Read kumam Salmos 18 Bible Online

Salmos 18 - kumam bible

Salmos 18

¹A jlu o tz'ib'anjtz tu'n David ex xi tb'itzan te Qman tuj ju q'ij tej tklet tu'n Qman tuj kyq'ab' aj q'oj ti'j ex tuj tq'ab' Saúl. Nman, aya q'ol wipumale; at nk'u'je ti'ja.

²Aya kolol wi'je, aya jun lugar te kolb'il wib'e ex tzoqpilte weye. Aya Ndiose ik ttena te weye ik tza'n jun pik in chin klete tu'n, ex ik tza'n jun maqb'il in ajb'en tuj q'oj, ex tu'nju nim tipumala in chin klete, ik ttena ik tza'n jun ewb'il wib'e ma' tjax.

³Aya Nman, b'a'n tu'n tjaw nimset tb'iya; ok in chin txokone ti'ja in chin klete tu'na kywitz aj q'oj wi'je.

⁴Tuj nwitze mer ik tza'n otoq b'aj nskun wib'e tuj jun saqb'aq tu'n kamik; o nna'ye t-xob'il tej kyja'toq nnaje tu'n tipumal txqan a'.

⁵Mer ik tza'n otoq chin kub' xwakune tu'n saqb'aq tu'n nkyime; ex mer ik tza'n otoq chin tzyete tu'n tk'ob'il kamik.

⁶Tej in chin b'isuntoqe in ok tene txkolte Qman, xi nqanine onb'il te Ndiose, ex in tzaj b'i'ne tu'n max tuj tja; pon tq'ajq'ajel nwi'ye tuj t-ẍkyin.

⁷Tzajtzun jun nintz kyaqnajnab' ex e tzaj yukch kyq'uqb'il qe witz; b'i'x e b'aj yukch tu'n ttx'u'jil Qman.

⁸Etz sib' tuj ttxa'n, atzun tuj ttzi' etz jun q'aq' in tz'e'y nimku tu'n; ax ikx nne'tz xq'a'l tuj ttzi' in k'ant wen.

⁹Jaqet twitz kya'j tu'n ex ku'tztzun. Attoq txqan q'eq muj tjaq' tqan.

¹⁰Jax ten tib'aj jun querubín ex tzaj lipan; tib'aj kyq'iq' tzaj lipan.

¹¹Kub' tq'o'n q'eq muj nojni tu'n a' ex qloljxix ke'yin; ik tenb'a tu'n ik tza'n jun xb'alun te maqb'il, ex atzun okx tewan tib' tuj.

¹²Etz jun spik'un twitz in qoptz'aj wen; tuj muj tzaj chitj saqb'aqun ex xq'a'l in k'ant.

¹³Ate Qman aju ma'xix toklen, max tuj kya'j o b'injtz tq'ajq'ajel twi' in julin wen tuk'il saqb'aqun ex xq'a'l in k'ant.

¹⁴E tzaj t-xo'n qe tplech tuk'ix tqan q'ankyoq, atzun qe aj q'oj ti'j b'i'x e je'l oq ex b'i'x b'aj kysputun kyib'.

¹⁵B'i'x q'ancha'lin aju t-xe'pun mar, ikx qe tq'uqb'il tx'otx' tu'nju tq'ajq'ajel twi' Qman puro kyuw wen, ex tu'nju kyuwxix tzaj t-xupin.

¹⁶Max tuj kya'j tzaj tnuqpi'n tq'ab' Dios wi'je, ex tu'n tq'ab' in jatze tuj nintz mar.

¹⁷O chin klete tu'n tuj kyq'ab' aj q'oj wi'je, aqeju in el ik'une kyu'n ex at mas kyipun nwitze.

¹⁸E ok tzoqpaj wi'je tej otoq tzaj jun yajb'il wi'je, ex ate Qman tzaj oninte weye:

¹⁹In tzoqpete tu'n tu'n ntene tuj jun chq'ajlaj ma' twitz; in klete tu'n tu'nju at tk'ujlalil wi'je.

²⁰Ma tzaj q'o'n chojb'il weye tu'n Qman, tu'nju b'a'n nb'inchb'ene twitz,

²¹ex tu'nju kukx in b'ete tuj tb'e ex mi jun maj ma tz'el npa'n wib'e ti'j Dios.

²²Kukx in chin ximane kyi'j qe tmandamyent; mi jun maj ma tz'el wik'une qe tley.

²³Ma chin tene twitz minti' npaltile; ma tz'el npa'n wib'e ti'j mya b'a'n.

²⁴Ma tzaj tq'o'n Qman chojb'il weye tu'nju minti' npaltile twitz.

²⁵Aya Nman, tz'aqlxixa tuk'il ju xjal tz'aqlxix, ex puro b'a'na tuk'il ju xjal b'a'n tmod,

²⁶puro b'a'na tuk'il ju xjal saq tuj tanmi, ex ax kyuwa ti'j ju xjal elni twitz tu'n t-sb'un.

²⁷In che tklo'na qe xjal mans, atzun qeju in jaw kyniman kyib', in che ok tq'o'na te minti' kyajb'en.

²⁸Aya Nman in tzaj q'onte spik'un weye, aya Ndiose, tu'na in tzaj tq'o'na spik'un tuj qlolj jatum atine.

²⁹Tu'nju onin qine tu'na, chin okel tzoqpaje kyi'j qe aj q'oj wi'je, ex chin okexe twi muro tok ti'jele kytanmi.

³⁰Aju tb'e Dios puro tz'aqlxix; aju yol in tzaj ttziyan b'a'n tu'n tqe' qk'u'j ti'j; ate Dios kolol kye kykyaqil qeju in qe' kyk'u'j ti'j.

³¹¿Atpe juntl Dios? Minti'. O'kx a Dios jaku qo klet tu'n.

³²Ate Dios in tzaj q'onte wipune, a onil weye tu'n ntene minti' npaltile,

³³a in tzaj q'onte tipumal nqane tu'n tb'ant nqelane ik tza'n jun masat, ex a in jax q'inte weye twi' jun lugar ma'xix tjaw, jatum tu'n ntene segurxix,

³⁴a in tzaj q'onte xnaq'tzb'il weye tza'n tten tu'n tb'ant nq'ojine, ex a in tzaj q'onte wipune tu'n tli'pj ti'j xob'l plech wu'ne, aju q'an k'uxb'il ttx'otx'il.

³⁵Aya kolol wi'je ex in chin klete tu'na, tzyu'n qine tu'n tb'anq'ab'a; tu'nju t-xtalb'ila puro b'a'n ma tz'el weye.

³⁶Mya kyuw ma tz'e'la nb'eye tu'na, ex b'ajx che ex jilj qe nqane.

³⁷Inx lpe'ye kyi'j aj q'oj wi'je, ex e pon knet qe wu'ne, maxi in ajtze tejxi kykub' b'aj wu'ne.

³⁸Kub' kyi'j wu'ne ex e kub' tz'aq twitz tx'otx'. Minti'tl e jaw we'. E kub' tz'aq qe t-xe nqane.

³⁹Aya tzaj q'onte wipumale tuj q'oj; o tb'inchaya tu'n kykub' mok'e' qe xjal nwitze, aqeju aj q'oj wi'je,

⁴⁰ex nwitze e je'l oq qe aj q'oj wi'je; kyja'tzun e naj wu'ne aqeju in che el ik'un weye.

⁴¹E qanin onb'il, ex minti' jun onin kyi'j; e kub'san twitz Qman, ex minti' e tzaj ttzaq'we'n.

⁴²B'i'x e naj wu'ne mer ik tza'n quq in xi ti'n kyq'iq'. E b'aj nwab'ane mer ik tza'n tx'otx' tuj cay.

⁴³Ma chin klete tu'na te jun tnam mib'an b'in, ma chin ok tq'o'na te nejenel kyib'aj qe nasyon, qe xjal minti' ojtzqi'n wu'ne in che ajb'en weye.

⁴⁴Ok in chin yoline kye in chinx kyniman, ex in chin kub' b'i'ne kyu'n qe stranjer xjal.

⁴⁵Qe stranjer xjal in tzaj tchi kyi'j, ex in che lu'lun ok kyetz tuj lugar te kykolb'il kyib'.

⁴⁶Itz' te Qman. Nimanxwit aju kolol wi'je. Jawxwit nimsa'n Dios aju klol weye.

⁴⁷Atzunju Dios ma q'onte t-xel kyi'j qe aj q'oj wi'je, ex ma che kyaj tq'o'n qe tnam tjaq' nkawb'ile.

⁴⁸Ate Qman ma klon weye kye qe aj q'oj wi'je, aqeju jaw kyi'n kyib' tu'n kyq'ojin wi'je. Aya Nman, ma chin klete tu'na tuj kyq'ab' qe xjal jawni kywitz tu'n kyq'ojin.

⁴⁹Kyja'tzun kjawil nnimsa'ne tb'iya kyxol qe nasyon, ex chin b'itzale tu'n tjaw nimset tb'iya.

⁵⁰In tq'o'na tipumal ju rey sk'o'maj tu'na tu'n tkub' kyi'j qe aj q'oj tu'n; kukx in tb'incha'na xtalb'il te David ex kye qe tiyjil.