Read kumam Salmos 118 Bible Online

Salmos 118 - kumam bible

Salmos 118

¹Kyq'onxe chjonte te Qman porke b'a'nte ex minti' b'ajsb'il te tk'ujlalil.

²B'a'n tu'n kymante qe aj Israel kyja': Minti' b'ajsb'il te tk'ujlalil Qman.

³B'a'n tu'n kymante qe pal kyja': Minti' b'ajsb'il te tk'ujlalil Qman.

⁴Qeju in che niman te Qman, b'a'n tu'n kymante kyja': Minti' b'ajsb'il te tk'ujlalil.

⁵Tej atine tuj k'ixk'oj ex b'is in kub'sane twitz Qman, in tzaj b'i'ne tu'n ex in klete tu'n.

⁶Ate Qman at wuk'ile, mlay chin xob'e. Minti' jun mya b'a'n jaku kyb'incha xjal wi'je.

⁷Ate Qman at wuk'ile ex a onil weye. Kyja'tzun kwila'ye ok tkub' kyi'j qeju in che ik'un weye.

⁸Mas b'a'n tu'n tok qe' qk'u'j ti'j Qman ex mya tu'n tok qe' qk'u'j kyi'j xjal.

⁹Mas b'a'n tu'n tok qe' qk'u'j ti'j Qman ex mya tu'n tok qe' qk'u'j kyi'j qe nejenel kyxol xjal.

¹⁰Otoq b'aj txolin wi'je kyu'n kykyaqil nasyon tu'n kyq'ojin wi'je, ex noq tu'n tipumal Qman kub' kyi'j wu'ne.

¹¹Otoq b'aj kytxolb'an kyib' wi'jele, ex noq tu'n tipumal Qman kub' kyi'j wu'ne.

¹²Otoq b'aj kytxolb'an kyib' wi'je ik tza'n ttxu kab', ex jurat o b'aj kytx'u'jil, mer ik tza'n txqan ch'i'x jurat in b'aj tz'e'y tu'n q'aq'; noq tu'n tipumal Qman kub' kyi'j wu'ne.

¹³Inx lamo'ne kyu'n tu'n tkyaqil kyipun tu'n nkub' tz'aqe, ex ate Qman ul onil weye.

¹⁴Ok chin b'itzale te Qman aju q'ol wipumale, porke a klol weye.

¹⁵Tuj kyja xjal tz'aqlxix nno'k b'itz te tzalajb'il tu'nju otoq kub' kyi'j aj q'oj kyu'n. Tu'n tipumal Qman ma kub' kyi'j aj q'oj.

¹⁶Aju tipumal Qman nimxix toklen. Tu'n tipumal Qman ma kub' kyi'j aj q'oj, che chi xjal tuj kyb'itz.

¹⁷Mlay chin kyime, noq o'kx kukx chin anq'ile tu'n t-xi ntx'olb'a'ne tkyaqilju o tb'incha Qman.

¹⁸Kyuwxix ncastiwoye kub' tq'o'n Qman, ex minti' taq' amb'il tu'n nkyime.

¹⁹Kyjaqome tlamel tja Dios nwitze, ex waje tu'n wokxe q'olte chjonte te Qman.

²⁰Atzun ttzi tja Qman jlu, ex atzun che okex qe xjal tz'aqlxix.

²¹In xi nq'o'ne chjonte teya Nman tu'nju ma chin tzaj ttzaq'we'na ex tu'nju aya klol weye.

²²Aju ab'j el kyik'un qe b'inchal ja ma tz'ok te skyini te simyent.

²³A jlu ma tb'incha Qman ex in qo lab'in ti'j.

²⁴Atzun q'ij lu kyaj tma'n Qman tu'n tkub' qik'sa'n. Qo tzalajxix ti'j.

²⁵B'inchama xtalb'il Nman, qo tkloma. Ex b'inchama xtalb'il tu'n qtene b'a'n.

²⁶Ky'iwla'nxwit aju tzul, tu'n Qman ma tzaj sama'n. Max tuj tja Dios in che kub' qky'iwla'ne.

²⁷Ate Qman ax Dioste, ex a q'ol spik'un qib'aj. E t-xe't ninq'ij ex kyi'nxe tq'ab' tze' tu'n kypon max ttxlaj tcach altar.

²⁸In xi nq'o'ne chjonte teya tu'nju aya Ndiose, ex kxel nq'o'ne chjonte teya tu'nju ma' toklena.

²⁹Kyq'onxe chjonte te Qman porke b'a'nte ex minti' b'ajsb'il te tk'ujlalil.