Read kumam Salmos 140 Bible Online

Salmos 140 - kumam bible

Salmos 140

¹Nman, chin tkloma kywitz qe xjal mya b'a'n; kolina wi'je kywitz qe xjal jawni kywitz tu'n kyq'ojin,

²ex kywitz qeju o'kx in che ximan ti'j tu'n kyb'inchante mya b'a'n ex tkyaqil q'ij in tzaj q'oj kyu'n.

³Puro tz'u'p twi' kyaq' ik tza'n taq' jun lob'aj; ik tten kyyol ik tza'n tvenen q'anti'.

⁴Nman, kolina wi'je tuj kyq'ab' qe xjal mya b'a'n, kolina wi'je kywitz qe xjal jawni kywitz tu'n kyq'ojin ex kywitz qeju in che ximan ti'j tu'n nkub' tz'aqe.

⁵Aqeju in jaw kyniman kyib' ma kub' kyq'o'n jun k'ob'il wi'je; ma kub' kylik'un qe xyub' ex qe saqb'aq tuj b'e te k'ob'il weye.

⁶O txi nma'ne teya kyja' Nman Dios: Aya Ndiose, nchiye. Nman, b'intza nqanb'etze ok nqanine onb'il teya.

⁷Nman Dios, aya kolol weye ma'xix tipumal, aya in kolin ti'j nwi'ye tuj q'oj.

⁸Nman, mi'n txi tq'o'na kye qe xjal mya b'a'n aju in pon kyk'u'j ti'j; mi'n taq'a amb'il tu'n tjapun aju in kub' kyximan, tu'ntzun mi'n tjaw kyniman kyib'.

⁹Qeju txolin kyten wi'jele e tkub' tz'aq kyib'ajx aju mya b'a'n in tzaj kyqanin tib'aj juntl.

¹⁰E tkub' tz'aq xq'a'l in k'ant tu'n q'aq' kyib'aj; e kyxi xo'n tuj jul jalo ponin t-xe' jatum mlay che jatztl.

¹¹Mi'nwt kukx tten twitz tx'otx' aju xjal si'mil yol; b'ajwit yajla'n tu'n mya b'a'n aju xjal jawni twitz tu'n tq'ojin, ex najxwit tu'n.

¹²B'a'n wu'ne in xi tb'incha'n Qman kyi'j qe meb'a ex in kolin kyi'j qe xjal atx taj kye.

¹³Qe xjal tz'aqlxix kjawil kynimsa'n tb'iya; qe xjal in che b'et tuj tumel che najal twitza.