Read kumam Salmos 107 Bible Online

Salmos 107 - kumam bible

Salmos 107

¹Kyq'onxe chjonte te Qman tu'nju b'a'n te ex kukx k'ujla'n qo' tu'n te jumajx.

²Kymanxe jlu aqeye ma che klet tu'n Qman ex ma che klete tuj kyq'ab' aj q'oj,

³aqeye ma che ajtz chmo'ne tu'n kyuj txqantl tnam te jawni ex te kub'ni, te okni ex te elni.

⁴At junjun otoq che'x tzpet tuj tzqij tx'otx' minti' kynajb'il xjal tuj, ex minti' knet jun b'e kyu'n tu'n kypon tuj jun tnam jatum tu'n kynajan;

⁵tzaj we'yaj ex txqetle'n kyi'j, ex ch'ixtoq kynaj,

⁶pero tu'nju nim kyb'is e ok ten kub'sal twitz Qman ex e klet tuj b'is tu'n;

⁷e je'xtzun ẍaqlu'n tu'n tuj jun b'e jiqun ti'j tu'n kypon tuj jun tnam jatum tu'n kynajan.

⁸B'a'n tu'n t-xi kyq'o'n chjonte te Qman tu'nju at tk'ujlalil, ex ti'j t-xtalb'il in tb'incha'n kyi'j xjal.

⁹Porke nne'l txqetle'n kyi'j xjal tu'n, ex in xi tq'o'n nim kywa qeju nne'l kyk'u'j.

¹⁰At junjun najltoq qe tuj jun nintz qlolj, presintoq qe tu'n caden ex ate'toq tuj b'is.

¹¹Tzaj jlu kyi'j tu'nju minti' xi kyniman tyol Qman aju Ma'xix Toklen, ex el kyik'un aju t-ximb'etz b'a'n kyi'j.

¹²Kub' tq'o'n Dios jun aq'untl kyuwxix kyib'aj, e jaw tz'aq ex mi jun onin kyi'j.

¹³Pero tu'nju nim kyb'is e ok ten kub'sal twitz Qman ex e klet tuj b'is tu'n;

¹⁴e je'tz q'i'n tu'n tuj nintz qlolj ex e je'l tko'pin tuj caden.

¹⁵B'a'n tu'n t-xi kyq'o'n chjonte te Qman tu'nju at tk'ujlalil, ex ti'j t-xtalb'il in tb'incha'n kyi'j xjal.

¹⁶B'aj tpa'n qe tlamel ja q'an k'uxb'il, ex e kub' ttoqin qe k'uxb'il toksa'n ttzi tventanil pres.

¹⁷At junjun e yab't ex tzaj yajb'il kyi'j tu'n tlaj kyb'inchb'en mya b'a'n ex kyil,

¹⁸tk'i'toq kyk'u'j ti'j wab'j tu'nju ch'ixtoq kykyim.

¹⁹Pero tu'nju nim kyb'is e ok ten kub'sal twitz Qman ex e klet tuj b'is tu'n;

²⁰tu'nju tyol tzaj tma'n, b'i'x e b'anix ex e klet tu'n te kamik.

²¹B'a'n tu'n t-xi kyq'o'n chjonte te Qman tu'nju at tk'ujlalil, ex ti'j t-xtalb'il in tb'incha'n kyi'j xjal.

²²B'a'n tu'n t-xi kyq'o'n oyaj te, te aq'b'il chjonte, ex tu'n kyb'itzan tu'n tzalajb'il ti'j tb'inchb'en.

²³At junjuntl e je'x aj jyol kyk'a'ẍ ttzi mar, ex in che b'et tib'aj mar tuj kybarc,

²⁴o kyil aju tb'inchb'en Qman ma' t-xilen tib'aj mar.

²⁵Tej ttzaj yolin Qman, tzaj jun nintz kyq'iq' ex jaw pulwin mar tu'n;

²⁶qe barc in che jaw iqan leq'ch wen tu'n a', ex in che ku'x aj max t-xe a' in jaw pulwin, b'i'x tzaj b'aj kyk'u'j qe xjal q'il barc tu'n tlaj a' xob'ajilxix.

²⁷In che pich'je' ik tza'n k'al q'e'n; maske at nim kynab'l tu'n kyyukun barc pero ok te noqx gan.

²⁸Pero tu'nju nim kyb'is tzaj e ok ten kub'sal twitz Qman ex e klet tuj b'is tu'n.

²⁹B'i'x take' kyq'iq' tu'n Qman ex minti' jaw pulwintl mar.

³⁰Tej kyke'yinte kub' nume' mar, e jaw tzalaj ex e pon q'i'n tu'n Dios max tuj tnam tkub' ttzi mar, jatum ximan kyu'n tu'n kypon.

³¹B'a'n tu'n t-xi kyq'o'n chjonte te Qman tu'nju at tk'ujlalil, ex ti'j t-xtalb'il in tb'incha'n kyi'j xjal.

³²B'a'n tu'n tjaw kynimsa'n tb'i ok tok kychmon kyib' xjal, ex tu'n t-xi kyq'o'n chjonte te ok tok kychmon kyib' qe kytijil xjal.

³³In che aj tzqij qe nima ex qe twi a' tu'n Qman ex in che ok te tzqij tx'otx'.

³⁴In che ok qe tb'anil tx'otx' tu'n te meb'a tx'otx' tu'n tlaj kyb'inchb'en xjal mya b'a'n, aqeju najl twitz;

³⁵aju tzqij tx'otx' nno'k te nintz najab' tu'n, ex atzun in che jatz jlet qe twi a' tuj,

³⁶atzun in che kub' tq'o'n qeju minti' in kanun kywa, ex in jaw kyb'incha'n kytanmi tuj.

³⁷In ku'x kyawa'n kyawal tuj kojb'il, in ku'x kyawa'n tqan uva, ex nim twitz kyawal in jaw kychmo'n.

³⁸In che kub' ky'iwla'n tu'n Qman, in chmet kyb'aj ex in che chmet qe kyalun.

³⁹Qatzun ma che kyim ex qa noq nik'x kyb'aj in kyaj ten tu'n tlaj yajb'il kye kyu'n txqantl xjal, ex tu'n tlaj kyb'is ex tu'n tlaj k'ixk'oj in tzaj kyi'j,

⁴⁰nne'ltzun tik'un Dios qeju in che yajlan kye, ex in che takpaje' tu'n tuj lugar minti' kynajb'il xjal tuj, jatum minti' b'e.

⁴¹In che klet qe meb'a xjal tu'n, tu'n mi'n kyten tuj b'is, ex in chmet mas kyb'aj tu'n, ik tza'n txqan ẍne'l.

⁴²Ok kyke'yinte qe xjal tz'aqlxix tkyaqil jlu in che jaw tzalaj, atzun qeju b'inchal mya b'a'n minti'tl in che q'ajt.

⁴³Aju xjal at tnab'l, b'a'n tu'n tok tkwent ti'j jlu, ex b'a'n tu'n tel tnik' ti'j tk'ujlalil Qman.