Read kumam Salmos 106 Bible Online

Salmos 106 - kumam bible

Salmos 106

¹Nimanxwit te Qman. Kyq'onxe chjonte te tu'nju b'a'n te, ex kukx k'ujla'n qo' tu'n te jumajx.

²¿Alkye jun jaku tzaj q'mante qe taq'unb'en Qman ma'xix kyipumal? ¿Alkye jun jaku jaw nimsante te tu'nju at nim t-xtalb'il?

³At tzalajb'il kye qeju in che b'et tuj tumelxix ex kukx in kyb'incha'n aju tz'aqlxix.

⁴B'ix chin tzaj tna'na Nman ok tb'inchanteya b'a'n kye qe xjal etzan tu'na; b'ix chin ule ti'j tk'u'ja ok ttzaja klol kye,

⁵tu'ntzun twile aju kytzalajb'il qeju sk'o'maj tu'na, tu'ntzun ntzalaje ex tu'n tjaw nnimsa'ne tb'iya junx kyuk'il qe xjal etzan tu'na.

⁶Ma qo b'inchane il ik tza'nx qe qxe'chele; ma qo el tzpete; ma qb'inchaye mya b'a'n.

⁷Tej kyten qe qxe'chele max tuj Egipto, mya nim toklen ela tuj kywitz qe tb'inchb'ena ma'xix e b'ant; ik' tna'l kyu'n aju tk'ujlalila ma'xix, ex jaw kyi'n kyib' ti'ja ttzi Mar Kyaq Ke'yin.

⁸Pero tu'n Dios e klet, ex xi tyek'un tipumal tu'n tjaw nimsa'n tb'i.

⁹Xi tmayo'n aju Mar Kyaq Ke'yin ex aj tzqij tu'n. Ex e ik'tz ti'n max t-xe'pun mar, mer ik tza'n tuj tzqij tx'otx'.

¹⁰Kyja'tzun e klet tu'n kywitz aj q'oj kyi'j, ex tjaq' kyipumal qeju in che ik'un kyi'j.

¹¹Qe aj q'oj kyi'j e kyaj mulq'aj tjaq' a' ex mi jun kye o kyaj anq'in.

¹²Xitzun kyniman qe yol otoq tzaj ttziyan Dios ex xi kyb'itzan qe b'itz te nimb'il te.

¹³Pero jurat ik' kyna'l qe tb'inchb'en Dios kyu'n, ex minti' kub' kyyo'n tu'n tel kynik' ti'j alkye otoq kub' t-ximan tu'n tb'ant.

¹⁴Nim pon kyk'u'j ti'j kychi' tuj tzqij tx'otx'; ok kyq'o'n Dios tuj malb'il.

¹⁵Tzaj tq'o'n Dios aju xi kyqanin, ax ikx tzaj t-sama'n jun yab'il kyi'j, ex nim xjal e kyim tu'n.

¹⁶Tuj lugar jatum e kub' ten, tzaj tlo'ch kyk'u'j ti'j Moisés, ax ikx ti'j Aarón, aju otoq tz'el tpa'n Qman tu'n tajb'en te.

¹⁷Eltzun k'ab'chaj tx'otx' ex xi tz'aq Datán tuj, tuk'ix Abiram, kyuk'ix qe xjal ate'toq junx tuk'il.

¹⁸Jaw julin q'aq' kyi'j kykyaqil qeju otoq che ok lpe' kyi'j; tu'n tqan q'aq' lu e b'aj tz'e'y qe xjal mya b'a'n.

¹⁹T-xe witz Horeb okx kyq'o'n q'an pwaq tuj q'aq' tu'n tkub' ulj, ex ti'jtzun jlu kub' kyb'incha'n tilb'ilal jun tal tor ex e k'ulun twitz.

²⁰Kyaj kykolin Dios aju ma' tajwalil; te t-xel kub' kyb'incha'n jun tilb'ilal wakẍ b'a'n wa'n k'ul.

²¹Ik' tna'l Dios kyu'n, aju Klol kye, aju otoq tb'incha qe b'inchb'en ma'xix tuj Egipto,

²²ex otoq tb'incha qe b'inchb'en ma'xix kyxilen tuj kytx'otx' tiyjil Cam, ax ikx tuj Mar Kyaq Ke'yin.

²³O yolin Dios ti'j tu'n kynaj tu'n; pero ate Moisés aju sk'o'maj tu'n ok ten yolil kyi'j tu'n mi'n kynaj, ex o chewix ttx'u'jil Dios kyi'j, kyja'tzun ik'x ti'j tu'n kynaj.

²⁴Mas yajxi el kyik'un aju tx'otx' tb'anilxix, ex minti' xi kyniman qe yol otoq tzaj ttziyan Dios;

²⁵tuj kyja, xb'alun ja, e yolin mya b'a'n ti'j Qman, ex minti' xi kyniman aju otoq tzaj tma'n.

²⁶Tu'n ttzi' xi tma'n jun yol axix tok kyi'j, tu'n kykyim tu'n ax tuj tzqij tx'otx',

²⁷ex tu'n kynaj qe kyiyjil che ul itz'j te tib'ajxi, ex tu'n kyxi t-sputun kyxol qe nasyon mya okslal qe ti'j Dios.

²⁸Tuj lugar Peor ok kyjunin kyib' kyuk'il qeju in che k'ulun twitz tilb'ilal Baal, ex xi kychyo'n kychib'jal qe alumaj in kub' q'o'n kywitz qe tilb'ilal.

²⁹Tzaj tq'oj Dios kyi'j tu'n tlaj kyb'inchb'en mya b'a'n, tzaj jun k'ixb'isab'l kyxol ex nim xjal e kyim.

³⁰Atzunte Finees jaw we' ex kub' tb'yo'n aju b'inchan il, kyja'tzun we' aju k'ixb'isab'l ex minti'tl e kyim.

³¹B'a'n ela tb'inchb'en Finees tuj twitz Dios, ex kukx tu'n ttzaj na'n tu'n Dios te jumajx.

³²Ax ikx tzaj tq'oj Dios kyi'j xjal tu'n tlaj kyb'inchb'en mya b'a'n ttzi a' tuj Meriba, ex tu'n kye kylaj tzaj jun mya b'a'n ti'j Moisés,

³³tu'nju otoq b'aj tpasens kyu'n ex o yolin mya tuj tumel.

³⁴Minti' kub' kyxitun qe tnam otoq tma Qman tu'n tkub' kyxitun.

³⁵O'kx b'aj kysmon kyib' kyuk'il qe xjal mya okslal ti'j Dios ex o b'ant kye kyu'n aju in b'ant kyu'n xjal;

³⁶e k'ulun kywitz qe tilb'ilal nno'k kydiosin xjal, ex tu'n jlu e naj,

³⁷xi kyq'o'n qe kyky'ajal ex qe kyme'jel te jun chojb'il kye ju'ẍ.

³⁸Kub' kyb'yo'n qe k'wa'l minti' kyil, ax qe kyky'ajal ex qe kyme'jel, ex xi kyq'o'n te chojb'il kye qe tilb'ilal nno'k kydiosin xjal tuj Canaán. Kyja'tzun o tz'ilix tx'otx' tu'n kychk'el,

³⁹e tz'ilix qe xjal lu tu'n tkyaqilju kyb'inchb'en mya b'a'n ex el kypa'n kyib' ti'j Dios.

⁴⁰Tzajxix tq'oj Qman ti'j tnam etzan tu'n, ex e je'l tik'un;

⁴¹e je'x tq'o'n tjaq' kykawb'il qe nasyon mya okslal qe, ex kub' kyi'j kyu'n qe aj q'oj kyi'j;

⁴²e b'aj yajla'n kyu'n qe aj q'oj kyi'j ex b'i'x e kyaj ten tjaq' kykawb'il.

⁴³Nimku maj e klet tu'n Dios, atzun kye minti' xi kyniman aju ximamajtl tu'n, ex e je'x tz'aq tujx kyb'inchb'en mya b'a'n.

⁴⁴Maske ikju, pero tej ttzaj tke'yin Dios aju yajb'il kye ex tej tb'inte tq'ajq'ajel kywi' in che oq',

⁴⁵tzaj tna'n aju yol kyaj b'ant ti'j tu'n kyuk'il ex ch'expettzun tnab'l, porke ma'xix tk'ujlalil:

⁴⁶ex tma kye qeju otoq che kamb'an kyi'j tu'n kykub' xtalin kyu'n.

⁴⁷Qo tkloma Qman Dios. Qo ti'n exa kyuj qe nasyon tu'ntzun tjaw qnimsa'ne tb'iya xjan, ex tu'n qtzalaje nim ok tjaw qnimsa'ne.

⁴⁸Tuj tkyaqil tab'q'iyil nimanxwit te Qman aju Kydios aj Israel. Ex tu'n kymante kykyaqil: B'ant-xwit ikju. Nimanxwit tb'i Qman.