Read kumam Salmos 16 Bible Online

Salmos 16 - kumam bible

Salmos 16

¹Xnaq'tzb'il tu'n David Nman Dios, chin tkwentin oka porke ti'ja ma tz'ok nklon wib'e.

²O txi nma'ne teya: Aya Nmane, noq tu'na in chin tene tuj txub'txaj, mi jun jaku pon ik tza'n aya.

³Qeju b'a'n che niman Dios ex qeju tz'aqlxix ate' twitz tx'otx', nim in chin tzalaje kyi'j,

⁴atzun qeju in che ajb'en kye junxitl dios, tzul nimxix b'is kyi'j. Mlay chin tene kyuk'il ok t-xi kyq'o'n chik' te jun chojb'il te kydios, mlay txi nma'ne aju kyb'i qe kydios.

⁵Nman, o'kxku aya wetzb'ile; nim in tq'o'na weye, ex tuj tq'ab'a ta' nchwinqlale.

⁶Tb'anilxix ju tx'otx' ma nk'ulb'aye, mejorxix aju wetzb'ile ma tzaj q'o'n.

⁷Kxel nq'o'ne chjonte te Qman porke a in tzaj q'onte nnab'le, ex a in tzaj q'onte xnaq'tzb'il tuj wanmiye te qonik'an.

⁸At Qman wuk'ile tkyaqil maj, ex tu'nju at ntxlaje tuj nb'anq'ab'e, mlay chin yukche.

⁹Kyja'tzun at nim tzalajb'il tuj wanmiye; tkyaqil nximlale k'okel kwentin tu'n mi'n tnaj,

¹⁰ex mlay kyaj tq'o'na wanmiye tuj kynajb'il kyimni ex mlay chin kyaj tq'o'na tu'n ttzuwix nximlale, aqine nimal teya.

¹¹Tzul tyek'una weye aju tb'eyil chwinqlal. At nim tzalajb'il tu'n ntene tuk'ila, at nim achb'il tuk'ila te jumajx.