Read kumam Salmos 148 Bible Online

Salmos 148 - kumam bible

Salmos 148

¹Nimanxwit tb'i Qman. Nimanxwit tb'i Qman max tuj kya'j. Aqeye najl tuj kya'j, kynimsa'n jawe tb'i Qman.

²Aqeye t-anjel Qman, kynimsa'n jawe tb'i kykyaqile. Aqeye nimxix kyajlale ate'ye tuj kya'j, kynimsa'n jawe tb'i kykyaqile.

³Aya q'ij ex aya xjaw, kynimsa'n jawe tb'i. Aqeye che'w in che qoptz'aj, kynimsa'n jawe tb'i.

⁴Aya kya'j ma' tjaw, nimsa'n jawa tb'i, aya a' at twitz kya'j, nimsa'n jawa tb'i.

⁵E tjaw nimset tb'i Qman porke a o q'mante tu'n kyb'ant kykyaqil jlu;

⁶e kub' tq'o'n tu'n kyten tuj kylugar te jumajx, kub' tq'o'n jun tley kyib'aj ex mlay che ik' tib'aj.

⁷Ax ikx kyeye aqeye ate' tuj tkyaqil twitz tx'otx', kynimsa'n jawe tb'i Qman: Aqeye nmaq txkup ate' tuj mar ex aya mar ma' t-xe',

⁸ax ikx teya tqan q'ankyoq ex saqb'aqun, aya ttxa che'w ex muj, ex aya kyq'iq' nim tipuna ex in japun tu'na aju in tzaj q'ma'n teya;

⁹aqeye nmaq witz ex qe tal witz, aqeye tze' wi'ten ex qe tze' b'a'n tlo'njtz kywitz,

¹⁰aqeye alumaj ex qe txkup tuj k'ul, qe chyu'j, ex qe jil in xi kyjaqu'n kyk'u'j twitz tx'otx';

¹¹aqeye rey twitz tx'otx' ex kykyaqil tnam; kykyaqil qe nejenel ex qe kawil twitz tx'otx',

¹²qe ku'xun ex qe q'apoj; qe tij xjal ex qe k'wa'l.

¹³Kykyaqile kynimsa'n jawe tb'i Qman, porke o'kx te ma' t-xilen. Mas ma' tajwalil twitz tajwalil kya'j ex tajwalil tx'otx'.

¹⁴Ma txi tq'o'n kyipumal qe xjal etzan tu'n. E tjaw nimsa'n tb'i kyu'n qe okslal ti'j, aqeju aj Israel niqayin ate' ttxlaj ex etzan qe tu'n. Nimanxwit tb'i Qman.