Read kumam Salmos 104 Bible Online

Salmos 104 - kumam bible

Salmos 104

¹Kxel nq'o'ne chjonte te Qman tu'n tkyaqil wanmiye. Aya Nman ex Ndiose ma'xix toklena. Aju tajwalila ex ju t-spik'umala tok ti'ja mer ik tza'n jun xb'alun;

²tkyaqil ti'ja at t-spik'umala, tu'na xi tlik'una kya'j ik tza'n in xi lik'et jun xb'alun.

³Kub' tq'uqb'a'na qe tqan tjaya kyib'aj qe a' twitz kya'j. In che ok tq'o'na qe muj te tcarwaja, ex aju kyq'iq' in ajb'en te iqal teya.

⁴Nno'k tq'o'na qe kyq'iq' te t-sanjela, ex nno'k tq'o'na tqan q'ankyoq te tmajena.

⁵Kub' tq'o'na tx'otx' tib'aj tq'uqb'il tu'ntzun mi'n tyukch tuj tlugar.

⁶Aju twitz tx'otx' b'i'x kyaj tjaq' nintz mar ma' t-xe', ik ok mar ik tza'n jun xb'alun in xi lik'et, ex maqset tkyaqil twitz tx'otx' tu'n. Qe nmaq witz b'i'x e kyaj tjaq' a'.

⁷Ex tej t-xi tmayo'na a', jurat naj el oq tej tb'inte tyola ik tza'n q'ankyoq in julin.

⁸Ik' a' kyib'aj qe witz ex ku'pun kyib'aj qe chq'ajlaj tu'n tpon tuj lugar jatum b'animaj tu'n tkyaj ten,

⁹ex ax pon tuj tmojonil xi tma'na te, tu'ntzun mi tnoj juntl maj tib'aj tx'otx' tu'n.

¹⁰Tu'na in che jatz jlet qe twi a' ex in che kanun kyuj qe nima in che b'et kyxol qe witz.

¹¹Ti'jtzun a' lu in che k'an qe jil te tjaq' k'ul; ex tu'ntzun a' lu in we' txqetle'n kyi'j qe chej te tjaq' k'ul.

¹²Kytzi' qe nima in b'ant kyq'u' qe chyu'j; ex atzun in che q'ajt qe kyxol tq'ab' tze'.

¹³Tu'na in tzaj jb'al kyib'aj qe witz ex max in tzaj tuj tjaya twitz kya'j; in tzaj tq'o'na nim a' twitz kya'j tu'n tcha'xix tx'otx'.

¹⁴Tu'na in ch'iy k'ul te kywa alumaj, ex tu'na in ch'iy tawal xjal in ku'x tawa'n tu'ntzun twa'n ti'j ju in tzaj tq'o'n tx'otx';

¹⁵in knet twa tu'n tok tipun, tuk'ix ta'l twitz uva te tk'a' tu'n ttzalaj, tuk'ix aseyt tu'n tqoptz'aj twitz.

¹⁶In che a'linjtz qe tze' wi'ten twi witz Líbano, aqeju ku'x tawa'n Qman.

¹⁷Kywi' qe tze' lu in b'ant kyq'u' qe chyu'j, atzun qe garza in che najan kywi' qe tzaj.

¹⁸Kywi' qe nmaq witz ate' qe chip te tjaq' k'ul, ex kywitz qe pik in xi kyewan kyib' qe kwatusa.

¹⁹O tb'inchaya xjaw te techal junjun tq'ijlalil, ex aju q'ij b'a'n tu'n jnik' or tu'n tex.

²⁰Tu'na in tzaj tq'o'na qlolj ok nno'k qonik'an, ex atzun in che etz qe jil te tjaq' k'ul b'etel.

²¹In che tzanun qe b'alun ti'j kykanb'; ex in che qanin te Dios tu'n ttzaj q'o'n kychi'.

²²Oktzun tjawil q'ij in che aj meltz'aj ex in che kub' b'une' tuj kyjul.

²³Atzun kye xjal in che ex aq'nal ti'j kyaq'un ex max in xi kykolin okxi tex q'ij.

²⁴Nimku tb'inchb'ena o b'ant Nman. Tkyaqil o b'ant tu'na tu'nju at nim tnab'la; nojni twitz tx'otx' tu'n tch'isb'ena.

²⁵Lu mar at ma' twitz ex matij wen jatum in che chmet nimku jil; at jil ch'in ex at nmaq;

²⁶atzun in che b'et qe barc tib'aj, ex atzun ta' aju nintz txkup Leviatán tb'i, aju tb'inchaya tu'n t-schan tuj mar.

²⁷Kykyaqil jlu in che ayon ti'ja tu'n kyxi tk'a'chana ok tpon tajb'en kye.

²⁸In xi tq'o'na kywa ex in xi' kyu'n; nim kywa in xi tq'o'na ex in noj kyk'u'j wen.

²⁹Ok in che kyaj tkolina, b'i'x in che jaw xob', ex ok nne'l ti'na kyxew, b'i'x in che kyim ex in che ok juntl maj te tquqil tx'otx'.

³⁰Ex ok ttzaj t-sama'na t-xewa in che poq'l, ex kyja'tzun ak'aj nno'k juntl maj twitz tx'otx' tu'na.

³¹Kukxwit tten tajwalil Qman te jumajx, ex tzalajxwit ti'j tkyaqil tb'inchb'en.

³²B'i'x in tzaj lu'lun tx'otx' ok in xi tke'yin Qman ti'j; ex b'i'x nne'l b'uqin sib' kyi'j qe witz ok kyok tmako'n.

³³Ok chin b'itzale te Qman aju Ndiose akux itz'x qine.

³⁴Kuchiwt tu'n ttzalaj Qman ti'j nximb'etze, porke o'kx tuk'il in tzaj ntzalajb'ile.

³⁵Kuchiwt tu'n kynaj qe aj il twitz tx'otx', ex kuchiwt che naj qeju b'inchal mya b'a'n. Kxel nq'o'ne chjonte te Qman tu'n tkyaqil wanmiye. Nimanxwit tb'i Qman.