Read kumam Salmos 115 Bible Online

Salmos 115 - kumam bible

Salmos 115

¹Qman Dios, b'a'n tu'n tjaw nimset tb'iya ex mya aju qeye qb'i tu'n tjaw nimset. B'a'n tu'n tjaw nimset tb'iya tu'nju at tk'ujlalila ex tu'nju axix tok tyola.

²¿Tiqu'n in kyma'n xjal kyuj txqantl nasyon: Jatum ta' Kydios qe jlu? Che chi.

³Aju Qdios atzun ta' tuj kya'j ex in tb'incha'n tkyaqil alkye taj tu'n tb'ant tu'n.

⁴Qe tilb'ilal in che b'ant kyu'n xjal kyuj txqantl nasyon, saq pwaq ex q'an pwaq kytx'otx'il, ex kyu'nx qe xjal in kub' kyb'incha'n.

⁵At kytzi' ex mib'an che yolin; at tb'aq' kywitz ex mib'an che ke'yin;

⁶at kyẍkyin ex mib'an che b'in; at kytxa'n ex mib'an che sqon;

⁷at kyq'ab' ex mlay tzyet jun ti'xti kyu'n; at kyqan ex mib'an che b'et; mi jun tq'ajq'ajel in jatz tuj kyqul.

⁸Qe xjal in che b'inchan kye qe tilb'ilal lu ex nno'k qe' kyk'u'j kyi'j, ikx kyten ik tza'n kye.

⁹Aqeye aj Israel, qe'k kyk'u'je ti'j Qman. A onil qe ex in kolin qi'j.

¹⁰Aqeye pal, qe'k kyk'u'je ti'j Qman. A onil qe ex in kolin qi'j.

¹¹Aqeye in che niman te Qman, qe'k kyk'u'je ti'j. A onil qe ex in kolin qi'j.

¹²Minti' nnik' qna'l tu'n Qman ex qo b'el ky'iwla'n tu'n. Che b'el ky'iwla'n aj Israel tu'n. Che b'el ky'iwla'n qe pal tu'n.

¹³Che b'el tky'iwla'n qeju in che niman te, tza'nx qeju ma' kyoklen ikx qeju ch'in kyoklen.

¹⁴Kuchiwt chmet kyb'aj qe kyiyjile tu'n Qman, ax ikx qe kyiyjil qe kyk'wa'le.

¹⁵Awt Qman ky'iwlan kyeye, aju b'inchante kya'j ex tx'otx'.

¹⁶Te te Qman aju kya'j, atzunju tx'otx' xi q'o'n kye xjal tu'n Qman.

¹⁷Qeju o che kyim ex o che ku'pun tuj kynajb'il kyimni, mlay b'ant tu'n t-xi kyq'o'n chjonte te Qman;

¹⁸atzun qe kxel qq'o'n chjonte te Qman ja'lo ex te jumajx. Nimanxwit tb'i Qman.