Read kumam Salmos 135 Bible Online

Salmos 135 - kumam bible

Salmos 135

¹Nimanxwit te Qman. Kynimsa'n jawe tb'i Qman; kynimsa'n jawe, aqeye tmajen,

²aqeye ate' tuj tja Qman ex ate'ye ttxa'n pe'n twitz tja Qman Dios.

³Kynimsa'n jawe Qman porke b'a'n te; kyb'itzanxe qe b'itz te nimb'il tb'i tu'nju at xtalb'il tuk'il.

⁴Porke tu'n e jaw t-sk'o'n qe tiyjil Jacob, aqeju aj Israel qe, tu'n kyok te tekuxix.

⁵B'a'n wu'ne ma'xix toklen Qman Dios kywitz kykyaqil qe tilb'ilal nno'k kydiosin xjal.

⁶In tb'incha'n Qman tkyaqil noq alkye tajb'il, tza'nx tuj kya'j ax ikx twitz tx'otx', tza'nx tuj mar ax ikx max t-xe'pun.

⁷In jaw jlet muj tu'n max ttxa'npun tx'otx', in tzaj tq'o'n xle'laj kya'j junx tuk'il jb'al, ex nne'tz ti'n kyq'iq' tuj tkub'il.

⁸Tu'n e kub' tb'yo'n kykyaqil qe nej kyk'wa'l aj Egipto ex qe nej kyal alumaj.

⁹Tuj tnam Egipto tb'incha qe techal ex qe b'inchb'en ma'xix kyipumal ti'j rey Faraón ex kyi'j qe xjal at kyoklen ttxlaj.

¹⁰E naj nimku nasyon tu'n, e kub' tb'yo'n qe rey nimxix kyipumal:

¹¹O kub' Sehón aju rey kye aj Amorreo, tuk'ix Og aju rey tuj tx'otx' Basán, ex kyuk'ix kykyaqil qe rey tuj Canaán;

¹²ex xi tq'o'n kytx'otx' qe rey lu te kyetzb'il aj Israel, aqeju etzan tu'n.

¹³Nman, ktel tb'iya te jumajx; kukx ktzajel na'n tb'iya kyu'n kykyaqil k'loj xjal.

¹⁴In xi tb'incha'n Qman kyi'j qe xjal etzan tu'n; at tq'aq'b'il tk'u'j kyi'j qe tmajen.

¹⁵Qe tilb'ilal nno'k kydiosin xjal mya okslal ti'j Dios, q'an pwaq ex saq pwaq kytx'otx'il, aqe jlu tb'inchb'en kyq'ab' xjal qe.

¹⁶At kytzi', ex mib'an che yolin; at tb'aq' kywitz, ex mib'an che ke'yin;

¹⁷at kyẍkyin, ex mib'an che b'in; ex minti' kyxew in jatz.

¹⁸Aqeju b'inchal kye ikx kyten ik tza'n qe tilb'ilal lu, ax ikx qeju in qe' kyk'u'j kyi'j.

¹⁹Aqeye aj Israel, kynimsa'n jawe tb'i Qman, aqeye tiyjil Aarón, kynimsa'n jawe tb'i Qman,

²⁰aqeye aj Leví, kynimsa'n jawe tb'i Qman; aqeye in che niman te Qman, kynimsa'n jawe tb'i.

²¹Nimanxwit tb'i Qman tuj tnam Sión, aju Qman najl tuj Jerusalén. Nimanxwit te Qman.