Read kumam Salmos 116 Bible Online

Salmos 116 - kumam bible

Salmos 116

¹At nk'ujlalile ti'j Qman tu'nju ma tzaj tb'i'n nyole ex nkub'sb'ile,

²ex tu'nju ma chin tzaj b'i'ne tu'n. Kyja'tzun chin kub'sale twitz tuj tkyaqil q'ij te wanq'ib'le.

³In tzyete tu'n tipumal kamik mer ik tza'n tuj k'ob'il, tzaj nim xob'ajil wi'je tu'nju ch'ixtoq npone tuj kynajb'il kyimni; tzaj nxob'ile ex tzaj k'ixk'oj wi'je.

⁴In kub'santzune twitz Qman ex nchiye: Nman, chin tkloma.

⁵Tz'aqlxix te Qman ex in tzaj tz'e'y tk'u'j qi'j, ex nim tq'aq'b'il tk'u'j Qdios qi'j.

⁶Ate Qman kwentil kye qeju noq ch'in kynab'l at. Tej minti'toq wipune in klete tu'n.

⁷Ja'lo minti'tl in b'aj nk'u'je porke nim t-xtalb'il Qman ma tb'incha weye.

⁸Tu'n ma chin klete tu'n mi'n nkyime, ex tu'n mi'n kukx tel ta'l nwitze, ex tu'n mi'n nkub' tz'aqe.

⁹Chin b'etele b'a'n twitz Qman kyxol qe xjal najl twitz tx'otx'.

¹⁰Xi woksla'ne, kyja'tzun in chin yoline, maske atine tuj nim b'is.

¹¹Tej otoq b'aj nk'u'je, o nmaye qa kykyaqil xjal b'a'n che nik'an yol.

¹²¿Tza'n tten tu'n tchjet wu'ne te Qman tkyaqilju b'a'n o tb'incha wi'je?

¹³Ktzajel wi'ne jun vas ta'l twitz uva te jun oyaj te Qman tu'n t-xi nq'o'ne chjonte te, tu'nju ma chin klete tu'n.

¹⁴Kjapunel wu'ne tkyaqilju yol xi ntziyane te Qman kywitz kykyaqil xjal etzan tu'n.

¹⁵Ma' t-xilen tuj twitz Qman qa ma kyim jun xjal kyxol qeju in che niman te.

¹⁶Nman Dios, aqine tmajena, tal aju tmajena xu'j; tej k'alo'ntoq qine, in el tko'pina.

¹⁷Kxel nq'o'ne jun oyaj teya te jun aq'b'il chjonte, ex chin kub'sale twitza Nman.

¹⁸Aju yol xi ntziyane te Qman kjapunel wu'ne kywitz kykyaqil xjal etzan tu'n,

¹⁹kjapunel wu'ne ttxa'n pe'n twitz tja Qman, ax tuj tmija tnam Jerusalén. Nimanxwit tb'i Qman.