Read kumam Salmos 105 Bible Online

Salmos 105 - kumam bible

Salmos 105

¹Kyq'onxe chjonte te Qman ex che kub'sane twitz, kymanxe kye xjal ate' kyuj txqantl nasyon aju o tb'incha.

²Che b'itzane b'itz te nimb'il te. Ex che yoline kyi'j qe tb'inchb'en ma' kyxilen.

³Che tzalajxe ti'j tb'i xjan. Tzalajxwit kyanmi qeju in che jyon ti'j Qman.

⁴Che laq'exe tuk'il Qman tu'ntzun ttzaj tq'o'n kyipumale; che laq'exe tuk'il tkyaqil maj.

⁵Kyna'ntze qe tb'inchb'en ma' kyoklen ex nim kyipumal, ex kyna'ntze qe tley tzaj tma'n;

⁶aqeye tiyjil Abraham aju tmajen Dios ex aqeye tk'wa'l Jacob sk'o'maj qe'ye tu'n.

⁷Atzun Qman jlu aju Qdios ex in kawin tib'aj tkyaqil twitz tx'otx'.

⁸Maske ma tzik' jun mil k'loj kyiyjil xjal, ex mlay tzik' tna'l tu'n aju tyol kyaj b'ant ti'j kyuk'il,

⁹ex mlay tzik' tna'l tu'n aju tyol kyaj b'ant ti'j tuk'il Abraham, ex aju tyol axix tok xi ttziyan te Isaac;

¹⁰kyaj tkyuwsa'n ju yol lu te Jacob tu'n tok ik tza'n jun ley, ex kyaj tkyuwsa'n te jumajx te Israel,

¹¹tej tmante: Teya kxel nq'o'ne aju tx'otx' Canaán tu'n tok te tetzb'ila.

¹²Mya nim kyb'aj tej kyten tuj kytx'otx' aj Canaán ex stranjer xjal qe,

¹³noq e b'etje' tuj kytx'otx' qe nasyon ex e ten tjaq' kykawb'il qe rey,

¹⁴pero minti' xi tq'o'n Dios amb'il tu'n kyyajlanjtz kyu'n txqantl xjal, noqpe xi tma'n kye rey:

¹⁵Mi'n tz'ok kyq'o'ne kyq'ab'e kyi'j qe xjal sk'o'maj wu'ne ex mi'n che ok tene yajlal kye qe nsanjele.

¹⁶Tzaj we'yaj tu'n Dios tuj tx'otx' Canaán, ex el ti'n tkyaqilju in ajb'en te kywa.

¹⁷Pero nej xi sama'n José tu'n Dios tuj tx'otx' Egipto, aju otoq txi kyk'ayin tu'n tok te kymajen xjal.

¹⁸O k'ixb'isanjtz tu'n caden ok q'o'n ti'j tqan, ex ok k'alo'n tqul tu'n k'uxb'il te presb'il te.

¹⁹Ok José tuj malb'il tu'n tyol Qman maxi tej tjapun b'aj ju yol otoq tma te tjaq'xi.

²⁰Aju rey in kawin kyib'aj nimku xjal xi tma'n tu'n ttzoqpet José;

²¹ex ok tq'o'n te nejenel tuj tja tu'n tok tkwentin tkyaqilju at te,

²²tu'ntzun t-xi tq'o'n xnaq'tzb'il kye qe nejenel ex kye qe tij xjal tu'n tok nim kynab'l.

²³Te tib'ajxi pon Israel, aju ax Jacob tb'i, ex o najan ik tza'n jun stranjer xjal tuj tx'otx' Egipto, aju kytx'otx' tiyjil Cam.

²⁴E chmet-xix qe tiyjil Jacob tu'n Dios, ex ok mas kyipun kywitz aj Egipto.

²⁵Ex te tib'ajxi ch'expet kyanmi aj Egipto tu'n Dios, e ok ten yajlal kyi'j qe xjal etzan tu'n, ex e ok ten sb'ul kye qe tmajen.

²⁶Xitzun t-sama'n Dios Moisés aju tmajen, tuk'ix Aarón aju otoq jaw t-sk'o'n,

²⁷ex tu'n Dios kyb'incha qe techal kyuk'ix qe b'inchb'en nim kyipumal tuj tx'otx' Egipto.

²⁸Tzaj t-sama'n Dios qlolj ex b'i'x kub' qloljix tuj tkyaqil part, ex minti' xi kyniman aj Egipto tyol Dios.

²⁹E ok qe nima tu'n te chik', ex b'i'x e naj kykyaqil kyiẍ;

³⁰b'aj noj tuj tx'otx' kyu'n qe ẍal, tuk'ix tuj tja rey.

³¹Tzaj t-sama'n Dios txqan xmisaq ex saq us, ex b'i'x b'aj noj twitz kytx'otx' aj Egipto kyu'n.

³²Te t-xel jb'al tzaj t-sama'n saqb'aqun tuk'ix tqan q'ankyoq tib'aj tx'otx' Egipto.

³³B'i'x e naj qe tqan uva ex qe tqan higo awa'n kyu'n; kyuk'ix qe tze' b'i'x e naj tuj Egipto.

³⁴Tzaj t-sama'n Dios txqan ẍplon nimxix wen ex mib'an kyajlanjtz.

³⁵B'aj kywa'n tkyaqil cha'x k'ul tuj kojb'il, tuk'ix tkyaqil awal.

³⁶E kyim qe nej kyk'wa'l aj Egipto tu'n, tujile junjun ja xjal.

³⁷E je'tztzun ti'n Dios qe xjal etzan tu'n q'i'n q'an pwaq tuk'ix saq pwaq kyu'n, ex mi jun o b'aj tipun kyxol junjun k'loj kyiyjil.

³⁸B'i'x e jaw tzalaj qe aj Egipto tej kyke'yinte kub' b'e kyu'n, tu'nju otoq tzaj nim t-xob'il kyi'j.

³⁹Kub' tlik'un Dios jun muj kyib'aj tu'n kyb'et tjaq', ex tzaj t-sama'n jun tqan q'aq' tu'n t-spik'b'ante kyib'aj te qonik'an.

⁴⁰Xi kyqanin kychi' te Dios, ex tzaj t-sama'n qe tz'uchin te kychi', ex noj kyk'u'j tu'n wab'j tzaj t-sama'n Dios twitz kya'j.

⁴¹O pax pik tu'n ex etz a' tuj ex o b'et ik tza'n jun nima tuj tzqij tx'otx'.

⁴²Tzaj tna'n aju yol xjan otoq txi ttziyan te Abraham aju tmajen.

⁴³Kyja'tzun tten e je'tz ti'n Dios qe xjal etzan tu'n, ex qeju sk'o'maj tu'n in che b'itzan ex in che sch'in tu'n tzalajb'il.

⁴⁴Xi tq'o'n tx'otx' kye, aju kytx'otx' txqantl nasyon, tuk'ix tkyaqil kyawal ex tkyaqilju kyaq'unb'en,

⁴⁵tu'ntzun t-xi kyniman aju tley Qman ex tu'n kyjapun qe tmandamyent kyu'n. Nimanxwit tb'i Qman.