tu'n, ex xi tyek'un kye aj Israel qe tb'inchb'en nim kyipumal.

⁸In q'aq'an tk'u'j Qman qi'j ex in tz'e'y tk'u'j qi'j; nim tpasens qi'j ex nim tk'ujlalil.

⁹Mya kukx in qo ok tik'le'n, ex minti' in ten tq'oj te jumajx.

¹⁰Minti' in kub' tq'o'n qcastiw ik tza'n kyajlal qil ex qe qb'inchb'en mya b'a'n.

¹¹Ik tza'n te kya'j leq'ch tjaw tib'aj tx'otx', ax ikx te Dios nim tk'ujlalil kyi'j qeju in che niman te.

¹²Ik tza'n tjawitz q'ij ex telex q'ij najchaq kyxol, ax ikxtzun qe qil najchaq ma tz'el tlaq'b'a'n Dios qi'j.

¹³Ik tza'n jun mamb'aj in tzaj tz'e'y tk'u'j kyi'j tk'wa'l, ax ikx te Qman in tzaj tz'e'y tk'u'j kyi'j qeju in che niman te.

¹⁴Porke ojtzqi'n tu'n alkye b'anin qo' ti'j: b'a'n tu'n tquqil tx'otx' qo'.

¹⁵Aju tanq'ib'l xjal ik tten ik tza'n k'ul noq ch'in in ten; ex ik tza'n jun b'ech tuj kojb'il jurat in tzaj poq'l;

¹⁶ok nnik' kyq'iq' tib'aj, b'i'x in naj tu'n ex mlay kyil xjal juntl maj.

¹⁷Atzunte Qman tk'ujlalil kukx tten te jumajx kyi'j qe xjal in che niman te, ex kukx tb'inchante aju tz'aqlxix kye kykyaqil k'loj xjal ojtxi ex qeju che ul itz'j te tib'ajxi,

¹⁸kye qeju in japun tyol kyu'n, aju kyaj b'ant ti'j tu'n kyuk'il kyxe'chel, ex minti' nnik' tna'l kyu'n tu'n t-xi kyniman qe tmandamyent.

¹⁹Ma kub' tq'o'n Qman tq'uqb'il te tkawb'il tuj kya'j, ex in kawin tib'aj tkyaqil.

²⁰Kyq'onxe chjonte te Qman aqeye anjel at nim kyipune ex in kyb'incha'ne aju in tzaj q'ma'n kyeye, ex tokxix kywi'ye ti'j tyol tu'n t-xi kynimane.

²¹Kyq'onxe chjonte te Qman aqeye ate'ye tuj kya'j nim kyajlale ex in che ajb'ene te, ex in b'ant aju tajb'il kyu'ne.

²²Kyq'onxe chjonte te Qman kykyaqile b'incha'n qeye tu'n, ate'ye tuj tkyaqil lugar te tkawb'il. Kxel nq'o'ne chjonte te Qman tu'n tkyaqil wanmiye.