Read kumam Salmos 19 Bible Online

Salmos 19 - kumam bible

Salmos 19

¹B'itz tu'n David Ti'j kya'j in tyek'un tib' tajwalil Dios, ex ti'j twitz kya'j in yek'unjtz taq'unb'en tq'ab'.

²Aju yol in tma'n jun q'ij, ax in yolin juntl q'ij ti'j; ex aju yol in tma'n jun qonik'an, ax in yolin juntl qonik'an ti'j, in che yolin ti'j tnab'l Dios.

³Maske minti' q'ajq'aj qe yol ex minti' in b'injtz jun tq'ajq'ajel wib'aj,

⁴pero aju tqanil in xi' tuj tkyaqil twitz tx'otx' ex max in pon b'aj kyyol ttxa'npun tx'otx', max jatum ta' tnajb'il q'ij.

⁵Ik tten q'ij ik tza'n jun ku'xun at tipun tu'n tqelan, ex ik tza'n jun chmilb'aj nne'tz tuj tja k'itzqe toklen moje'.

⁶Nne'tz q'ij tuj jun pak' t-xe kya'j ex in pon b'aj tuj juntl pak', mi a'l jun jaku tz'el oq twitz tkyaqal.

⁷Aju tley Qman Dios tz'aqlxixte porke in tq'o'n ak'aj qipumal; qe tmandamyent axix tok qe ex aju xjal minti' ch'in b'a'n tu'n nno'k tnab'l kyu'n.

⁸Qe t-xnaq'tzb'il Qman Dios tz'aqlxix qe ex in kytzalajsa'n qanmi. Qe tmandamyent mya smo'n kyten ex in kyspik'b'a'n tuj qwitz.

⁹Aju tu'n qxob' twitz Qman Dios ex tu'n qniman te, minti' tpaltil ex kukx ktel te jumajx. Qe tmandamyent axix tok qe, ex kykyaqil tz'aqlxix.

¹⁰Mas tb'anilxix qe twitz q'an pwaq ex mas chi' qe twitz ta'l kab'.

¹¹In kyq'o'n nnab'le, aqine tmajena; qa ma che japun wu'ne, nim b'a'n in kyb'incha'n weye.

¹²¿Alkye jun jaku tz'el tnik' ti'j tpaltil? Nman, najsama aju npaltile minti' nne'l nnik'e ti'j.

¹³Chin tkwentin oka tu'n mi tjaw nniman wib'e, mi'n taq'a amb'il tu'n tkub' wi'je tu'n nnimb'il wib'e. Kyja'tzun chin okele te tz'aqlxix ex mlay chin ik'e tib'aj tleya.

¹⁴B'a'nwt tz'ela nyole ex nximb'etze tuj twitza, aya Nman klol weye ex tzoqpil weye.