Read kumam Salmos 112 Bible Online

Salmos 112 - kumam bible

Salmos 112

¹Nimanxwit tb'i Qman. At tzalajb'il teju xjal in niman te Qman ex in tzalaj kyi'j qe tmandamyent.

²Qe tiyjil ju xjal tz'aqlxix che b'el ky'iwla'n ex ktel kyipumal twitz tx'otx'.

³Ktel nim tq'inumab'l tuj tja, ex aju tten tz'aqlxix kukx ktel te jumajx.

⁴Ik tten ik tza'n jun spik'un tuj qlolj in qoptz'aj kye qe xjal tz'aqlxix. At tq'aq'b'il tk'u'j, at-xix tk'ujlalil ex tz'aqlxix.

⁵B'a'n nne'la teju xjal in b'inchan xtalb'il ex in xi tq'o'n kych'ex xjal, ex tuj tumelxix in tb'incha'n tkyaqil;

⁶kyja'tzun mlay kub' tz'aq. Aju xjal tz'aqlxix kukx ktzajel na'n.

⁷Mlay xob' ok tb'inte tqanil mya b'a'n, tu'nju q'uql tk'u'j ti'j Qman, kyja'tzun kyuw tten.

⁸Q'uql tk'u'j ti'j Dios, kyja'tzun minti' in xob', k'okel tke'yin ok tkub' kyi'j qe aj q'oj ti'j.

⁹Xi t-sipan kykotz qe meb'a; aju tten tz'aqlxix kukx ktel te jumajx, kykyaqil xjal kjawil nimsante te.

¹⁰Atzunte xjal mya b'a'n ktzajel ttx'u'jil ok tke'yinte jlu; ok kqitx'itx'il t-xe te' xjal; cheb'a kb'ajel tipun okxi tnaj. In pon kyk'u'j xjal mya b'a'n ti'j nimku, ex mlay kykamb'a.