Read kumam Salmos 145 Bible Online

Salmos 145 - kumam bible

Salmos 145

¹B'itz tu'n David te nimsab'l tb'i Dios Nman Dios ex Nreye, kjawil nnimsa'ne tb'iya tu'nju ma' toklena, ex kxel nq'o'ne chjonte teya te jumajx.

²Tkyaqil q'ij kxel nq'o'ne chjonte teya ex kjawil nnimsa'ne tb'iya te jumajx.

³B'a'n tu'n tjaw qnimsa'n tb'i Qman tu'nju ma' toklen. Mlay tz'el b'aj qnik' ti'j toklen ma'xix.

⁴Kxel kytx'olb'a'n qe mamb'aj kye kyk'wa'l kyi'j qe tb'inchb'ena nim kyipumal, ex kxel kyq'o'n chjonte teya ti'j taq'unb'ena.

⁵Che yolil ti'j tajwalila ex ti'j toklena ma'xix, atzun weye chin yolile ti'j tb'inchb'ena ma' t-xilen.

⁶Che yolil ti'j tb'inchb'ena ma' tipumal ex xob'ajilxix, atzun weye chin yolile ti'j toklena ma'xix.

⁷Che yolil ti'j t-xtalb'ila ma'xix, ex che b'itzal tu'n kymante qa aya tz'aqlxix.

⁸In q'aq'an tk'u'j Qman qi'j ex in tz'e'y tk'u'j qi'j; yaj in tzaj tq'oj ex nim tk'ujlalil qi'j.

⁹B'a'nte Qman kyuk'il kykyaqil, ex k'ujla'n kykyaqil tch'isb'en tu'n.

¹⁰Nman, kykyaqil tch'isb'ena b'a'n tu'n t-xi kyq'o'n chjonte teya, ex qe okslal ti'ja b'a'n tu'n t-xi kyq'o'n chjonte teya.

¹¹B'a'n tu'n kyyolin ti'j tajwalila tuj tkawb'ila, ex b'a'n tu'n kyyolin kyi'j qe tb'inchb'ena ma'xix kyipumal.

¹²B'a'n tu'n kyyolin qe xjal ti'j tipumala ex ti'j tajwalila tuj tkawb'ila.

¹³Minti' b'ajsb'il te tkawb'ila, ex kkawila tuj tkyaqil tab'q'iyil te jumajx.

¹⁴Ate Qman onil kye qeju in che jaw tolj ex in che jaw twab'an qeju kyja' kyik' tz'aq.

¹⁵Kykyaqil in che ke'yin ti'ja ex in che ayon tu'n kyxi tk'a'chana ok tpon tajb'en kye.

¹⁶Tkyaqil in xi tq'o'na kye ax tu'n t-xtalb'ila, ex in che noj kykyaqil qe tch'isb'ena.

¹⁷Tz'aqlxix te Qman tuj tkyaqilju in tb'incha'n, ex at tk'ujlalil kyi'j kykyaqil.

¹⁸Niqayin ta' Qman kyi'j qeju in che kub'san twitz, aqeju axix tok kyu'n.

¹⁹In xi tq'o'n aju in kyqanin qeju in che niman te, ex ok t-xi kyqanin onb'il te in che tzaj tb'i'n ex in che klet tu'n.

²⁰Ate Qman klol kye qeju in che k'ujlan te, atzun qe xjal mya b'a'n in che naj tu'n.

²¹Kjawil nnimsa'ne tb'i Qman, ex b'a'n tu'n tjaw nimsa'n tb'i xjan kyu'n kykyaqil xjal, te ja'lo ex te jumajx.