Read kumam Salmos 139 Bible Online

Salmos 139 - kumam bible

Salmos 139

¹B'itz tu'n David Nman Dios, aya xpich'ul weye ex ojtzqi'ntl qine tu'na;

²ojtzqi'n tu'na tkyaqilju in b'ant wu'ne; maske najchaq ta'ya, ex b'a'ntl nximb'etze tu'na.

³Ojtzqi'ntl tu'na qa in chin b'ete ex qa in chin ojlane, b'a'ntl tu'na tkyaqilju in b'ant wu'ne.

⁴Ok na'nxtoq tetz jun yol tuj ntzi'ye, lu ojtzqi'ntl tkyaqil tu'na, Nman.

⁵Txolin wi'je tu'na; ex tzyu'n qine tu'n tq'ab'a.

⁶Nimxix nne'la tnab'la tuj nwitze, mlayx kanun nnab'le ti'j ex ma' t-xilen, tu'ntzunju mlayx chin kanune tu'n tel nnik'e ti'j.

⁷¿Tza'n b'an nxi'ye najchaq twitz T-xewa? ¿Ex tza'n b'an nxi oqe twitza?

⁸Qa ma chin jaxe max twitz kya'j, atzun ta'ya ma chixin, ex qa ma chin ku'xe t-xe'pun tx'otx' jatum ta' kynajb'il kyimni, ex axtzun ta'ya ma chixin;

⁹qa ma chinx lipane jatum in tzaj spik'e' t-xe kya'j, ex qa ma chin najane jlajxi mar tuj telex q'ij,

¹⁰ax ikx ma chixin ẍaqlu'n qine tu'n tq'ab'a, ex mlayx chinx ttzoqpi'n tb'anq'ab'a.

¹¹Qa ma kub' nximane tu'n tkub' wewan wib'e tuj qlolj, ex qa ma kub' nximane tu'n tch'expet spik'un at wi'jele tu'n tok te qlolj,

¹²mlayx b'ant tu'n nkub' ewane tu'n qlolj twitza; porke in qoptz'aj qonik'an twitza ik tza'n q'ijl. Junx nne'la qlolj teya ik tza'n spik'un.

¹³Aya b'inchante nximlale; tu'na in b'ante tuj talb'il ntxu'ye.

¹⁴Kxel nq'o'ne chjonte teya tu'nju ma'xix t-xilen taq'unb'ena; in chin lab'ine ti'j ex ma tz'el nnik'e ti'j ax tok jlu.

¹⁵Minti' ewat nximlale twitza tej twiniqax ex tej nb'ante tuj ewaj tuj talb'il ntxu'ye, ax ikx tej nwiniqaxe tuj ewaj, mer ik tza'nku t-xe'pun tx'otx' tuj qlolj.

¹⁶O chin tila tej matoq in chin winiqaxe; tkyaqil jlu tz'ib'amaj tuj tu'ja. Ximamajtl tu'na jte' ab'q'i tu'n ntene tej na'nxtoq wul itz'je.

¹⁷Nman Dios, ma'xix t-xilen t-ximb'etza tuj nwitze ex nimxix kyajlal.

¹⁸Noqwit chin ok tene ajlal kye, maslo nim kyajlal twitz ttxa tz'a'n; ex ok tel nwatle ax atine tuk'ila.

¹⁹Nman Dios, b'yonkuya qeju b'inchal mya b'a'n, ex laq'b'a'mila wi'je qe b'yol xjal,

²⁰ex qeju in che xmayin ti'ja, aqeju in che q'ojin ti'ja noqx gan.

²¹Nman, in che el wik'une qeju in che ik'un teya. Nk'i'ye tu'n ntene kyxol aj q'oj ti'ja.

²²Te jumajx ma che el wik'une. Ma che ok nq'o'ne te aj q'oj wi'je.

²³Nman Dios, chin t-xpich'un b'aja ex ojtzqima wanmiye; e tik' twitza wi'je ex ojtzqima tuj nnab'le;

²⁴ex ke'yintza qa in chin b'ete tuj b'e mya b'a'n, ex chin t-ẍaqluma tuj b'e te jumajx.