Read kumam Salmos 119 Bible Online

Salmos 119 - kumam bible

Salmos 119

¹[1] At tzalajb'il kye qeju in che b'et minti' kypaltil ex in japun tley Qman kyu'n.

²At tzalajb'il kye qeju in kyb'incha'n aju in tma'n Dios tu'n tb'ant ex in che jyon ti'j Qman tu'n tkyaqil kyanmi,

³aqeju minti' in kyb'incha'n jun mya b'a'n, ex in che b'et tuj tb'e Qman.

⁴Aya o q'mante tu'n kyjapun qe t-xnaq'tzb'ila ik tza'nx kyten.

⁵Kukxwit chin tene wa'lxix tu'ntzun t-xi nnimane qe tleya.

⁶Mlay chin ch'ixwiye ok t-xi nnimane kykyaqil tmandamyenta.

⁷Axix tok kjawil nnimsa'ne tu'n wanmiye ok kyb'ant wu'ne qe tleya tz'aqlxix.

⁸Waje tu'n kyjapun qe tleya wu'ne. Mi'n chin kyaj tkolina te jumajx.

⁹¿Ti jaku tenb'a tu'n jun ku'xun tu'n tten tchwinqlal saq? O'kx tu'n tanq'in ik tza'nx in tma'n tyola.

¹⁰In chin jyone ti'ja tu'n tkyaqil wanmiye; mi'n taq'a amb'il tu'n tel npa'n wib'e kyi'j qe tmandamyenta.

¹¹O txi nk'u'ne qe tyola tuj wanmiye tu'ntzun mi'n nb'inchane il twitza.

¹²Nimanxwit tb'iya Nman. Chin t-xnaq'tzantza kyi'j qe tleya.

¹³O che'x nchik'b'a'ne kykyaqil qe tleya aqeju o tmaya.

¹⁴Mas in chin tzalaje tu'n wok lpe'ye kyi'j qe tmandamyenta twitz tkyaqil q'inumab'l.

¹⁵Chin b'el tene ximal kyi'j qe t-xnaq'tzb'ila ex k'okel nq'o'ne nwitze ti'j ju in b'ant tu'na.

¹⁶Chin tzalajele kyi'j qe tleya ex mlay tzik' tna'l tyola wu'ne.

¹⁷B'inchama b'a'n weye aqine tmajena, tu'ntzun wanq'ine ex tu'n t-xi nnimane tyola.

¹⁸Spik'b'ama tuj nnab'le tu'ntzun twile qe t-xnaq'tzb'ila ma'xix kyxilen ex tb'anilxix.

¹⁹B'etin xjal qine tzalu twitz tx'otx'. Mi'n tz'el tewana qe tmandamyenta nwitze.

²⁰Ma b'aj wipune tu'n tlaj waje tu'n wojtzqinteye qe tmandamyenta.

²¹In xi tmayo'na qeju in jaw kyniman kyib' ex mya b'a'n qe, aqeju nne'l kypa'n kyib' kyi'j qe tmandamyenta.

²²Laq'b'a'n ela qe wi'je tu'n mi'n kyxmayin wi'je ex tu'n mi'n wel ik'une kyu'n, porke ma txi nb'i'ne qe tmandamyenta.

²³Maske che yolin qe nejenel kyxol xjal tu'n kyb'inchante mya b'a'n wi'je, pero aqine tmajena kukx chin ximale kyi'j qe tleya.

²⁴In chin tzalaje kyi'j qe tmandamyenta; atzun qe jlu in che q'onte nnab'le.

²⁵Ch'ix nkyime; q'ontza nchwinqlale ik tza'nxju yol o tzaj ttziyana.

²⁶O txi nma'ne teya aju in b'aj wi'je, ex o chin tzaj ttzaq'we'na. Chin t-xnaq'tzantza kyi'j qe tleya.

²⁷Q'ontza nnab'le tu'ntzun nxi lpe'ye kyi'j qe t-xnaq'tzb'ila ex waje tu'n nximane kyi'j qe tb'inchb'ena ma' kyxilen.

²⁸In chin oq'e tu'nju at nimxix b'is tuj wanmiye; q'uqb'antza nk'u'je ik tza'nx ju yol o tzaj ttziyana.

²⁹Mi'n taq'a amb'il tu'n nnik'ane yol ex chin t-xtalintza kyu'n qe t-xnaq'tzb'ila.

³⁰O jaw nsk'o'ne ju b'e axix tok ex at nganiye kyi'j qe tleya.

³¹Nman, ma txi nq'on wib'e tu'n nnimane qe tmandamyenta; mi'n kub' tq'o'na nch'ixwiye.

³²Nno'k tilil wu'ne tu'n kyjapun qe tmandamyenta ex nojni wanmiye tu'n tzalajb'il tu'na.

³³Nman, chin t-xnaq'tzantza kyi'j qe tleya ex kukx che xel nnimane te jumajx.

³⁴Q'ontza nnab'le tu'ntzun tjapun t-xnaq'tzb'ila wu'ne; waje tu'n t-xi nnimane tu'n tkyaqil wanmiye.

³⁵Onintza qine tu'n nnimane tmandamyenta, ex atzun in knet tzalajb'il wu'ne.

³⁶Q'ontza nganiye kyi'j qe tmandamyenta ex mya ti'j kamb'ab'l in knet mya tuj tumel.

³⁷Mi'n taq'a amb'il tu'n tok ten nwitze kyi'j qeju mya ax tok dios qe; q'ontza nchwinqlale tu'n nb'ete tuj tb'eya.

³⁸Aqine tmajena, japunx tu'na wuk'ile aju yol o tzaj ttziyana kye qeju in che niman teya.

³⁹Laq'b'a'n ela wi'je aju xmayb'il in chin xob'e ti'j, porke b'a'n qe tleya.

⁴⁰At-xix nganiye kyi'j qe t-xnaq'tzb'ila; q'ontza nchwinqlale porke tz'aqlxix teya.

⁴¹Nman, yek'untza weye aju tk'ujlalila ex ju kolb'il tu'na, ik tza'nx o tzaj ttziyana.

⁴²Kyja'tzun jaku tzaq'wet wu'ne aju in xmayin wi'je tu'nju q'uql nk'u'je ti'j tyola.

⁴³Chin tonintza tu'n kukx nyoline ti'j ju yol ax tok porke ma qe' nk'u'je ti'j tleya.

⁴⁴Kukx che japunel qe tleya wu'ne tuj tkyaqil wanq'ib'le.

⁴⁵Kyja'tzun jaku chin anq'ine tzoqpi'ntl qine, tu'nju otoq chinx lpe'ye kyi'j t-xnaq'tzb'ila.

⁴⁶Ok chin yolile kyi'j qe tmandamyenta kywitz qe rey ex mlay tzaj nch'ixwiye,

⁴⁷porke k'ujla'n qe tmandamyenta wu'ne ex in chin tzalaje kyi'j.

⁴⁸K'ujla'n qe tmandamyenta wu'ne ex at nganiye kyi'j, ex nimxix in chin ximane kyi'j qe tleya.

⁴⁹Na'ntza aju yol tzaj tma'na weye, aqine tmajena; aju tzaj tma'na tu'n tqe' nk'u'je ti'j.

⁵⁰Atzun jlu ma tz'ok te q'uqb'ab'l nk'u'je tuj b'is: Tu'nju yol tzaj ttziyana ma tzaj tq'o'na nchwinqlale.

⁵¹Qeju in jaw kyniman kyib' minti' in xi kykolin tu'n kyxmayin wi'je, atzun weye mlay tz'el npa'n wib'e ti'j tleya.

⁵²Na'n wu'ne aju tzaj tma'na ojtxi tu'n tb'ant qu'ne, ex kyi'jtzun jlu in knet q'uqb'ab'l nk'u'je, Nman.

⁵³Ma tzaj ntx'u'jile kyi'j qe xjal mya b'a'n tu'nju in kyaj kykolin tleya.

⁵⁴In chin b'itzane kyi'j qe tleya tuj tx'otx' jatum atine ik tza'n b'etin xjal.

⁵⁵Nman, qonik'an in tzaj nna'ne tb'iya; ex kjapunel tleya wu'ne.

⁵⁶Atzun jlu kb'antel wu'ne: Kxel nnimane qe t-xnaq'tzb'ila.

⁵⁷Nman, o'kx aya wetzb'ile, o txi ntziyane tu'n t-xi nnimane tyola.

⁵⁸Tu'n tkyaqil wanmiye ma chin kub'sane twitza, chin t-xtalin kub'a ik tza'nxju yol o tzaj ttziyana.

⁵⁹In kub' tene ximal ti'j ju in b'ant wu'ne, ex in ajtz meltz'aje juntl maj tu'n t-xi nnimane qe tmandamyenta.

⁶⁰Ok tilil wu'ne, jurat naj xi nnimane tmandamyenta.

⁶¹Ma b'aj kytxolin kyib' qe b'inchal mya b'a'n wi'je tu'n ntzyete kyu'n, ex minti' ma tzik' kyna'njtz qe tleya wu'ne.

⁶²Tmij aq'b'il in chin jaw we'ye q'ol chjonte teya kyi'j qe tleya tz'aqlxix.

⁶³Wamiw wib'e kyuk'il qeju in che niman teya ex kyuk'il qeju in che japun qe tleya kyu'n.

⁶⁴Nman, nojni twitz tx'otx' tu'n tk'ujlalila; chin t-xnaq'tzantza kyi'j qe tleya.

⁶⁵Nman, ma tb'inchaya b'a'n weye, aqine tmajena, ik tza'nx ju yol o tzaj ttziyana.

⁶⁶Chin t-xnaq'tzantza tu'n tten nnab'le ex wojtzqib'le, porke q'uql nk'u'je kyi'j qe tmandamyenta.

⁶⁷Tej na'nxtoq nyajlanjtze, in el txalpuje ti'j tb'eya, atzun ja'lo in xi nnimane tyola.

⁶⁸B'a'n teya ex in tb'incha'na aju b'a'n; chin t-xnaq'tzantza kyi'j qe tleya.

⁶⁹Qeju in jaw kyniman kyib' in xi kynik'an yol wi'je, ex in che japun qe t-xnaq'tzb'ila wu'ne tu'n tkyaqil wanmiye.

⁷⁰Tzpetni ta' kynab'l, atzun weye in chin tzalaje ti'j tleya.

⁷¹B'a'n ok te weye tej nyajlanjtze, kyja'tzun tten el nnik'e kyi'j qe tleya.

⁷²Te weye mas ma' toklen aju xnaq'tzb'il tzaj tq'o'na twitz nimku q'an pwaq ex saq pwaq.

⁷³Tu'na kub' tb'incha'na qine; q'ontza nnab'le tu'n tel nnik'e kyi'j qe tmandamyenta.

⁷⁴Qeju in che niman teya che tzalajel ok wok kyke'yin, porke ma tz'ok qe' nk'u'je ti'j tyola.

⁷⁵Nman, b'a'n wu'ne tz'aqlxix qe tleya ex tuj tumel in yajlanjtze tu'na.

⁷⁶Tz'ajb'enwt tk'ujlalila te q'uqb'ab'l nk'u'je, ik tza'nx ju yol tzaj ttziyana weye.

⁷⁷Tzaj tz'e'y tk'u'ja wi'je tu'ntzun wanq'ine, porke in chin tzalaje ti'j tleya.

⁷⁸Tzajxwit kych'ixwi qeju in jaw kyniman kyib' ex qeju noq elajx in chin ok kyyaso'n; waje tu'n nximane kyi'j qe t-xnaq'tzb'ila.

⁷⁹Tz'okwit kychmon kyib' wuk'ile qeju in che niman teya, aqeju ojtzqi'n qe tmandamyenta kyu'n.

⁸⁰Kuchiwt tu'n wok lpe'ye kyi'j qe t-xnaq'tzb'ila tu'n tkyaqil wanmiye, tu'ntzun mi'n njaw ch'ixwiye.

⁸¹Nib'an tb'aj wipune tu'n tlaj in chin ayone ti'j tu'n nklete tu'na; pero ma tz'ok qe' nk'u'je ti'j tyola.

⁸²Nib'an tb'aj kyipun qe tb'aq' nwitze tu'nju in chin ayone ti'j tu'n tjapun ju yol o tzaj ttziyana, ex in nma'ne: ¿Jtoj b'an ttzaja q'uqb'alte nk'u'je?

⁸³Maske ma chin tijine ex minti'tl wajb'ene, pero minti' nnik' kyna'njtz qe tleya wu'ne.

⁸⁴¿Jte' q'ijtl tu'n nyone ti'j? ¿Jtoj b'an tkub' tq'o'na kysentens qeju in che yajlante weye?

⁸⁵Qe xjal in jaw kyniman kyib' ex minti' in xi kyniman tleya ma ku'x kylaku'n jun jul tu'n nxi tz'aqe tuj.

⁸⁶Chin tonintza, ex noqx gan in chin b'aj yajla'ne. Kykyaqil tmandamyenta axix tok qe.

⁸⁷Ch'ixmi in kub' b'yo'ne kyu'n xjal, pero minti' kyaj nkoline qe t-xnaq'tzb'ila.

⁸⁸Q'ontza nchwinqlale ik tza'nx tk'ujlalila tu'ntzun kyjapun qe tmandamyenta wu'ne.

⁸⁹Nman, te jumajx ktel tyola kyuwsa'maj max tuj kya'j.

⁹⁰Aju yol in tzaj ttziyana kukx in japun tu'na; tu'na kub' tb'incha'na aju tx'otx' ex kukx tten.

⁹¹Kykyaqil ti'xti kukx wa'lx qe ik tza'n kyaj tma'na, ex kykyaqil in che ajb'en teya.

⁹²Noqwit minti' in tzaj ti'n t-xnaq'tzb'ila tzalajb'il weye, mawtlo chin naje tu'n b'is.

⁹³Mlayx tzik' kyna'njtz qe t-xnaq'tzb'ila wu'ne, porke kyu'n qe jlu ma tzaj tq'o'na nchwinqlale.

⁹⁴Chin tkloma porke teya qine ex ma chin ok lpe'ye kyi'j qe t-xnaq'tzb'ila.

⁹⁵Qe xjal mya b'a'n o'kx in che ayon ti'j tu'n nnaje kyu'n, atzun weye o'kx in chin ximane kyi'j qe tmandamyenta.

⁹⁶Ma wile, kykyaqil ti'xti at jatum tu'n kypon b'aj, atzun qe tmandamyenta minti' b'ajsb'il kye.

⁹⁷K'ujla'nxix tleya wu'ne. Tkyaqil q'ij in chin ximane ti'j.

⁹⁸Kyu'n qe tmandamyenta at mas nnab'le kywitz aj q'oj wi'je tu'nju kukx ate' qe tmandamyenta wuk'ile.

⁹⁹Mas ma tzik' nnab'le kywitz qe xnaq'tzal weye tu'nju kukx in chin ximane ti'j ju in tma'na weye tu'n nb'inchanteye.

¹⁰⁰Mas ma tzik' nnab'le kywitz qe tij xjal tu'nju niman qe tmandamyenta wu'ne.

¹⁰¹Ma tz'el npa'n wib'e ti'j tkyaqil b'e mya b'a'n tu'ntzun tjapun tyola wu'ne.

¹⁰²B'ajx tz'el npa'n wib'e kyi'j qe tmandamyenta tu'nju aya xnaq'tzal weye.

¹⁰³Aju yol tzaj ttziyana weye mas chi' nne'l tuj ntzi'ye twitz ta'l kab'.

¹⁰⁴Kyu'n qe tmandamyenta ma tz'ok nnab'le, kyja'tzun nne'l wik'une tkyaqil xnaq'tzb'il nik'aj yol.

¹⁰⁵Ik tten tyola ik tza'n jun kandil te ẍaqlul weye, in tq'o'n spik'un tuj nb'eye.

¹⁰⁶Xi ntziyane jun nyole axix tok ex kjapunel wu'ne; qe tmandamyenta tz'aqlxix che japunel wu'ne.

¹⁰⁷Nman, nimxix yajb'il ma tzaj wi'je, q'ontza wanq'ib'le ik tza'n o tzaj ttziyana.

¹⁰⁸K'monxa nyole te aq'b'il chjonte teya Nman, ex chin t-xnaq'tzantza kyi'j qe tmandamyenta.

¹⁰⁹Kukx nne'lje' wi'je tu'n nkyime, ex mlay tzik' tna'l tleya wu'ne.

¹¹⁰Qe xjal mya b'a'n in kub' kyq'o'n k'ob'il tuj nb'eye, ex b'ajx tz'el npa'n wib'e kyi'j qe t-xnaq'tzb'ila.

¹¹¹Ma che ok qe tmandamyenta te jun wetzb'ile te jumajx porke in kyq'o'n tzalajb'il te wanmiye.

¹¹²Tu'n tkyaqil wanmiye ma kub' nximane tu'n kyjapun qe tleya wu'ne te jumajx.

¹¹³In che el wik'une qe xjal xmletz', atzunju tleya k'ujla'n wu'ne.

¹¹⁴Aya klol weye ik tza'n jun maqb'il tu'n nklete; ma tz'ok qe' nk'u'je ti'j tyola.

¹¹⁵Kylaq'b'amil kyib'e wi'je aqeye xjal mya b'a'n, porke waje tu'n kyjapun wu'ne qe tmandamyent Ndiose.

¹¹⁶Q'ontza wipune ik tza'nxju yol o tzaj ttziyana, tu'ntzun wanq'ine; japunx tu'na aju tzaj ttziyana, tu'ntzun mi'n wele tuj nch'ixwiye.

¹¹⁷Chin tonintza ex jaku chin klete; kyja'tzun kukx che japunel qe tleya wu'ne.

¹¹⁸In che el tik'una qeju nne'l kypa'n kyib' kyi'j qe tleya porke minti' tnab'l kyximb'etz.

¹¹⁹Qe xjal mya b'a'n ate' twitz tx'otx' in che el tik'una ik tza'n tz'is; kyja'tzun k'ujla'n qe tmandamyenta wu'ne.

¹²⁰In lu'lun nximlale tu'nju in chin xob'e twitza; ma tzaj t-xob'il wi'je kyu'n qeju castiw tu'na.

¹²¹B'ajx txi nkoline tu'n nb'inchanteye aju tz'aqlxix; mi'n chinx tq'o'na tuj kyq'ab' qeju yajlal weye.

¹²²Tkyaj we'ya wi'je tu'n tb'inchanteya b'a'n weye; tu'n mi'n nb'aj kyyaso'n qeju in jaw kyniman kyib'.

¹²³Nib'an tb'aj kyipun qe tb'aq' nwitze tu'n tlaj in chin ayone tu'n nklete tu'na, in chin ayone tu'n ntzoqpete tu'na ik tza'nx o tzaj ttziyana.

¹²⁴Xtalin kub'a qine tu'nju tk'ujlalila, aqine tmajena; chin t-xnaq'tzantza kyi'j qe tleya.

¹²⁵Aqine tmajena. Q'ontza nnab'le ex waje tu'n tel nnik'e kyi'j qe tmandamyenta.

¹²⁶Nman, ma pon tq'ijlalil tu'n tkub' kycastiw tu'na porke minti' o txi kyniman tleya.

¹²⁷Kyja'tzun in nk'ujla'ne qe tmandamyenta mas twitz q'an pwaq tb'anilxix.

¹²⁸Kyja'tzun in chinx lpe'ye kyi'j qe t-xnaq'tzb'ila ex nne'l wik'une kykyaqil xnaq'tzb'il nik'aj yol.

¹²⁹Ma' t-xilen tkyaqilju t-xnaq'tzb'ila, kyja'tzun niman wu'ne.

¹³⁰Aju chik'b'ab'l ti'j tyola in t-spik'b'a'n tuj qnab'le ex in tq'o'n kynab'l qe xjal ch'in kynab'l.

¹³¹Nimxix waje kyi'j qe tmandamyenta.

¹³²Chin tke'yintza ex tzajx tz'e'y tk'u'ja wi'je ik tza'n in tb'incha'na kyi'j qeju in che k'ujlan teya.

¹³³Chin t-ẍaqluma ik tza'nx in tma'n tyola, ex mi'n taq'a amb'il tu'n tkub' wi'je tu'nju mya b'a'n.

¹³⁴Chin tkloma teju yajb'il weye kyu'n xjal ex waje tu'n kyjapun qe tmandamyenta wu'ne.

¹³⁵Chin tke'yintza tu'n tzalajb'il, aqine tmajena, ex chin t-xnaq'tzantza tu'n tel nnik'e kyi'j qe tleya.

¹³⁶Nimxix ta'l nwitze nne'l mer ik tza'n jun nima, porke minti' in xi niman t-xnaq'tzb'ila kyu'n xjal.

¹³⁷Tz'aqlxix teya Nman, ex tz'aqlxix qe tmandamyenta.

¹³⁸Aju tmaya qeye tu'n qb'inchanteye, tz'aqlxix ex ax tok.

¹³⁹Ma tzaj tlo'ch nk'u'je, porke qe aj q'oj wi'je minti' kyaj ti'j tyola.

¹⁴⁰Aju tyola minti' tpaltil, kyja'tzun k'ujla'n wu'ne, aqine tmajena.

¹⁴¹Noq ch'in woklene ex ik'un qine kyu'n xjal, pero minti' ma tzik' kyna'l qe tmandamyenta wu'ne.

¹⁴²Tz'aqlxix teya te jumajx, ex aju xnaq'tzb'il tu'na axix tok.

¹⁴³O chin tene tuj k'ixk'oj ex tuj b'is, ex aqe tmandamyenta e tzalajsante weye.

¹⁴⁴Qe tmandamyenta tz'aqlxix qe te jumajx; q'ontza nnab'le tu'n wanq'ine.

¹⁴⁵Nman, in chin kub'sane twitza tu'n tkyaqil wanmiye; chin ttzaq'wentza, waje tu'n kyjapun qe tleya wu'ne.

¹⁴⁶Twitza in chin kub'sane, chin tonintza tu'ntzun kyjapun qe tmandamyenta wu'ne.

¹⁴⁷Na'nxtoq tkub' q'ij, in chin jaw we'ye qanil onb'il teya; ma tz'ok qe' nk'u'je ti'j tyola.

¹⁴⁸In chin itz'lene enter aq'b'il tu'ntzun nximane ti'j ju yol o tzaj ttziyana.

¹⁴⁹B'intza tq'ajq'ajel nwi'ye Nman noq tu'nju tk'ujlalila; q'ontza nchwinqlale ik tza'nx tajb'ila.

¹⁵⁰Niqayin ate' wi'je qe yajlal weye mya b'a'n qe, ex najchaq kyelsa'n ti'j tleya.

¹⁵¹Niqayin ta'ya Nman, ex kykyaqil qe tmandamyenta axix tok qe.

¹⁵²Atxix ojtxi wojtzqiye qe tmandamyenta, aqeju e kyaj b'ant tu'na te jumajx.

¹⁵³Ke'yintza aju yajb'il weye ex chin tkloma porke minti' nnik' tna'njtz tleya wu'ne.

¹⁵⁴Yolina wi'je tu'n nklete ex kolpima qine, q'ontza nchwinqlale ik tza'nx ju yol o tzaj ttziyana.

¹⁵⁵Mlayx che klet qe xjal mya b'a'n porke minti' in che ok lpe' kyi'j qe tleya.

¹⁵⁶Nman, nim tq'aq'b'il tk'u'ja; q'ontza nchwinqlale ik tza'nx tajb'ila.

¹⁵⁷Nim kyajlal qe aj q'oj wi'je ex yajlal weye, pero minti' nne'l npa'n wib'e kyi'j qe tmandamyenta.

¹⁵⁸Minti' in kub' tuj nwitze qe xjal in che ok meltz'aj ti'ja tu'nju minti' in xi kyniman qe tmandamyenta.

¹⁵⁹Nman, ke'yintza nim in nk'ujla'ne qe t-xnaq'tzb'ila; q'ontza nchwinqlale tu'nju tk'ujlalila.

¹⁶⁰Kykyaqil qe tyola axix tok qe; kykyaqil qe tleya tz'aqlxix qe ex te jumajx qe.

¹⁶¹Qe nejenel kyxol xjal noqx gan in chin b'aj yajla'ne kyu'n, atzun weye in chin xob'e tu'n tyola.

¹⁶²In chin tzalaje tu'nju yol o tzaj ttziyana, ik tza'n jun xjal otoq tz'ok noj ti'j jun nintz q'inumab'l.

¹⁶³Nne'l wik'une aju nik'aj yol ex minti' in kub' tuj nwitze, pero in nk'ujla'ne aju tleya.

¹⁶⁴Tkyaqil or in jaw nnimsa'ne tb'iya noq tu'nju tz'aqlxix qe tleya.

¹⁶⁵Qeju in kyk'ujla'n qe tleya txub'txaj ate', ex noq alkyex ma tzaj kyi'j, mlay che kub' tz'aq.

¹⁶⁶Nman, chin ayole ti'j tu'n nklete tu'na, porke ma che japun qe tmandamyenta wu'ne.

¹⁶⁷In che'x nnimane qe tmandamyenta ex in che nk'ujla'ne tu'n tkyaqil wanmiye.

¹⁶⁸In che'x nnimane qe t-xnaq'tzb'ila ex qe tmandamyenta; ojtzqi'n tu'na kykyaqil qe nb'inchb'ene.

¹⁶⁹Ok njaw sch'ine, ponxwit tq'ajq'ajel nwi'ye twitza Nman; q'ontza nnab'le ik tza'nx tyola.

¹⁷⁰Ponxwit aju nna'j Diose twitza; chin tkloma ik tza'nx o tzaj ttziyana.

¹⁷¹Kuchiwt kukx jaw nnimsa'ne tb'iya, porke o chin tzaj t-xnaq'tza'na kyi'j qe tleya.

¹⁷²Kuchiwt kukx t-xi nb'itzane jun b'itz ti'j ju yol o tzaj ttziyana, porke kykyaqil qe tmandamyenta tz'aqlxix qe.

¹⁷³Noq tenkuya tu'n ttzaj tq'o'na onb'il weye, porke o jaw nsk'o'ne qe t-xnaq'tzb'ila.

¹⁷⁴Nman, waje tu'n nklete tu'na. In chin tzalaje ti'j tleya.

¹⁷⁵Waje chin anq'ine tu'n tjaw nnimsa'ne tb'iya; awt ju tb'inchb'ena tz'aqlxix onin wi'je.

¹⁷⁶Ma chin el tzpete ik tza'n jun ẍne'l; tzaja jyolte weye porke minti' nnik' kyna'l qe tmandamyenta wu'ne.