Read kumam Salmos 109 Bible Online

Salmos 109 - kumam bible

Salmos 109

¹B'itz tu'n David Nman Dios, mi'n noq tzaj tb'i'na nna'j Diose,

²porke qe xjal nik'al yol ex qe xjal mya b'a'n in che yolin mya b'a'n wi'je, ex mya ax tok aju in kyma'n.

³Txolin wi'je kyu'n qe xjal in che yolin yol te ik'b'il; in che ok tzoqpaj wi'je ex minti' wile.

⁴At nk'ujlalile kyi'j, atzun kye in che ok tzoqpaj wi'je; ex weye in chin na'ne Dios.

⁵Mya b'a'n chojb'il weye tzaj kyq'o'n te t-xel aju b'a'n nb'inchaye kye, ex te t-xel nk'ujlalile ma chin el ik'une kyu'n.

⁶Q'on oka jun jwes mya b'a'n tu'n tok xjal lu tuj xjel tu'n, ex tu'n tkub' t-sentens ax tu'nju xjal tok te yolil ti'j.

⁷Ok tok tuj xjel tz'okwit at til; tu'nxwit tyol te kolb'il tib' kub' t-sentens.

⁸Nik'xwit q'ij tz'anq'in ex juntlxwit txi k'monte toklen.

⁹E kykyaj ten qe tk'wa'l minti' kyman ex aju t-xu'jil e tok te meb'a xu'j.

¹⁰E kyok tky'ajal te mo'l ex tu'n kyel lab't qe noq jachaq. E kyex lajet tuj ttx'aqan kyja.

¹¹Txi'wt ti'n q'ol ch'ex tkyaqilju at te. Awt xjal mi ojtzqi'n tu'n txi q'inte twitz taq'unb'en.

¹²Minti'wt jun xjal tzaj tz'e'y tk'u'j ti'j ex mi kyi'j qe tk'wa'l ok kykyaj ten minti' kyman.

¹³B'i'xwit che kub' b'aj qe tiyjil, e tnaj kyb'i te jumajx.

¹⁴Tzajxwit tna'n Qman aju mya b'a'n tb'incha tman xjal lu ex mi'nxwit kub' najsa'n til ttxu';

¹⁵kukxwit tzaj tna'n Qman aju kyil ex mi'nwt tzaj na'ntl kyb'i xjal lu tzalu twitz tx'otx'.

¹⁶Minti'x kub' t-ximan tu'n ttzaj tz'e'y tk'u'j kyi'j xjal; noq o'kx e b'aj tyajla'n qe meb'a ex qeju minti' kyipun ex qeju in che b'isun, ex e kub' tb'yo'n.

¹⁷Tu'nju mas o tajb'e tu'n t-xi tqanin jun mya b'a'n tib'aj juntl, ikxwittzun te e ttzaj mya b'a'n tib'aj. Minti' o tajb'e tu'n tkub' tky'iwla'n juntl, ex mi'nxwittzun kub' ky'iwla'n te.

¹⁸O'kx o qanin tu'n ttzaj mya b'a'n kyib'aj xjal; ik tten mya b'a'n te te ik tza'n t-xb'alun tok, okx tuj tk'u'j ik tza'n a' ex okx tuj tb'aqil ik tza'n aseyt;

¹⁹e tok txayin ti'j ik tza'n tu'n jun xb'alun ex e tok jatz'o'n tk'u'j mer ik tza'n tu'n jun sinch.

²⁰Ikwit tten kub' kycastiw qe aj q'oj wi'je tu'n Qman ex qeju in che yolin mya b'a'n wi'je.

²¹Atzun teya Nman, chin t-xtalin kub'a tu'n tjaw nimsa'n tb'iya. Chin tkloma tu'nju t-xtalb'ila ex tk'ujlalila.

²²Jumajx meb'a qine ex in chin b'isune, ma tzaj ta'w tuj wanmiye.

²³Nib'an nkub' naje ik tza'n jun xlekun, in chinx jawo'ne tu'n kyq'iq' mer ik tza'n jun ẍplon.

²⁴Tu'nju minti' in chin wa'ne, in che jaw lu'lun qe nqane ex ma tz'ok wi'je.

²⁵Ma chin oke te kytzeb'l xjal. Ok tkyil qine, in xi kyyukun kywi' tu'n kyxmayin wi'je.

²⁶Chin tonintza Nman Dios, chin tkloma tu'n tk'ujlalila,

²⁷tu'ntzun tel kynik' xjal ti'j qa tu'na o che b'ant qe jlu tu'n tq'ab'a.

²⁸Ma b'ant-x qa ma tzaj kyqanin mya b'a'n wib'aje, atzun teya chin b'el tky'iwla'na. Tzajxwit kych'ixwi, atzun weye chin tzalajele, aqine tmajena.

²⁹Tzajxwit kych'ixwi qe aj q'oj wi'je. Ex e tok txayin kyi'j tu'nju ch'ixb'il ik tza'n tu'n jun xb'alun.

³⁰Tu'n ntzi'ye kukx kxel nq'o'ne nim chjonte te Qman; kjawil nnimsa'ne kyxol nimku xjal.

³¹Porke ate in kolin kyi'j qe meb'a ex in che klet tu'n tuj kyq'ab' qeju in che kub' q'onte kysentens.