Read kumam Salmos 147 Bible Online

Salmos 147 - kumam bible

Salmos 147

¹Nimanxwit tb'i Qman. B'a'n tu'n qb'itzan b'itz te nimb'il te Qdios. B'a'n tu'n t-xi q'ot nimb'il tb'anilxix te.

²In jaw tb'incha'n Qman juntl maj aju tnam Jerusalén ex in che ok tchmo'n qe aj Israel ma che el sputj.

³Nne'l ti'n b'is tuj kyanmi qeju nim in che b'isun, ex nno'k tq'anan aju k'ixb'len kyi'j.

⁴In b'aj tajla'n jte' kyb'aj qe che'w, ex tok tb'i teyle junjun tu'n.

⁵Ma'xix te Qman Dios, ex ma'xix tipumal ex minti' b'ajsb'il te tojtzqib'l.

⁶In jaw tnimsa'n Qman qe xjal mans, atzun qe xjal mya b'a'n b'i'x nne'l ti'n kyoklen.

⁷Che b'itzane te Qman Dios tuk'il aq'b'il chjonte; che b'itzane b'itz te nimb'il te tuk'il tq'ajq'ajel twi chnab' arpa.

⁸Tu'n nno'k muj twitz kya'j, tu'n in tzaj jb'al twitz tx'otx', tu'n in tzaj ch'iy ch'im kywi witz,

⁹tu'n in xi tq'o'n kywa qe alumaj ex kywa kyal qe joj ok in che jaw oq'.

¹⁰Minti' tajb'en te Qman qe chej nim kyipun ex minti' in tzalaj ti'j xjal kyuw qelan tuj q'oj;

¹¹o'kx in jaw tzalaj kyi'j qeju in che niman te, ex kyi'j qeju q'uql kyk'u'j ti'j tk'ujlalil.

¹²Aqeye najl tuj tnam Jerusalén, kynimsa'n jawe tb'i Qman; aqeye najl tuj tnam Sión, kynimsa'n jawe tb'i Kydiose.

¹³Porke ma tz'ok tkyuwsa'n qe trank kyoksa'n kywitz qe tlamel tnam, ex ma che kub' tky'iwla'n qe xjal ate' tuj tnam.

¹⁴Tu'n ma we' q'oj tuj kytanmiye ex ma che ten xjal tuj tzalajb'il ex ma che noje tu'nju tb'anil triw tu'n.

¹⁵Tu'n in tzaj tma'n alkye tu'n tb'ant tzalu twitz tx'otx', ex aju in tzaj tma'n jurat in b'ant.

¹⁶In tzaj tq'o'n tq'ab' che'w ex nno'k tu'n mer ik tza'n lan, ex tu'n in b'aj t-sputun ttxa che'w mer ik tza'n tza'j.

¹⁷In tzaj t-sama'n saqb'aqun mer ik tza'n tal ab'j qe; tu'nju che'w in tzaj t-sama'n in jaw ttuxin tib' a'.

¹⁸Pero in tzaj jun tyol, ex tu'n in nne'l ulj a' otoq kub' ttuxin tib'; in tzaj t-sama'n kyq'iq' tu'n tkub' ulj, ex tu'n jlu nnik' b'et a'.

¹⁹Xi tchik'b'a'n tyol kye tiyjil Jacob, aqeju aj Israel, kyuk'ix qe tley ex qe t-xnaq'tzb'il.

²⁰Minti' tb'incha ikju kyi'j txqantl nasyon, minti' xi tchik'b'a'n t-xnaq'tzb'il kye. Nimanxwit tb'i Qman.