Read kumam Salmos 17 Bible Online

Salmos 17 - kumam bible

Salmos 17

¹Nman, b'intza tq'ajq'ajel nwi'ye, q'ontz twi'ya ti'j nna'j Diose, ex tz'aqlxix qine twitza, porke minti' nne'tz jun nik'aj yol tuj ntzi'ye.

²Tu'na ktzajel tb'incha'na wi'je, porke b'a'n tu'na alkye aju tz'aqlxix.

³Aya in b'aj ke'yinte qe nximb'etze; nnu'l aja ke'yil weye te qonik'an; o chin ok tq'o'na tuj malb'il ex minti' ma knet jun mya b'a'n wi'je tu'na. B'ajx txi nma'ne jun ti'xti mya tuj tumelxix,

⁴ik tza'n in kyb'incha'n txqantl xjal; ma chin el laq'e'ye ti'j kyb'e qeju o'kx in che ximan ti'j tu'n tkub' jun xjal kyu'n, ma nb'inchaye ik tza'nx in kyma'n qe tmandamyenta.

⁵Kukx wa'lxix qine tuj tb'eya; b'ajx tz'el npa'n wib'e ti'j.

⁶Aya Dios, ti'ja in jaw tq'ajq'ajel nwi'ye, porke in chin tzaj ttzaq'we'na; q'ontz twi'ya ti'j, ex b'intza qe nyole.

⁷Yek'untza weye aju tk'ujlalila tb'anilxix, ex tu'na in che klet qe xjal, aqeju in pon kyklon kyib' ti'ja tu'ntzun mi'n kynaj kyu'n qe aj q'oj kyi'j.

⁸Chin tkwentin oka ik tza'n t-santil qe tb'aq' twitza; chin tkloma tjaq' t-xlekumal t-xik'a

⁹kywitz qe xjal mya b'a'n in che ok tzoqpaj wi'je, ex kywitz qe aj q'oj wi'je kytxolin kyib' wi'je tu'n nkub'e kyu'n.

¹⁰Aqeju xjal lu kyuwxix kyanmi, in che yolin tuk'il kynimb'il kyib';

¹¹niqayin lepch qe wi'je ex in che ayon ti'j noq jnik' or ok nkub' tz'aqe kyu'n twitz tx'otx'.

¹²Ik kyten ik tza'n qe b'alun in che kub' ten xq'uqil tu'n ttzyet jun kykanb', ex ik tza'n jun tal tman b'alun nno'kx yut'e' tuj tewb'il.

¹³We'ktza Nman, we'kuya kywitz qe jlu. Xon kub'a qe twitz tx'otx'. Chin tkloma tu'n t-spadiya kywitz qe xjal mya b'a'n;

¹⁴chin tkloma tu'nju tipumala kywitz qe xjal lu, Nman; lajo'n exa qe twitz tx'otx' lu, ex atzunju kyetzb'il at tuj kychwinqlal lu. Noq kukx ke'yinxa qe, e tchmet nim kyq'inumab'l tu'ntzun kywa'nxix qe kyk'wa'l ti'j, ex tu'n tkyajtentl kye qe tal kychman.

¹⁵Atzun weye, k'okel nke'yine twitza tu'nju tz'aqlxix qine; ok chin jawil tzalaje ok tok nke'yine twitza, ok tel nwatle.